ഖത്തറില്‍ കൊവിഡ് നിയന്ത്രണങ്ങളില്‍ ഇളവുകള്‍ നല്‍കുന്നതിന്റെ ആദ്യഘട്ടത്തിന് മെയ് 28 വെള്ളിയാഴ്ച തുടക്കം കുറിക്കാനിരിക്കെ, മുന്‍കരുതല്‍ നടപടികളുടെ ഭാഗമായി 1.2 ലക്ഷത്തില്‍ കൂടുതല്‍ തൊഴിലാളികള്‍ക്ക് ആരോഗ്യ മന്ത്രാലയം വാക്സിന്‍ നല്‍കി. ഖത്തറിലെ പ്രവാസി തൊഴിലാളികളോടും വ്യാപാരി സമൂഹത്തോടുമുള്ള ഖത്തറിന്റെ കരുതലിന്റെ മറ്റൊരു മാതൃകയായാണ് ഇത് വിലയിരുത്തപ്പെടുന്നത്.

നിയന്ത്രണം പിന്‍വലിക്കുമ്പോള്‍ പല ഇളവുകള്‍ക്കും വാക്സിനേഷന്‍ നിര്‍ബന്ധമാണെന്ന് വ്യവസ്ഥ ചെയ്ത സാഹചര്യത്തിലാണ് തൊഴിലാളികള്‍ക്ക് പ്രത്യേക പരിഗണന നല്‍കിയത്. അതോടൊപ്പം ജനങ്ങളുമായി കൂടുതല്‍ ഇടപഴകല്‍ ആവശ്യമായി വരുന്ന സ്ഥാപനങ്ങളിലെ ജീവനക്കാര്‍ക്ക് വാക്‌സിന്‍ എടുത്തിരിക്കണമെന്നും വ്യവസ്ഥയുണ്ട്. ഉപഭോക്താക്കളുമായി അടുത്ത് പെരുമാറുന്നവര്‍ എന്ന രീതിയില്‍ അവരുടെയും ജനങ്ങളുടെയും ആരോഗ്യ സുരക്ഷ മുന്‍നിര്‍ത്തി കൂടിയാണ് നടപടി.

കഴിഞ്ഞ ആഴ്ചകളില്‍ പ്രായപരിധി നോക്കാതെ തന്നെ അടിസ്ഥാന മേഖലയിലെ തൊഴിലാളി വിഭാഗങ്ങള്‍ക്ക് വാക്സിനേഷനില്‍ മുന്‍ഗണന നല്‍കിയാണ് ഇത്രയും പേര്‍ക്ക് വാക്‌സിന്‍ ലഭ്യമാക്കിയതെന്ന് കൊവിഡ് വാക്സിനേഷന്‍ അപ്പോയിന്‍മെന്റ് യൂനിറ്റിന് നേതൃത്വം നല്‍കുന്ന ഡോ. ഖാലിദ് അബ്ദുല്‍ നൂര്‍ പറഞ്ഞു.

തൊഴിലാളികള്‍ക്ക് സൗകര്യപ്രദമായ രീതിയില്‍ വാക്‌സിന്‍ വിതരണം ചെയ്യുന്നതിനായി പ്രത്യക വാക്‌സിനേഷന്‍ യൂനിറ്റുകള്‍ക്ക് രൂപം നല്‍കിയിരുന്നതായും അദ്ദേഹം അറിയിച്ചു. ഖത്തറില്‍ നാല് ഘട്ടങ്ങളിലായാണ് കൊവിഡ് നിയന്ത്രണങ്ങളില്‍ ഇളവുകള്‍ നല്‍കുന്നത്. അതിന്റെ ഈ മാസം 28 മുതലാണ് ആദ്യഘട്ടത്തിന് തുടക്കമാവുക. ഈ സാഹചര്യത്തിലാണ് സുരക്ഷിത തൊഴില്‍ സാഹചര്യം സൃഷ്ടിക്കുകയെന്ന ലക്ഷ്യത്തോടെ ജനങ്ങളുമായി നേരിട്ട് ഇടപഴകുകയും അടിസ്ഥാന മേഖലകളില്‍ പ്രവര്‍ത്തിക്കുകയും ചെയ്യുന്ന തൊഴിലാളികള്‍ക്ക് വാക്സിനേഷന്‍ ഊര്‍ജിതമാക്കിയതെന്നും അദ്ദേഹം പറഞ്ഞു.

ബാര്‍ബര്‍ ഷോപ്പുകള്‍, റസ്റ്റൊറന്റുകള്‍, കാറ്ററിംഗ് സ്റ്റോറുകള്‍, പലചരക്ക് കടകള്‍, ഹോട്ടലുകള്‍, ഹോസ്പിറ്റാലിറ്റി സ്ഥാപനങ്ങള്‍ തുടങ്ങിയ മേഖലകളിലെ ജീവനക്കാര്‍ക്കാണ് പ്രത്യേക പരിഗണന നല്‍കി വാക്സിന്‍ വിതരണം ചെയ്തത്. ഈ സ്ഥാപനങ്ങളിലെ വ്യക്തികള്‍ നേരിട്ട് അപ്പോയിന്‍മെന്റ് എടുക്കുന്നതിന് പകരം ബന്ധപ്പെട്ട സ്ഥാപനങ്ങളാണ് അവര്‍ക്കു വേണ്ടി ഇമെയില്‍ വഴിയോ ഫോണ്‍ വഴിയോ ആരോഗ്യ മന്ത്രാലയത്തില്‍ രജിസ്റ്റര്‍ ചെയ്യേണ്ടതെന്നും അദ്ദേഹം വ്യക്തമാക്കി.