സുഡാന്റെ തലസ്ഥാനമായ ഖാര്‍ത്തൂമില്‍, ഇടക്കാല സൈനിക ഭരണകൂടത്തിനെതിരേ ജനാധിപത്യം ആവശ്യപ്പെട്ടു കൊണ്ടുള്ള സമരം കലാപമായി മാറിയപ്പോള്‍ സമാധാനം സ്ഥാപിക്കാനും കലാപകാരികളെ ഓടിക്കാനും എത്തിയ സൈന്യം 70-ല്‍ അധികം പേരെയാണ് ബലാത്സംഗം ചെയ്തത്. കലാപകാരികള്‍ക്ക് നേരെ നടത്തിയ വെടിവെയ്പ്പില്‍ 108 പേര്‍ കൊല്ലപ്പെടുകയും 700-ല്‍ അധികം പേര്‍ക്ക് പരിക്കേല്‍ക്കുകയും ചെയ്ത സുഡാനില്‍ സൈന്യം ലൈംഗിക പീഡനത്തിന് ഇരയാക്കിയത് സ്ത്രീകളെ മാത്രമായിരുന്നില്ല.

ആശയവിനിമയത്തിന് കടുത്ത നിയന്ത്രണം ഉള്ളതിനാല്‍ ബലാത്സംഗ സംഭവത്തിന്റെ കൃത്യമായ വിവരം ലഭ്യമായിട്ടില്ല. എന്നാല്‍ വാര്‍ത്തകള്‍ക്ക് ആധാരം ഡോക്ടര്‍മാരുടെ സെന്‍ട്രല്‍ കമ്മറ്റിയുടെ കണക്കുകളാണ്. ഖാര്‍ത്തൂമിലെ ആശുപത്രികളില്‍ പ്രവേശിപ്പിച്ച എഴുപതിലേറെ പേര്‍ ബലാത്സംഗം ചെയ്യപ്പെട്ടതായി ഡോക്ടര്‍മാരുടെ സെന്‍ട്രല്‍ കമ്മിറ്റി തയ്യാറാക്കിയ റിപ്പോര്‍ട്ടുകള്‍ വ്യക്തമാക്കുന്നു. ഖാര്‍ത്തൂമിലെ റോയല്‍ കെയര്‍ ആശുപത്രിയില്‍ പ്രവേശിക്കപ്പെട്ടവരില്‍ എട്ടു പേര്‍, അഞ്ച് സ്ത്രീകളും മൂന്ന് പുരുഷന്മാരും, ബലാത്സംഗം ചെയ്യപ്പെട്ടതായി ഒരു ഡോക്ടര്‍ പറഞ്ഞു. സൈനിക നടപടിയില്‍ പരിക്കേറ്റവരെ പ്രവേശിപ്പിച്ച തൊട്ടടുത്തുള്ള മറ്റൊരു ആശുപത്രിയിലും സമാനമായ കേസുകള്‍ റിപ്പോര്‍ട്ട് ചെയ്യപ്പെട്ടിട്ടുണ്ട്.

ഇതിനൊപ്പം സൈനികരുടെ ലൈംഗികാതിക്രമത്തെക്കുറിച്ചു സമൂഹമാധ്യമങ്ങളിലൂടെയും അനേകര്‍ പ്രതികരിച്ചിട്ടുണ്ട്. സൈന്യത്തിന്റെ ക്രൂരപീഡനത്തിന് ഇരയായ ഒട്ടേറെ പേര്‍ ചികിത്സ തേടിയിട്ടില്ല. മതിയായ ചികിത്സ കിട്ടില്ലെന്ന മുന്‍വിധികളും സൈന്യം പ്രതികാര നടപടിക്ക് മുതിരുമോ എന്ന ആശങ്കയും ആശുപത്രികള്‍ സ്ഥിതി ചെയ്യുന്ന നഗരങ്ങളില്‍ മതിയായ സുരക്ഷ ഇല്ലെന്നതുമാണ് കാരണമായി ചൂണ്ടിക്കാട്ടുന്നത്.

ഏകാധിപതിയായിരുന്ന പ്രസിഡന്റ് ഒമര്‍ അല്‍ ബാഷിറിനെ ജനകീയ പ്രക്ഷോപത്തിലൂടെ പുറത്താക്കിയതിനെ തുടര്‍ന്നാണ് സൈന്യം സുഡാന്റെ അധികാരം ഏറ്റെടുത്തത്. എന്നാല്‍, ഭരണമാറ്റത്തിനിടയാക്കിയ ജനകീയ പ്രക്ഷോഭത്തിന്റെ നേട്ടം സൈന്യം തട്ടിയെടുക്കാന്‍ ശ്രമിക്കുകയായിരുന്നു. അതോടെ സൈന്യത്തിനെതിരെ ജനകീയ സമരവും ശക്തമായി. മൂന്നു വര്‍ഷത്തേക്ക് സുഡാനില്‍ പുതിയ ഭരണകൂടം സ്ഥാപിക്കാനുള്ള പട്ടാളവും പ്രക്ഷോഭകരും തമ്മിലുള്ള കരാറില്‍ ഒപ്പുവയ്ക്കുന്നതില്‍ സൈന്യം നാടകീയമായി പിന്മാറിയതാണ് സ്ഥിതിഗതികള്‍ വഷളാക്കിയത്.

അറസ്റ്റും ഭീഷണിയും നിലനില്‍ക്കെ തന്നെ സുഡാനിലെ പ്രതിഷേധക്കാര്‍ ദേശവ്യാപക നിയമലംഘന സമരം തുടരുകയാണ്. നൂറിലധികം പേരുടെ മരണത്തില്‍ പ്രതിഷേധിച്ച് രംഗത്തിറങ്ങാന്‍ സുഡാനിലെ പ്രധാന പ്രതിപക്ഷമായ സുഡാനീസ് പ്രൊഫഷണല്‍സ് അസോസിയേഷന്‍ (എസ്.പി.എ) ജനങ്ങളോട് ആഹ്വാനം ചെയ്തു. ഖാര്‍ത്തൂമിലെയും അയല്‍ നഗരമായ ഓംദുര്‍മാനിലും കടകള്‍ അടഞ്ഞുതന്നെ കിടക്കുകയാണ്.