ഷാര്ജയില് വമ്പന് സൗരോര്ജ പദ്ധതി വരുന്നു
ഷാര്ജയില് വൈദ്യുതി പ്രതിസന്ധി നേരിടാന് പുത്തന് സൗരോര്ജ പദ്ധതികള് ആവിഷ്കരിക്കുന്നു. ഊര്ജ ഉപയോഗം വര്ധിച്ചുവരുന്ന സാഹചര്യത്തില് ഷാര്ജ ഇലക്ട്രിസിറ്റി ആന്ഡ് വാട്ടര് അതോറിറ്റി (സേവ) പുതിയ സൗരോര്ജപ്ലാന്റ് സ്ഥാപിക്കുന്നു. പാരമ്പര്യ ഊര്ജ ഉത്പാദനം കുറച്ചുകൊണ്ടുവന്ന് സൂര്യ പ്രകാശത്തില്നിന്ന് വൈദ്യുതി ഉത്പാദിപ്പിക്കാന് സാധിക്കുന്നതോടെ വൈദ്യുതിപ്രതിസന്ധി പരിഹരിക്കാന് സാധിക്കുമെന്നാണ് പ്രതീക്ഷ. ഇതിനായി സേവ അധികൃതര് പദ്ധതി തയ്യാറാക്കുകയും സോളാര്പ്ലാന്റ് സ്ഥാപിക്കാന് വിദഗ്ധകമ്പനികളുമായി ചര്ച്ച ആരംഭിക്കുകയും ചെയ്തു. ഷാര്ജയുടെ വൈദ്യുതി ഉത്പാദനമേഖലയില് ഒരു നാഴികക്കല്ലാകുന്ന ഈ പദ്ധതിക്കായി 600 ദശലക്ഷം ഡോളറാണ് ചെലവ് കണക്കാക്കുന്നത്.
മൂന്നുവര്ഷത്തിനുള്ളില് 100 മെഗാവാട്ട് വൈദ്യുതി ഇത്തരം സോളാര്പ്ലാന്റിലൂടെ ഉത്പാദിപ്പിക്കാന് സാധിക്കുമെന്നാണ് വിദഗ്ധസമിതിയുടെ കണ്ടെത്തല്. ജനവാസവും വ്യാവസായികകമ്പനികളും വര്ധിച്ചുകൊണ്ടിരിക്കുന്ന ഷാര്ജയില് പ്രകൃതിക്ക് ദോഷകരമാകാതെയും പരിസ്ഥിതിയെ സംരക്ഷിച്ചുകൊണ്ടും സോളാര്പ്ലാന്റ് സ്ഥാപിക്കാനായി അന്താരാഷ്ട്രതലത്തില് വിദഗ്ധരായ നിര്മാണക്കമ്പനികളെയായിരിക്കും നിയോഗിക്കുക. നിലവിലുള്ള ഊര്ജോത്പാദന രീതിയില് നിന്നും വ്യത്യസ്തമായി പാരമ്പര്യേതര ഊര്ജഉത്പാദനം വരുന്നതോടെ മധ്യപൂര്വ രാജ്യങ്ങളില് ഇത്തരം പദ്ധതി സ്ഥാപിക്കുന്ന ആദ്യരാജ്യമായിരിക്കും ഷാര്ജ.
https://www.facebook.com/Malayalivartha
