പ്രതിരോധ കോവിഡ് വാക്‌സിന്‍ സ്വീകരിച്ച് ദിവസങ്ങള്‍ക്കുള്ളില്‍ 45 വയസ്സുകാരനായ നഴ്‌സിന് വീണ്ടും രോഗം സ്ഥിരീകരിച്ചു. കാലിഫോര്‍ണിയയിലെ രണ്ട് പ്രാദേശിക ആശുപത്രികളിലായി നഴ്‌സിംഗ് സേവനമനുഷ്ഠിക്കുന്ന മാത്യു ഡബ്യു ഒരാഴ്ച്ച മുന്നെയാണ് ഫൈസര്‍ വാക്‌സിന്‍ സ്വീകരിച്ചത്. ഡിസംബര്‍ 18ന് വാക്‌സിന്‍ സ്വീകരിച്ച അനുഭവം സമൂഹ മാധ്യമത്തിലൂടെ അദ്ദേഹം തന്നെ പങ്കുവെച്ചിരുന്നു.

വാക്‌സിന്‍ എടുത്ത ശേഷം കൈ ചെറുതായി തടിച്ചുവെന്നല്ലാതെ മറ്റ് പാര്‍ശ്വഫലങ്ങളൊന്നും ഉണ്ടായില്ലെന്നും മാത്യു ഫേസ്ബുക്കില്‍ കുറിച്ചു. ഇതിന് ഒരാഴ്ച്ച പിന്നിടുമ്‌ബോഴാണ് മാത്യുവിന് വീണ്ടും കോവിഡ് സ്ഥിരീകരിച്ചതായി റിപ്പോര്‍ട്ട് പുറത്തുവരുന്നത്.
ശാരീരികാസ്വാസ്ഥ്യങ്ങള്‍ അനുഭവപ്പെട്ടതിനെ തുടര്‍ന്ന് ഇയാള്‍ ചികിത്സ തേടിയതിന്റെ ഭാഗമായാണ് വീണ്ടും കോവിഡ് ടെസ്റ്റ് നടത്തുന്നതും തുടര്‍ന്ന് രോഗ സ്ഥിരീകരണം നടത്തുന്നതും. എന്നാല്‍ ഇതില്‍ അസ്വാഭാവികതയൊന്നുമില്ലെന്നാണ് ഇദ്ദേഹത്തെ ചികില്‍സിച്ച ഡോക്ടര്‍ പറയുന്നത്. വാക്‌സിനെടുത്ത് 10 മുതല്‍ 14 ദിവസം വരെയെങ്കിലുമെടുക്കും അത് ഫലപ്രദമാകാന്‍ എന്നാണ് ഡോക്ടര്‍ റാമേഴ്‌സ് അഭിപ്രായപ്പെടുന്നത്.