മസ്​കത്ത്​: മെക്കുനു ചുഴലിക്കാറ്റിന്​ ശക്​തിയേറിയാതായി റിപ്പോർട്ടുകൾ. കാറ്റഗറി രണ്ട്​ വിഭാഗത്തിലാണ്​ ചുഴലിക്കാറ്റ്​ ഇപ്പോഴുള്ളതെന്ന്​ ഒമാൻ സിവിൽ ഏവിയേഷൻ പൊതു അതോറിറ്റി ട്വിറ്ററിൽ അറിയിച്ചു. കാറ്റി​ന്റെ കേന്ദ്രഭാഗത്തിന്​ 167 കിലോമീറ്റർ മുതൽ 175 കിലോമീറ്റർ വരെയാണ്​ വേഗത. ഒമാനിലെ തെക്കൻ തീരമായ ദോഫാർ ഗവർണറേറ്റിലേക്കാണ്​ കാറ്റി​​ന്റെ ദിശ.

തീരത്ത്​ നിന്ന്​ 150 കിലോമീറ്റർ അകലെയാണ്​ കാറ്റ്​ നിലവിൽ ഉള്ളതെന്ന്​ സിവിൽ ഏവിയേഷൻ പൊതു അതോരിറ്റി വെളളിയാഴ്​ച ഉച്ചക്ക്​ പന്ത്രണ്ട്​ മണിക്ക്​ പുറപ്പെടുവിച്ച മുന്നറിയിപ്പ്​ സന്ദേശത്തിൽ പറയുന്നു. ചുഴലിക്കാറ്റിന്റെ ഭാഗമായുള്ള ​പ്രധാന മേഘമേലാപ്പുകൾ തീരത്ത്​ നിന്ന്​ 40 കിലോമീറ്റർ അകലെയാണ്​ ഇപ്പോൾ ഉള്ളത്​.

അതേസമയം കാറ്റി​ന്റെ കേന്ദ്രഭാഗം ഇന്ന്​ വൈകുന്നേരം നാലുമണിക്കും രാത്രി പ​​ന്ത്രണ്ട്​ മണിക്കുമിടയിൽ തീരത്തെത്തുമെന്നും അറിയിപ്പിൽ പറയുന്നു. കാറ്റ്​ തീരത്ത്​ എത്തുന്നതോടെ 200 മുതൽ 600 മില്ലീമീറ്റർ വരെ മഴ പെയ്യാനും സാധ്യതയുണ്ട്​.

കാറ്റ്​ തീരത്തോട്​ അടുത്തതിന്റെ ഫലമായി വ്യാഴാഴ്​ച രാത്രി മുതൽ ദോഫാർ ഗവർണറേറ്റിന്റെ വിവിധ ഭാഗങ്ങളിൽ മഴ തുടരുകയാണ്​. ചുഴലിക്കാറ്റ്​ ആദ്യം കരതൊടുമെന്ന്​ കരുതുന്ന സദായിലും സമീപപ്രദേശമായ മിർബാത്തിലും സാമാന്യം ശക്​തിയോടെയുള്ള കാറ്റും മഴയും ഉണ്ട്​.

സലാല നഗരത്തിൽ വ്യാഴാഴ്​ച രാത്രി മുതൽ സാമാന്യം നല്ല പെയ്യുന്നുണ്ട്​. സലാല നഗരത്തി​​ന്റെ പലയിടത്തും വെള്ളക്കെട്ടുണ്ട്​. വാദികളും രൂപപ്പെട്ടിട്ടുണ്ട്​. സദാ, മിർബാത്ത്​, ഹാസിക്ക്​ തുടങ്ങിയ സ്​ഥലങ്ങളിൽ ചിലയിടത്ത്​ റോഡിലേക്ക്​ പാറക്കെട്ടുകളും മണ്ണും വീണിട്ടുണ്ട്​. മലമുകളിൽ നിന്നുള്ള അരുവികളും വെള്ളച്ചാട്ടങ്ങളും രൂപപ്പെട്ടിട്ടുണ്ടെന്ന്​ പ്രദേശവാസികൾ പറഞ്ഞു. കടൽ പ്രക്ഷുബ്​ധമായതിനാൽ കാറ്റ്​ തീരത്ത്​ എത്തുന്നതോടെ തിരമാലകൾ പ​ന്ത്രണ്ട്​ മീറ്റർ വരെ ഉയരുമെന്നാണ്​ മുന്നറിയിപ്പ്​.

കടൽക്ഷോഭത്ത തുടർന്നുള്ള തീരദേശ റോഡുകളിൽ ഇന്നലെ രാത്രി മുതൽ ഗതാഗതം നിരോധിച്ചിട്ടുണ്ട്​. മഴയും കടൽക്ഷോഭവും മൂലം തീരദേശ റോഡുകളിൽ പലതിലും വെള്ളമുയർന്നിട്ടുണ്ട്​. അപകട സാധ്യത കണക്കിലെടുത്ത്​ സദാ, താഖ തുടങ്ങിയ സ്​ഥലങ്ങ​ളിൽ തീരപ്രദേശത്തും താഴ്​ന്ന പ്രദേശങ്ങളിലും അപകട സാധ്യതയേറിയ മേഖലകളിലും താമസിക്കുന്നവരെ സുരക്ഷിത കേന്ദ്രങ്ങളിലേക്ക്​ മാറ്റി.