കൊവിഡ് ദുരിതങ്ങള്ക്കിടെ ഇസ്ലാമോഫോബിയ ഇന്ത്യയും ഗള്ഫ് രാജ്യങ്ങളും തമ്മിലുളള ബന്ധം വഷളാക്കുന്നതായി ആശങ്ക... സമൂഹ മാധ്യമങ്ങളിലൂടെ 'ഇസ്ലാമോഫോബിയ' പരത്തിയതിന് യുഎഇയില് മൂന്ന് ഇന്ത്യക്കാര്ക്കെതിരെ നടപടി
കൊവിഡ് ദുരിതങ്ങള്ക്കിടെ ഇസ്ലാമോഫോബിയ ഇന്ത്യയും ഗള്ഫ് രാജ്യങ്ങളും തമ്മിലുളള ബന്ധം വഷളാക്കുന്നതായി ആശങ്ക. സോഷ്യല് മീഡിയയില് കഴിഞ്ഞ കുറച്ച് ദിവസങ്ങളായി വലിയ തോതിലാണ് ഫേക്ക് അക്കൗണ്ടുകള് വഴിയടക്കം വിദ്വേഷ പ്രചാരണം നടക്കുന്നത്. ബിജെപി എംപി തേജസ്വി സൂര്യ അറബ് സ്ത്രീകളെ അപമാനിച്ച് ട്വീറ്റ് ചെയ്തത് കാര്യങ്ങള് വഷളാക്കി. തുടര്ന്ന് ഗള്ഫ് രാജ്യങ്ങളിലെ പ്രമുഖര് കടുത്ത മുന്നറിയിപ്പുമായി രംഗത്ത് വന്നിരുന്നു.
സാഹചര്യം വഷളാകുന്നതിനിടെ പ്രശ്നത്തില് പ്രധാനമന്ത്രി നരേന്ദ്ര മോദിയും വിദേശകാര്യമന്ത്രി എസ് ജയശങ്കറും ഇടപെട്ടിരിക്കുകയാണ്. സോഷ്യല് മീഡിയയിലെ വിദ്വേഷ പ്രചരണം ഗള്ഫ് രാജ്യങ്ങളില് താമസിക്കുന്ന ഇന്ത്യക്കാരെ ബാധിക്കുന്നത് മാത്രമല്ല വിഷയം. ഗള്ഫ് രാജ്യങ്ങളുമായുളള ഇന്ത്യയുടെ ബന്ധത്തേയും ബാധിച്ചേക്കുമെന്ന സാഹചര്യത്തിലാണ് പ്രധാനമന്ത്രിയടക്കം ഇടപെട്ടിരിക്കുന്നത്.
സമൂഹ മാധ്യമങ്ങളിലൂടെ 'ഇസ്ലാമോഫോബിയ' പരത്തിയതിന് യുഎഇയില് മൂന്ന് ഇന്ത്യക്കാര്ക്കെതിരെ കൂടി നടപടി. ദുബായിലെ ഇറ്റാലിയന് റസ്റ്ററന്റില് ഷെഫായ റാവത് രോഹിത്, ഷാര്ജയിലെ കമ്പനിയില് സ്റ്റോര്കീപ്പറായ സചിന് കിന്നിഗോളി, കമ്പനി പേരു വെളിപ്പെടുത്താത്ത കാഷ്യര് എന്നിവരെ ജോലിയില് നിന്ന് പിരിച്ചുവിടുകയും നിയമ നടപടികള്ക്കായി പൊലീസിന് കൈമാറുകയും ചെയ്തു. നേരത്തെ ഒട്ടേറെ ഇന്ത്യക്കാര്ക്ക് ഇതുപോലെ ജോലി നഷ്ടമാവുകയും നിയമനടപടിക്ക് വിധേയരാകേണ്ടി വരികയും ചെയ്തിട്ടുണ്ട്.
അച്ചടക്ക ലംഘനത്തെ തുടര്ന്ന് ഷെഫ് റാവത് രോഹിതിനെ പിരിച്ചുവിട്ടതായും ഇയാള്ക്കെതിരെ അന്വേഷണം ആരംഭിച്ചതായും ഇറ്റാലിയന് റസ്റ്ററന്റ് ശൃംഖല നടത്തുന്ന അസാദിയ ഗ്രൂപ്പ് വക്താവ് പറഞ്ഞു. ഇനിയൊരു അറിയിപ്പുണ്ടാകുന്നതുവരെ ജോലിക്ക് വരേണ്ടതില്ലെന്ന് സചിന് കിന്നിഗോളിയെ അറിയിച്ചതായി ന്യൂമിക് ഓട്ടോമേഷന് കമ്പനിയുടമയും അറിയിച്ചു. കൂടാതെ, ഇയാളുടെ ശമ്പളം കമ്പനി പിടിച്ചുവയ്ക്കുകയും ചെയ്തിട്ടുണ്ട്. മതപരമായ വിവേചനം പ്രകടിപ്പിക്കുന്നവരെ തങ്ങള് ഒരിക്കലും വച്ചുപൊറുപ്പിക്കില്ലെന്ന് വ്യക്തമാക്കി. വിശാല് താകൂര് എന്ന പേരിലാണ് മൂന്നാമന് ഫെയ്സ് ബുക്കിലൂടെ ഇസ് ലാമിനെതിരെ പോസ്റ്റുകള് ഇട്ടിരുന്നതെന്ന് ദുബായ് ആസ്ഥാനമാക്കി പ്രവര്ത്തിക്കുന്ന ട്രാന്സ് ഗ്വാര്ഡ് ഗ്രൂപ്പ് അറിയിച്ചു.
