യുഎഇയില്‍ സ്വകാര്യ മേഖലയില്‍ പിതൃത്വ അവധി അനുവദിച്ച് പ്രസിഡന്റ് ഷെയ്ഖ് ഖലീഫ ബിന്‍ സായിദ് അല്‍ നഹ്യാന്‍ ഉത്തരവിറക്കി. അച്ഛനാകുന്ന പുരുഷന്‍മാര്‍ക്ക് അവധി അനുവദിക്കുന്ന ആദ്യ ഗള്‍ഫ് രാജ്യമാണ് യുഎഇ. ഇതുസംബന്ധിച്ച ഉത്തരവ് ഞായറാഴ്ച പ്രസിഡന്റ് പുറത്തിറക്കി. തൊഴില്‍ മേഖലയിലെ ഫെഡറല്‍ നിയമത്തിലെ പുതിയ ഭേദഗതികള്‍ക്ക് പ്രസിഡന്റ് അംഗീകാരം നല്‍കിയതോടെയാണിത്. ഉത്തരവ് അനുസരിച്ച്, ജനനത്തീയതി മുതല്‍ ആറുമാസം വരെ പ്രായമുള്ള കാലയളവില്‍ സ്വകാര്യമേഖലയിലെ ജീവനക്കാര്‍ക്ക് അവരുടെ നവജാത ശിശുക്കളെ പരിപാലിക്കാന്‍ അഞ്ച് ദിവസത്തെ ശമ്ബളത്തോടുകൂടിയ അവധി ലഭിക്കും. 

ലിംഗ സന്തുലിതാവസ്ഥയെയും തുല്യ അവസരങ്ങളെയും പിന്തുണയ്ക്കുന്നതിനോടൊപ്പം കുടുംബ ഐക്യവും സ്ഥിരതയും സാക്ഷാത്കരിക്കാനുള്ള ശ്രമങ്ങളുടെ ഭാഗമായാണ് പിതൃത്വ അവധിയിലൂടെ മുന്നോട്ടുവെക്കുന്നതെന്ന് അധികൃതര്‍ അറിയിച്ചു.
സ്വകാര്യ തൊഴില്‍ മേഖലകളിലേക്ക് കൂടുതല്‍ ചെറുപ്പക്കാരെ കടന്നുവരാന്‍ പ്രേരിപ്പിക്കുന്ന ഒട്ടേറെ നിര്‍ദേശങ്ങള്‍ ഭേദഗതിയിലുണ്ട്. അതില്‍ ഏറ്റവും പുതിയതാണ് പിതൃത്വ അവധി അനുവദിച്ചിരിക്കുന്നത്. അത് 'അച്ഛനോ അമ്മയോ' ആകട്ടെ കുട്ടി ജനിക്കുമ്‌ബോള്‍ അവര്‍ക്ക് ശമ്ബളത്തോടെയുള്ള അവധി അനുവദിക്കുന്നത് പ്രധാനമാണെന്നും യുഎഇ വ്യക്തമാക്കുന്നു.
ലോകത്തിന് ഒരു മത്സരാധിഷ്ഠിത മാതൃക സൃഷ്ടിക്കുന്നതിനും രാജ്യത്തിന്റെ സ്വകാര്യമേഖലയിലെ തൊഴില്‍ അന്തരീക്ഷം പ്രോത്സാഹിപ്പിക്കുന്നതിനും ലക്ഷ്യമിടുന്ന ലിംഗ സന്തുലിതാവസ്ഥയുമായി ബന്ധപ്പെട്ട നിയമനിര്‍മ്മാണത്തിന്റെ ഭാഗമായാണ് പുതിയ ഉത്തരവെന്നും അവര്‍ വ്യക്തമാക്കുന്നു.