തീരദേശത്തിന് ആകാശംമുട്ടെ അഭിമാനം പകർന്നു ജെനി ജെറോം (23) തിരുവനന്തപുരത്ത് പറന്നിറങ്ങി. തിരുവനന്തപുരത്തെ തീരദേശ ഗ്രാമമായ കൊച്ചുതുറ സ്വദേശി ജെനി ജെറോം ഇന്നലെ രാത്രി 10.25 ന് ഷാർജയിൽ നിന്നു തിരുവനന്തപുരത്തേയ്ക്കു പുറപ്പെടുന്ന എയർ അറേബ്യ വിമാനമാണു പറപ്പിക്കുക. തീരദേശത്തെ ധീരപെൺകൊടിയുടെ പ്രതീകമായ ജെനിയുടെ നേട്ടം സമൂഹ മാധ്യമങ്ങളിൽ വൈറലായിരിക്കുന്നു.

കേരളത്തിലെ ഏറ്റവും പ്രായം കുറഞ്ഞ വനിതാ കൊമേഴ്സ്യൽ പൈലറ്റ് ജെനി ജെറോമിന് ആശംസകള്‍ നേര്‍ന്ന് മുൻ ആരോഗ്യമന്ത്രി കെകെ ശൈലജ. ഇത്തരം കര്‍മപഥത്തിലേയ്ക്ക് സ്ത്രീകള്‍ കടന്നുവരുന്നത് ഏറെ അഭിമാനം നല്‍കുന്ന ഒന്നാണെന്നും ജെനി ജെറോമിന് ആശംസകള്‍ നേരുന്നുവെന്നും കെകെ ശൈലജ സമൂഹമാധ്യമങ്ങളിൽ കുറിച്ചു. കോവളം കരുംകുളം കൊച്ചുതുറ സ്വദേശിനി ബിയാട്രിസിൻ്റെയും ജെറോമിൻ്റെയും മകളാണ് ജെനി ജെറോം (23).

എട്ടാം ക്ലാസിൽ പഠിക്കുമ്പോൾ മുതലാണു പൈലറ്റ് ആകണമെന്ന മോഹം മനസിൽ മൊട്ടിട്ടത്. പിതാവ് ജെറോമിനോടാണ് ഈ ആഗ്രഹം ആദ്യമായി പങ്കിട്ടത്. മകളുടെ ആശ സഫലീകരിക്കാനായി ആ പിതാവ് കൈപിടിച്ച് കൂടെ നിന്നു. പ്ലസ് ടു കഴിഞ്ഞ് ഷാർജയിലെ ആൽഫ ഏവിയേഷൻ അക്കാദമിയിൽ പൈലറ്റ് പരിശീലനത്തിനു പ്രവേശനം ലഭിച്ച ജെനിയുടെ ആഗ്രഹങ്ങൾക്ക് ചിറക് മുളച്ചുതുടങ്ങി. ആ ആത്മവിശ്വാസമാണ് ഈ യുവതിയെ ഇന്നു കടൽമക്കൾക്കു മാത്രമല്ല, കേരളക്കരയ്ക്കു തന്നെ അഭിമാനകരമായ വനിതാ പൈലറ്റാക്കിയിരിക്കുന്നത്.

കേരളത്തിലെ പ്രായം കുറഞ്ഞ വനിതാ കൊമേഴ്ഷ്യൽ പൈലറ്റ് എന്ന നേട്ടം കൂടി ജെനി ഇതോടെ സ്വന്തമാക്കും. കേരളത്തിലെ ഏറ്റവും പ്രായം കുറഞ്ഞ വനിതാ കൊമേഴ്സ്യൽ പൈലറ്റ് എന്ന നിലയ്ക്ക് തീരദേശമേഖലയിൽ നിന്നെത്തിയ ജെനി പുതുചരിത്രം കുറിക്കുകയാണെന്നും കെകെ ശൈലജ വ്യക്തമാക്കി. ഇന്നലെ ഷാര്‍ജയിൽ നിന്ന് തിരുവനന്തപുരത്തേയ്ക്ക് പുറപ്പെട്ട എയര്‍ അറേബ്യ വിമാനത്തിൻ്റെ കോ- പൈലറ്റായാണ് ജെനി ജെറോം ആദ്യമായി യാത്ര തിരിച്ചത്. ഈ സംഭവവും ജെനിയുടെ ചിത്രങ്ങളും സമൂഹമാധ്യമങ്ങളിൽ വൈറലായിരുന്നു. ഇതിനു പിന്നാലെയാണ് മുൻ ആരോഗ്യമന്ത്രിയുടെ ആശംസ.

ജെനി ജനിച്ചു വളര്‍ന്നത് മത്സ്യബന്ധനഗ്രാമമായ കൊച്ചുതുറയിലാണെങ്കിലും പിതാവ് ജെറോം ജോലി ആവശ്യത്തിനായി ഷാര്‍ജയിലേയ്ക്ക് പോയതോടെ ജെനിയും സഹോദരൻ ജെബിയും ഷാര്‍ജയിലേയ്ക്ക് താമസം മാറുകയായിരുന്നു. സ്കൂള്‍ കാലത്തു തന്നെ പൈലറ്റാകാനുള്ള ആഗ്രഹം ജെനി അറിയിച്ചിരുന്നെങ്കിലും വീട്ടുകാര്‍ ഗൗരവത്തിലെടുത്തില്ല. എന്നാൽ പ്ലസ് ടുവിനു ശേഷം ജെനി സ്വന്തം നിലയ്ക്ക് പരിശ്രമം തുടങ്ങുകയും തുടര്‍ന്ന് വീട്ടുകാര്‍ പിന്തുണ നല്‍കുകയുമായിരുന്നു. എയര്‍ അറേബ്യയുടെ ആൽഫാ ഏവിയേഷൻ അക്കാദമിയിൽ പഠനം പൂര്‍ത്തിയക്കിയ ജെനി ജെറോം പൈലറ്റ് ലൈസൻസ് നേടുകയായിരുന്നു.