സിറിയയില് വിമത കേന്ദ്രത്തില് നടന്ന ഏറ്റുമുട്ടലില് 50 മരണം: ഖ്വാസൈര് നഗരം സൈന്യം പിടിച്ചെടുത്തു
സിറിയയില് സൈന്യവും വിമതരും തമ്മിലുണ്ടായ ഏറ്റുമുട്ടലില് അമ്പതിലധികം പേര് കൊല്ലപ്പെട്ടു. അഞ്ഞൂറോളം പേര്ക്ക് പരിക്കേറ്റതായും മാധ്യമങ്ങള് റിപ്പോര്ട്ട് ചെയ്തു. അതേസമയം ലെബനീസ് അതിര്ത്തിക്കു സമീപമുള്ള ഖ്വസൈര് നഗരം സൈന്യം തിരികെ പിടിച്ചതായും റിപ്പോര്ട്ടുകള് ഉണ്ട്. സൈന്യം നടത്തിയ ഷെല് ആക്രമണങ്ങളില് 16 വിമതപോരാളികള് ഉള്പ്പെടെ 30 പേര് കൊല്ലപ്പെട്ടു. തന്ത്രപരമായി പ്രാധാന്യമുള്ള ഖ്വസൈര് നഗരം പിടിച്ചെടുക്കാന് ഇരുവിഭാഗവും രണ്ടാഴ്ചയിലേറെയായി ഏറ്റുമുട്ടല് തുടരുകയായിരുന്നു. ലെബനനിലെ ഹിസ്ബുള് തീവ്രവാദികളുടെ പിന്തുണ സൈന്യത്തിന് ലഭിച്ചിരുന്നു.
സ്ഥാനം ഉപേക്ഷിക്കാന് തയാറല്ലെന്ന് പ്രസിഡന്റ് ബഷര് അല് അസദ് അറിയിച്ചതിന്റെ തൊട്ടടുത്ത ദിവസമാണ് ആക്രമണം രൂക്ഷമായത്. സംഭവത്തില് അറബ് ലീഗ് വ്യാഴാഴ്ച അടിയന്തരയോഗം വിളിച്ചുചേര്ത്തിട്ടുണ്ട്. അതേ സമയം റഷ്യ സിറിയക്ക് ആയുധങ്ങള് കൈമാറിയത് ശരിയായില്ലെന്നും, അത് തങ്ങള്ക്കെതിരേയും പ്രയോഗിക്കാന് സാധ്യതയുണ്ടെന്നുമുള്ള ആശങ്ക ഇസ്രായേല് പ്രകടിപ്പിച്ചു.
സിറിയയില് രണ്ടു വര്ഷത്തിലേറെയായി നടക്കുന്ന ആഭ്യന്തര കലാപത്തെത്തുടര്ന്ന് 80,000 പേര് കൊല്ലപ്പെട്ടതായി യു.എന് വ്യക്തമാക്കി. പലായനം ചെയ്ത അഭയാര്ത്ഥികളുടെ എണ്ണം 15 ലക്ഷം കവിഞ്ഞെന്നും ഐക്യരാഷ്ട്രസഭ കഴിഞ്ഞയാഴ്ച പുറത്തു വിട്ട റിപ്പോര്ട്ടില് പറയുന്നു.
https://www.facebook.com/Malayalivartha
