ഇന്ത്യയിൽ നിന്നുള്ള സന്ദർശക വിസക്കാർ, ടൂറിസ്റ്റുകൾ എന്നിവർക്ക് ബഹ്റൈൻ പ്രവേശന വിലക്ക് ഏർപ്പെടുത്തിയിരിക്കുകയാണ്. ബഹ്റൈനിൽ താമസ വിസയുള്ളവർക്ക് പ്രവേശനം ഉണ്ടാകും. പക്ഷേ ഇന്ത്യയിൽ നിന്ന് വിസിറ്റ് വിസയിൽ വരുന്നവർക്ക് ബഹറൈനിലേക്ക് പ്രവേശനമില്ല.

യുഎഇ, സൗദി അറേബ്യ എന്നീ രാജ്യങ്ങളിലേക്ക് പോകാൻ ഒട്ടനവധി പ്രവാസി മലയാളികൾ കേരളത്തിൽ നിന്ന് ബഹ്റൈനിൽ എത്തുന്നുണ്ട് എന്നകാര്യം ശ്രദ്ധേയം. ബഹ്റൈനിൽ ക്വറന്റീൻ പൂർത്തിയാക്കിയ ശേഷമാണു ഇവർ മറ്റ് ഗൾഫ് നാടുകളിലേക്ക് കടക്കുന്നത്. ആ രീതിയിലുള്ള യാത്ര ഇനി ജൂൺ മൂന്നു വരെ സാധ്യമാകില്ലഎന്നത് വളരെ അധികം ശ്രദ്ധയാകർഷിക്കുന്ന തീരുമാനം.

എന്നാൽ ഇപ്പോൾ ബഹ്റൈനിൽ ക്വറന്റീനിലുള്ള പ്രവാസി മലയാളികൾക്ക് യുഎഇയിലേക്ക് കടക്കാൻ തടസം ഉണ്ടാകില്ല. സൗദി, യുഎഇ കുവൈറ്റ് ഉൾപ്പെടെയുള്ള രാജ്യങ്ങൾ ഇന്ത്യക്കാർക്ക് ഏർപ്പെടുത്തിയ പ്രവേശന വിലക്ക് എപ്പോൾ അവസാനിക്കുമെന്ന് ഇതുവരെ വ്യക്തമാക്കിയിട്ടില്ല.

അതേസമയം മറ്റൊരു തീരുമാനം കൂടി അതിവേഗത്തിൽ ആക്കാൻ ഒരുങ്ങുകയാണ് ബഹറിൻ. ബഹ്റൈനിൽ കോവിഡ് രോഗികളുടെ എണ്ണം വർധിച്ച സാഹചര്യത്തിൽ കൂടുതൽ നിയന്ത്രണങ്ങൾ ഏർപ്പെടുത്താൻ ബഹ്റൈൻ നാഷണൽ മെഡിക്കൽ ടാസ്ക് ഫോഴ്സ് തീരുമാനമായി. മേയ് 21 മുതൽ ജൂൺ മൂന്നു വരെ രാജ്യത്തെ സർക്കാർ ഓഫീസുകൾ, പള്ളികൾ, ഷോപ്പിംഗ് മാളുകൾ, തീയേറ്ററുകൾ, റസ്റ്റോറന്റുകൾ, മാർക്കറ്റ് തുടങ്ങിയ സ്ഥലങ്ങളിൽ പ്രവേശനം രണ്ടു വാക്സിനും പൂർത്തീകരിച്ചു 14 ദിവസങ്ങൾ കഴിഞ്ഞവർക്കും കോവിഡ് രോഗമുക്തി നേടിയവർക്കും മാത്രമായിരിക്കും. 18 വയസ്സിൽ താഴെയുള്ളവർക്ക് ഇവിടങ്ങളിൽ പ്രവേശനം ഉണ്ടായിരിക്കുന്നതല്ലെന്നും ടാസ്ക് ഫോഴ്സ് അധികൃതർ വാർത്ത സമ്മേളനത്തിൽ അറിയിച്ചു.