ലോകരാജ്യങ്ങളെ ആശങ്കയിലാഴ്ത്തി പടരുന്ന കോവിഡ് 19 ന്റെ (കൊറോണ) പ്രഭവകേന്ദ്രമെന്നു കരുതുന്ന ചൈനയില്‍ രോഗബാധയെത്തുടര്‍ന്നു മരിച്ചവരുടെ എണ്ണം 2,946 ആയി. പുതിയതായി 31 പേര്‍ കൂടി മരിക്കുകയും 125 പേര്‍ക്ക് രോഗം സ്ഥിരീകരിക്കുകയും ചെയ്തു. ആകെ 80,151 പേര്‍ക്കാണിപ്പോള്‍ രോഗം സ്ഥിരീകരിച്ചിട്ടുള്ളതെന്ന് രാജ്യത്തെ ഹെല്‍ത്ത് കമ്മിറ്റി അറിയിച്ചു. ലോകത്തെ 60 ഓളം രാജ്യങ്ങളില്‍ രോഗം പടരുകയാണെന്നാണു റിപ്പോര്‍ട്ടുകള്‍. മെക്‌സിക്കോ, ബലാറസ്, ലിത്വേനിയ, ന്യുസിലന്‍ഡ്, നൈജീരിയ, അസര്‍ബൈജാന്‍, ഐസ്ലന്‍ഡ്, നെതര്‍ലന്‍ഡ് എന്നിവിടങ്ങളിലും രോഗം സ്ഥിരീകരിച്ചു.
കൂടുതല്‍ പ്രദേശങ്ങളില്‍ വൈറസ് എത്തിയതിനെത്തുടര്‍ന്നു യൂറോപ്യന്‍ യൂണിയന്‍ ജാഗ്രതാ നിര്‍ദേശം നല്‍കിയിട്ടുണ്ട്. കൊറോണയെ നേരിടാന്‍ യുഎസിലെ ഫ്‌ലോറിഡ സംസ്ഥാനത്ത് ഗവര്‍ണര്‍ റോണ്‍ ഡിസാന്റിസ് ആരോഗ്യ അടിയന്തരാവസ്ഥ പ്രഖ്യാപിച്ചിരുന്നു. നേരത്തെ വാഷിംഗ്ടണ്‍ സംസ്ഥാനത്തും അടിയന്തരാവസ്ഥ പ്രഖ്യാപിച്ചിരുന്നു