കൊറോണ വ്യാപനത്തെ തുടർന്ന് ലോകമെമ്പാടുമുള്ള രാജ്യങ്ങൾ സാമ്പത്തികമായും തകർന്നടിഞ്ഞിരുന്നു. പലയിടത്ത് നിന്നും ഏറെ പ്രതീക്ഷ നൽകുന്ന വാർത്തകൾ പുറത്ത് വരുമ്പോൾ മറ്റുപലയിടത്തും അതല്ല സംഭവിച്ചത്. കൊറോണ വ്യാപനത്തിന്റെ നാളുകൾ പിന്നിട്ട ഗൾഫ് മേഖല പുതു ചരിത്രത്തിലേക്ക് കാലെടുത്ത് വയ്ക്കുമ്പോൾ കുവൈറ്റിന് പറയാനുള്ളത് ഒരു ദയനീയ കഥ. 30ലേറെ രാജ്യങ്ങളിൽ നിന്നുള്ള വിമാന സർവീസ് പുനരാരംഭിക്കാത്തത് ഇലക്ട്രോണിക്സ് ഉൽപന്നങ്ങളുടെ വിപണിയിൽ കനത്ത തിരിച്ചടിയായതായി റിപ്പോർട്ട്. കോവിഡ് പശ്ചാത്തലത്തിൽ കഴിഞ്ഞ മാർച്ചിൽ നിർത്തിവച്ച വിമാന സർവീസ് 34 രാജ്യങ്ങളിൽ നിന്ന് ഇനിയും പുനരാരംഭിച്ചിട്ടില്ല എന്നതിൽ ആകെ കുഴഞ്ഞിരിക്കുകയാണ് പ്രവാസികൾ.

എന്നാൽ എന്ന് പുനരാരംഭിക്കുമെന്ന് സൂചനയുമില്ല. ഇന്ത്യയും ഈജിപ്തും ഉൾപ്പെടെ കുവൈത്തിൽ പ്രവാസി സമൂഹം കൂടുതലുള്ള രാജ്യങ്ങളും നിരോധിത പട്ടികയിലുണ്ട്. യാത്രാ സൗകര്യം നിലച്ചതിനാൽ പ്രവാസികൾ ഇലക്ട്രോണിക്സ് ഉൽപന്നങ്ങൾ വാങ്ങുന്നതിന് പ്രവാസികൾ എത്തുന്നില്ലെന്നാണ് ഈ മേഖലയിലുള്ള വ്യാപാരികൾ വ്യക്തമാക്കുന്നത്. വേനൽക്കാലത്ത് സ്വദേശത്തേക്ക് പോകുന്നവർ വലിയതോതിൽ ഇലക്ട്രോണിക്സ് ഉൽപന്നങ്ങളും വാങ്ങിക്കൂട്ടുമായിരുന്നു.

കഴിഞ്ഞ വേനലിൽ ഇത് ഉണ്ടായില്ല. തവണ വ്യവസ്ഥയിൽ ഇലക്ട്രോണിക്സ് ഉപകരണങ്ങൾ വിൽക്കുന്നതിൽ മത്സരമായിരുന്നു കടകളിൽ. എന്നാൽ അതും ഇപ്പോൾ വേണ്ടത്ര ഇല്ല. വിപണനത്തിൽ 70% എങ്കിലും കുറവുണ്ടെന്നാണ് കണക്കാക്കുന്നത്. വിമാനം ഇല്ലാത്തതിന് പുറമേ തൊഴിൽ നഷ്ടപ്പെട്ടതും കച്ചവട സ്ഥാപനങ്ങളെ ബാധിച്ചിട്ടുണ്ട്. രാജ്യത്തെ മിക്ക സ്ഥാപനങ്ങളിൽനിന്നും ജീവനക്കാരെ പിരിച്ചുവിട്ടു. ഇലക്ട്രോണിക്സ് സ്ഥാപനങ്ങളിൽനിന്നും ഒട്ടേറെപ്പേർ തൊഴിൽ നഷ്ടപ്പെട്ടവരായുണ്ട്.