സൗദിയിലേക്ക് ഇന്ത്യയിൽ നിന്നുള്ള മനുഷ്യക്കടത്ത് തടയാൻ സാധിച്ചതായി സൗദി അംബാസഡർ അഹമ്മദ്​ ജാവേദ്. ദമ്മാം തീരത്തടുപ്പിച്ച ഇന്ത്യൻ കോസ്​റ്റ്​ഗാർഡ്​ കപ്പലായ ‘വിക്ര’ മിൽ മാധ്യമ പ്രവർത്തകരുമായി സംസാരിക്കുകയായിരുന്നു അദ്ദേഹം.

എംബസിയുടെ മുന്നിൽ നിത്യവും വന്നിരുന്ന സങ്കീർണമായ പ്രശ്​നമായിരുന്നു സൗദിയിലെത്തുന്ന ഇന്ത്യൻ വീട്ടു​വേലക്കാരുടെ പരാതികൾ. ഇതി​ന്റെ വേരുകൾ അന്വേഷിച്ച്​ ചെല്ലുമ്പോൾ ഇന്ത്യയിൽ നിന്ന്​ വീട്ടുവേലക്കാരെ കൊണ്ടു വരുന്നതിന്​ കൃത്യമായ മാർഗ രേഖകൾ രൂപപ്പെടുത്തിയിട്ടും അതിനെ മറികടന്ന്​ അനധികൃത മാർഗത്തിലൂടെ എത്തിയവരായിരുന്നു അധികവും. കുറുക്കുവഴി തേടുന്ന റിക്രൂട്ട്​മെന്റ് കമ്പനികൾ മറ്റ്​ രാജ്യങ്ങൾ വഴി സ്​ത്രീകളെ സൗദിയിൽ എത്തിച്ച്​ ആളുകൾക്ക്​ കൈമാറ്റം ചെയ്​തു കൊണ്ടിരുന്നു. 50 പേരിലധികം ഒരേ സമയം അഭയ കേന്ദ്രത്തിൽ എത്തുന്ന അവസ്​ഥ വരെ ഉണ്ടായിരുന്നു. നാട്ടിൽ നിന്ന്​ യാഥാർഥ്യങ്ങൾ മനസ്സിലാക്കാതെ എത്തുന്ന സ്​ത്രീകളാണ്​ ഇവരുടെ കെണിയിൽ പെട്ടിരുന്നത്​. ​

ഇത്തരം കേസുകൾ വ്യാപകമായതോടെ താൻ തന്നെ പ്രത്യേക താൽപര്യമെടുത്ത്​ നിത്യവും റിപ്പോർട്ടുകൾ ശേഖരിച്ച്​ ബദൽ മാർഗങ്ങൾ ആസൂത്രണം ചെയ്​തതായും അദ്ദേഹം പറഞ്ഞു. നിലവിൽ അഞ്ച്​ സ്​ത്രീകൾ മാത്രമേ അഭയ കേന്ദ്രത്തിൽ ഉള്ളൂ. വീട്ടുവേലക്കാരുടെ വിസാനടപടികൾ സങ്കീർണമാണ്​ എന്നായിരുന്നു പരാതി. ഇപ്പോൾ ഇ മൈഗ്രേറ്റ്​ സംവിധാനം വഴി നടപടികൾ എളുപ്പം പൂർത്തിയാക്കാൻ പറ്റുമെന്നും അദ്ദേഹം പറഞ്ഞു.