2014-ൽ ആഗോളതലത്തിൽ എണ്ണ വില ഇടിഞ്ഞപ്പോൾ രാജ്യം നേരിട്ട ഭയാനക വെളുവിളികളെ നേരിടാൻ സൗദി അറേബ്യ ഏറെ ആത്മവിശ്വാസത്തോടെ പ്രഖ്യാപിച്ച പദ്ധതിയാണ് വിഷൻ 2030. സൽമാൻ രാജാവ് അധികാരത്തിൽ വന്നതിന്റെ തൊട്ടടുത്ത വർഷം 2016 ലാണ് സൗദിയുടെ സ്വപ്നപദ്ധതിയായ വിഷൻ 2030 പ്രഖ്യാപിക്കുന്നത്. എണ്ണ ഇതര സ്രോതസ്സുകളിൽ നിന്ന് സാമ്പത്തിക വരുമാനം കൈവരിച്ച് സാമൂഹിക പരിവർത്തനം സാധ്യമാക്കുക എന്നതായിരുന്നു വിഷൻ പ്രധാനമായും ലക്ഷ്യംവച്ചത്. ഇതിനായി സ്വകാര്യ മേഖലയെ കൂടുതൽ പിന്തുണക്കാൻ സർക്കാർ തീരുമാനിക്കുകയുണ്ടായി.

വിഷൻ 2030 അനുസരിച്ച് നടപ്പാക്കിയ സാമ്പത്തിക പ്രവർത്തനങ്ങളുടെ നാലു വർഷം പിന്നിടുന്നു. ഇതിനിടെ ഉണ്ടായ നിർഭാഗ്യകരമായ മഹാമാരി ലോകത്തെ നാടകീയമായി ഞെട്ടിക്കുകയും ചെയ്തു. 2020 ൽ മറ്റേത് രാജ്യത്തെ പോലെ കോവിഡ് 19 സൗദിയുടെ സമ്പദ്‌വ്യവസ്ഥയെയും ബാധിക്കുകയും ചെയ്തു. അത് മറികടക്കുക ഒരിക്കലും എളുപ്പമായിരുന്നില്ല. ആഗോള എണ്ണ വില പൂജ്യം തൊട്ടു, ലോക വ്യാപാര-വ്യവസായങ്ങൾ തടസപ്പെട്ടു, രാജ്യാന്തര ചരക്കു നീക്കങ്ങളും യാത്രകളും നിലച്ചു, വിനോദ സഞ്ചാരം മരവിച്ചു, സർക്കാരും സ്വകാര്യ മേഖലയും ഒരുപോലെ ഭാവിയെക്കുറിച്ചുള്ള ആശങ്കകൾ പങ്കിട്ടു.

പ്രതിസന്ധികൾ കുന്നുകൂടുന്നതിനിടയിലും സൗദി സർക്കാർ വളരെയധികം ഊർജവും സമയവും സാമ്പത്തികവും ചെലവഴിക്കുന്ന ഒരു പദ്ധതി എന്ന നിലയിൽ ചില ശ്രദ്ധേയമായ നേട്ടങ്ങൾ നേടാൻ വിഷൻ 2030 ക്ക് കഴിഞ്ഞു. അതിൽ പ്രധാനമാണ് ധനപരമായ സ്ഥിരത കൈവരിക്കാൻ സാധിച്ചത്. കൂടാതെ മാക്രോ ഇക്കണോമിക് മാനേജ്‌മെന്റ്, മൂലധന വിപണിയുടെയും ബാങ്കിങ് മേഖലയുടെയും വികസനം, സർക്കാർ സേവനങ്ങളുടെ ഡിജിറ്റലൈസേഷൻ, സാമൂഹിക സാംസ്കാരിക പരിഷ്‌കാരങ്ങൾ തുടങ്ങി ധാരളം രംഗത്ത് ഇത് പ്രകടമായി കാണുവാന് സാധിച്ചു എന്നുതന്നെ പറയാം.

മാത്രമല്ല, പ്രവാസികളെ പ്രതിസന്ധിയിലാക്കി പുതിയ തൊഴിൽ മേഖലകൾ സൃഷ്ടിക്കുന്നതിലും സ്വദേശി വത്കരണത്തിലൂടെ പൊതുജന സ്വീകാര്യത ഉണ്ടാക്കുന്നതിലും സൗദി ശ്രദ്ധ ചെലുത്തി. ഒപ്പം പ്രവാസികൾക്ക് വേണ്ടി തൊഴിൽ പരിഷ്‌കാരങ്ങൾ കൊണ്ടു വരുന്നതിലും രാജ്യം ശ്രദ്ധിച്ചു. സ്വകാര്യ മേഖലയുടെ വളർച്ചക്ക് സർക്കാർ നൽകുന്ന പിന്തുണ ഈ രംഗത്തെ എടുത്തു പറയാവുന്ന നേട്ടമാകുകയുണ്ടായി. കേന്ദ്രീകൃത പൊതു നിക്ഷേപക നിധി (പബ്ലിക് ഇൻവെസ്റ്റ്മെന്റ് ഫണ്ട്) വഴി രാജ്യത്തേക്ക് മൂലധനം ആകർഷിക്കാനും കഴിയുകയും ചെയ്തു.