ആഗോള വ്യാപകമായി തന്നെ സ്ത്രീകള്‍ക്കെതിരെ പീഡന ശ്രമങ്ങള്‍ വര്‍ദ്ധിച്ച് വരുന്നതായി യു.എന്‍ റിപ്പോര്‍ട്ട്. ഇതേ കുറിച്ച് യു.എന്‍ ഉദ്യോഗസ്ഥര്‍ തയ്യാറാക്കിയ റിപ്പോര്‍ട്ട് തിങ്കളാഴ്ചയാണ് യു.എന്‍ ജനറല്‍ സെക്രട്ടറി ബാന്‍ കി മൂണ്‍ യു.എന്‍ പൊതുസഭയില്‍ അവതരിപ്പിച്ചത്. സാമൂഹിക രാഷ്ട്രീയ രംഗത്തെല്ലാം സ്ത്രീ മുന്നേറ്റം ഉണ്ടായിട്ടുണ്ടെങ്കിലും സ്ത്രീകള്‍ക്കെതിരായുള്ള അതിക്രമങ്ങള്‍ അപായകരമാം വിധം ഉയര്‍ന്ന് വരുന്നതായി റിപ്പോര്‍ട്ടില്‍ ചൂണ്ടിക്കാണിക്കുന്നു.
ലോകത്താകമാനം നടത്തിയ പഠനത്തില്‍ 35 ശതമാനം വരുന്ന സ്ത്രീകള്‍ തങ്ങള്‍ പീഡന ശ്രമത്തിന് ഇരയായിട്ടുണ്ടെന്ന് വെളിപ്പെടുത്തിയതായി റിപ്പോര്‍ട്ടില്‍ പറയുന്നു. ഇത് കൂടാതെ 18 വയസിന് താഴെ വരുന്ന പെണ്‍കുട്ടികളില്‍ പത്തിലൊന്നു പേരും ലൈംഗിക വേഴ്ചക്ക് പ്രേരിപ്പിക്കപ്പെട്ടതായും റിപ്പോര്‍ട്ടില്‍ പറയുന്നു. സ്ത്രീകളോടുള്ള അതിക്രമങ്ങളുടെ കാര്യത്തില്‍ ധനിക, ദരിദ്ര വ്യത്യാസമില്ലാതെ എല്ലാ രാജ്യങ്ങളും കുറ്റക്കാരാണ്. നിലവില്‍ 38 ശതമാനം വരുന്ന സ്ത്രീകള്‍ കൊല്ലപ്പെടുന്നത് തങ്ങളുടെ പങ്കാളികളുടെ കൈകളാലാണെന്നുള്ള ഞെട്ടിക്കുന്ന കണക്കുകളും യു.എന്‍ നിരത്തുന്നുണ്ട്.
സ്ത്രീകള്‍ക്കും കുട്ടികള്‍ക്കുമെതിരായ അതിക്രമങ്ങള്‍ കാരണം ഉണ്ടാകുന്ന സാമ്പത്തിക നഷ്ടവും വലുതാണെന്ന് സംഘടന ചൂണ്ടിക്കാണിക്കുന്നു ഏകദേശം 4 ട്രില്ല്യണ്‍ ഡോളറിന്റെ സാമ്പത്തിക നഷ്ടമാണ് ഇത്തരം വിവേചനങ്ങളിലൂടെ സാമ്പത്തിക വ്യവസ്ഥക്ക് ഉണ്ടാവുന്നതെന്നും പഠനങ്ങളെ ഉദ്ധരിച്ച് യു.എന്‍ റിപ്പോര്‍ട്ട് പറയുന്നു. നിലവില്‍ ഗാര്‍ഹിക പീഡനങ്ങള്‍ക്കെതിരെ മിക്കവാറും രാജ്യങ്ങളില്‍ നിയമങ്ങള്‍ നില നില്‍ക്കുന്നുണ്ടെങ്കിലും അവയെല്ലാം നിര്‍ബന്ധപൂര്‍വ്വം നടപ്പിലാക്കപ്പെടുന്നില്ലെന്നും നൈജീരിയ പോലുള്ള രാജ്യങ്ങളില്‍ ചില പ്രത്യേക സാഹചര്യങ്ങളില്‍ ഭാര്യമാരെ അടിക്കാന്‍ ഭര്‍ത്താക്കന്‍മാര്‍ക്ക് നിയമപരമായ അനുമതി നല്‍കപ്പെടുന്നുണ്ടെന്നും റിപ്പോര്‍ട്ടില്‍ ചൂണ്ടിക്കാണിക്കപ്പെടുന്നു. പലപ്പോഴും പീഡന ശ്രമങ്ങള്‍ റിപ്പോര്‍ട്ട് ചെയ്യപ്പെടാതെ പോവുന്നതായും ചില യൂറോപ്യന്‍ രാഷ്ട്രങ്ങളില്‍ സംഘടന നടത്തിയ പഠനങ്ങളെ ഉദ്ധരിച്ച് റിപ്പോര്‍ട്ടില്‍ പറയുന്നുണ്ട്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha