കോവിഡ് പ്രതിരോധത്തിനായി റഷ്യ വികസിപ്പിച്ചെടുത്ത പുതിയ വാക്​സിൻ 'സ്​പുട്​നിക്​ വി' ഉത്​പാദനം ആരംഭിച്ചതായി ആരോഗ്യ മന്ത്രാലയത്തെ ഉദ്ധരിച്ച്​ റഷ്യൻ​ വാർത്താ ഏജൻസിയുടെ​ റിപ്പോർട്ട്​​​.

മോസ്​കോയിലെ ഗമാലിയ ഇൻസ്റ്റിറ്റ്യൂട്ട് വികസിപ്പിച്ചെടുത്ത വാക്സിന്റെ ആദ്യത്തെ ബാച്ച്​ ഉത്പാദിപ്പിച്ച്​ കഴിഞ്ഞെന്നും ഈ മാസം അവസാനത്തോടെ പുറത്തിറക്കാൻ സാധിക്കുമെന്നും റഷ്യ അറിയിച്ചെന്നാണ് വിവരം.

രണ്ട് മാസത്തോളം മനുഷ്യരിൽ പരീക്ഷിച്ച ശേഷം റെഗുലേറ്ററി അംഗീകാരം നൽകുന്ന കോവിഡ് -19 വാക്സിൻ കണ്ടെത്തിയ ആദ്യ രാജ്യമായി റഷ്യ മാറിയെന്ന്​ പ്രസിഡൻറ്​ വ്‌ളാദിമിർ പുടിൻ കഴിഞ്ഞ ദിവസം അറിയിച്ചിരുന്നു. തന്റെ പെണ്‍മക്കളില്‍ ഒരാള്‍ക്ക് വാക്‌സിന്‍ കുത്തിവച്ചതായും അന്ന് അദ്ദേഹം വ്യക്തമാക്കിയിരുന്നു.

അതേസമയം, വാക്​സിന്​ അനുമതി നൽകാനുള്ള തീരുമാനത്തിനെതിരെ വൻ വിമർശനമാണുയർന്നത്​. ഇത്​ 10 ശതമാനം മാത്രമേ വിജയിക്കുകയുള്ളൂവെന്നും സുരക്ഷക്ക്​ മുമ്പിൽ ദേശീയ അന്തസുയർത്താനുള്ള ശ്രമം ഭയപ്പെടുത്തുന്നതാണെന്നുമായിരുന്നു മോസ്​കോയിലെ ശാസ്​ത്രഞ്​ജൻമാർ അഭിപ്രായപ്പെട്ടത്​. എന്നാൽ, റഷ്യ വികസിപ്പിച്ചെടുത്ത കോവിഡ് 19 വാക്സിൻ സുരക്ഷിതമല്ലെന്ന ആരോപണം അടിസ്ഥാനരഹിതമാണെന്ന്​ ആരോഗ്യമന്ത്രി മിഖായേൽ മുറാഷ്കോ വ്യക്​തമാക്കി.