സൗദിയിലേക്ക് പറക്കുന്ന പ്രവാസികളുടെ ശ്രദ്ധയ്ക്ക്... മറ്റൊരു നിർണായക തീരുമാനം എടുത്തിരിക്കുകയാണ് സൗദി... റീ എൻട്രി വിസയിൽ തിരിച്ചെത്തുന്ന വാക്സിൻ സ്വീകരിക്കാത്ത വിദേശികൾക്ക് ഇൻസ്റ്റിറ്റിയൂഷനൽ ക്വാറന്റീൻ ബാധകമാണെന്ന് ജനറൽ അതോറിറ്റി ഓഫ് സിവിൽ ഏവിയേഷൻ അറിയിച്ചിരിക്കുകയാണ്

അതുകൊണ്ടുതന്നെ പ്രവാസികൾ ഈ കാര്യം പ്രത്യേകം ശ്രദ്ധിക്കുക. വാക്സിൻ സ്വീകരിച്ച വിദേശികൾക്കൊപ്പം എത്തുന്ന വാക്സിൻ സ്വീകരിക്കാത്ത ആശ്രിതരായ പതിനെട്ട് വയസിൽ കുറവ് പ്രായമുള്ളവർക്ക് ഏഴു ദിവസം ഹോം ക്വാറന്റീൻ നിർബന്ധമാക്കിയിരിക്കുകയാണ് സൗദി. ഹോം ക്വാറന്റീനിൽ കഴിയുന്ന ആറാമത്തെ ദിവസം ഇവർ പി.സി.ആർ പരിശോധന നടത്തേണ്ടുന്ന ആവശ്യമുണ്ട്. അതേസമയം എട്ട് വയസ്സിന് താഴെയുള്ളവർ പി.സി.ആർ പരിശോധന നടത്തേണ്ടതില്ല.

വിദേശത്തുനിന്നും സൗദിയിലേക്ക് വരുന്ന വിദേശികളോടൊപ്പമുള്ള വാക്സിൻ സ്വീകരിക്കാത്ത പതിനെട്ട് വയസിനു താഴെയുള്ള ആശ്രിതർ ഏഴു ദിവസം ഇൻസ്റ്റിറ്റിയൂഷനൽ ക്വാറന്റീനിൽ കഴിയേണ്ടതുണ്ട്. ഇത്തരത്തിലുള്ളവർ സൗദിയിലെത്തി ഇരുപത്തിനാലു മണിക്കൂറിനുള്ളിലും പിന്നീട് ഏഴാമത്തെ ദിവസവും പി.സി.ആർ പരിശോധന നടത്തണം. എന്നാൽ എട്ട് വയസ്സിനു താഴെയുള്ളവർ പി.സി.ആർ പരിശോധന നടത്തേണ്ട ആവശ്യമില്ലെന്ന് ജനറൽ അതോറിറ്റി ഓഫ് സിവിൽ ഏവിയേഷൻ വ്യക്തമാക്കിയിരിക്കുകയാണ്.

മാത്രമല്ല നേരത്തെ മറ്റൊരു തീരുമാനം സൗദി കൊണ്ടിരുന്നു. ഗൾഫ് സഹകരണ കൗൺസിൽ (ജിസിസി) രാജ്യങ്ങളിലെ പൗരന്മാരും പുതിയ വിസയിൽ സൗദിയിലെത്തുന്നവരും ഓൺലൈനായി വാക്സിനേഷൻ രജിസ്ട്രേഷൻ പൂർത്തിയാക്കണമെന്ന് സൗദി പാസ്പോർട്ട് ജനറൽ ഡയറക്ടറേറ്റ് (ജവാസത്ത്)പറഞ്ഞിരുന്നു.

യാത്രക്കാരുടെ പ്രവേശന നടപടിക്രമങ്ങൾ സുഗമമാക്കുന്നതിനും വേഗത്തിലാക്കുന്നതിനും എൻട്രി പോയിന്റുകളിൽ കാത്തിരിപ്പ് കാലയളവ് കുറയ്ക്കുന്നതിനും ഓൺലൈൻ വാക്സിനേഷൻ രജിസ്ട്രേഷൻ സഹായിക്കുമെന്ന് ജവാസത്ത് വിശദമാക്കിയിരുന്നു.