ഡൽഹിയിലാകെ സമീപകാലത്തൊന്നുമില്ലാതെ സേനാവിന്യാസമാണ് കാണാനാകുന്നത്. മുഖ്യ തിരഞ്ഞെടുപ്പ് കമ്മിഷണർ ഗ്യാനേഷ് കുമാറിന്റെ രാജിയാവശ്യപ്പെട്ട് ഇന്ന് കോക്രോച്ച് ജനതാ പാർട്ടി (സി.ജെ.പി.) നടത്തുന്ന പ്രതിഷേധമാർച്ച് തടയുകയാണ് ലക്ഷ്യം. സമരകേന്ദ്രമായ ജന്തർമന്തറിന് പല വലയങ്ങളിലാണ് കാവലുള്ളത്. സുരക്ഷയ്ക്ക് പോലീസിനുപുറമേ 120 കമ്പനി കേന്ദ്ര സായുധസേനകളെയും ഇറക്കിയിട്ടുണ്ട്. 25,000-ത്തിൽപ്പരം സുരക്ഷാ ഉദ്യോഗസ്ഥരെയാണ് വിന്യസിച്ചിരിക്കുന്നതെന്നാണ് കണക്ക്.

ഏതുവിധേനയും പ്രതിഷേധം തടയാനാണ് ശ്രമം. സമരത്തിനെത്തുന്നവരെ തടഞ്ഞ് തിരിച്ചയക്കാനും ആവശ്യമെങ്കിൽ കരുതൽ തടങ്കലിലാക്കാനുമാണ് നിർദേശമുള്ളത്.

വിവിധയിടങ്ങളിൽ വിദ്യാർഥി, യുവജന സംഘടനാ നേതാക്കളെയും പ്രവർത്തകരെയും വെള്ളിയാഴ്ചതന്നെ തടങ്കലിലാക്കിയിട്ടുണ്ട്. ബി.ജെ.പി. സംസ്ഥാനങ്ങളിൽനിന്ന് സമരത്തിന് പോകുന്നവരെ തീവണ്ടികളിലെത്തി പോലീസ് പിടിച്ചിറക്കുന്നതായി ഇടതുസംഘടനകൾ ആരോപിച്ചു.

സെൻട്രൽ ഡൽഹിയിലെ എല്ലാ മെട്രോ സ്റ്റേഷനും വെള്ളിയാഴ്ച രാത്രി ഒൻപതുമുതൽ സ്ഥിതി ഭേദമാകുന്നതുവരെ അടച്ചിടുമെന്ന് ഡി.എം.ആർ.സി.യുടെ അറിയിപ്പുണ്ട്. വെള്ളിയാഴ്ച ഉച്ചകഴിഞ്ഞ് പുറപ്പെട്ട് ശനിയാഴ്ച പുലർച്ചെ നാലുമുതൽ പകൽ രണ്ടുമണിവരെ ന്യൂഡൽഹി, നിസാമുദ്ദീൻ സ്റ്റേഷനുകളിലെത്തുന്ന തീവണ്ടികൾ റദ്ദാക്കി. 38 വണ്ടികൾ മാത്രമാണ് റദ്ദാക്കുന്നതെന്ന് ഉത്തര റെയിൽവേ . ഡൽഹി അതിർത്തികളിലും സുരക്ഷ ശക്തമാക്കിയിട്ടുണ്ട്. ഹോട്ടലുകളിലും ലോഡ്ജുകളിലും അതിഥിമന്ദിരങ്ങളിലും ധർമശാലകളിലും കർശനപരിശോധനകളുണ്ട്. മദ്യവിൽപ്പനശാലകൾക്ക് ശനിയാഴ്ച ഡൽഹി സർക്കാർ അവധി പ്രഖ്യാപിച്ചു.