കമ്പനി നടത്തിയ അന്വേഷണത്തില് വിശാല് താകൂര് തങ്ങളുടെ ജീവനക്കാരനാണെന്ന് കണ്ടെത്തുകയും ഇയാളെ ദുബായ് പൊലീസിന് കൈമാറുകയും ചെയ്തു. പിഴ, ജോലിയില് നിന്ന് പിരിച്ചുവിടല്, നാടുകടത്തല് തുടങ്ങിയ അച്ചടക്ക നടപടികളാണ് യുഎഇ സൈബര് നിയമമനുസരിച്ച് കുറ്റക്കാര്ക്കെതിരെ സ്വീകരിക്കുകയെന്ന് കൂട്ടിച്ചേര്ത്തു. അതേസമയം, ട്രാന്സ് ഗ്വാര്ഡ് ജീവനക്കാരന് എന്നവകാശപ്പെട്ട് പ്രകാശ് കുമാര് എന്നയാള് ട്വിറ്ററിലൂടെ മതഅസഹിഷ്ണുത പ്രകടിപ്പിക്കുന്നുണ്ടെന്നും എന്നാല് ഇയാള്ക്ക് കമ്പനിയുമായി യാതൊരു ബന്ധവുമില്ലെന്നും അറിയിച്ചു.
അടുത്തകാലത്ത് ഇത്തരത്തില് ഇസ്ലാമോഫോബിയ പ്രചരിപ്പിച്ചതിന് ഗള്ഫ് നാടുകളില് ഒട്ടേറെ ഇന്ത്യക്കാര്ക്ക് ജോലി നഷ്ടപ്പെടുകയും ഇവര്ക്കെതിരെ നിയമനടപടി സ്വീകരിക്കുകയും ചെയ്തിരുന്നു. ഇതേ തുടര്ന്ന് യുഎഇയിലെ ഇന്ത്യന് സ്ഥാനപതി ഇത്തരം പ്രവണതകളില് നിന്ന് മാറിനില്ക്കാന് മുന്നറിയിപ്പ് നല്കുകയുമുണ്ടായി. ഗള്ഫിലെ മറ്റു രാജ്യങ്ങളിലെ സ്ഥാനപതിമാരും ഇത്തരത്തില് മുന്നറിയിപ്പ് നല്കിയിട്ടുണ്ട്.
കൊവിഡ് 19 പശ്ചാത്തലത്തില് ഇന്ത്യയില് ഇസ്ലാമോഫോബിയ വളര്ത്താനുള്ള നീക്കങ്ങള്ക്കെതിരെ ഓര്ഗനൈസേഷന് ഓഫ് ഇസ്ലാമിക് കോ ഓപറേഷന് (ഒ.ഐ.സി) പ്രതിഷേധം അറിയിച്ചു. ഒ.ഐ.സിയുടെ മനുഷ്യാവകാശ വിഭാഗമായ ഐ.പി.എച്ച്.ആര്.സിയാണ് പ്രതിഷേധം അറിയിച്ചത്.കൊവിഡ് 19 പശ്ചാത്തലത്തില് ഇന്ത്യയില് മാധ്യമങ്ങള് മോശം രീതിയില് മുസ്ലിങ്ങളെ ചിത്രീകരിക്കുകയാണെന്നും അവര്ക്കെതിരെ വിവേചനവും അതിക്രമങ്ങളും ഉയരുന്നുണ്ടെന്നും ഒ.ഐ.സി അറിയിച്ചു.
ഈ സാഹചര്യത്തില് ഇന്ത്യയിലെ മുസ്ലീം ന്യൂനപക്ഷത്തിന്റെ അവകാശങ്ങള് സംരക്ഷിക്കാന് സര്ക്കാര് അടിയന്തര ഇടപെടല് നടത്തണമെന്നും ഇസ്ലാമിക രാജ്യങ്ങള് ആവശ്യപ്പെട്ടു.
https://www.facebook.com/Malayalivartha
