കാൽനട യാത്രക്കാർ ഉൾപ്പെടെ അഞ്ച് പേരെ വാഹനമിടിപ്പിച്ച് കൊലപ്പെടുത്തിയ യുവാവ് അറസ്റ്റിലായി. ചൈനയിലെ ഡാലിയാനയിലെ ഡോങ്‌ഷാനിയ സ്വദേശിയായ ലിയു (31) എന്ന യുവാവാണ് പോലീസ് പിടിയിലായത്.

മെയ് 22 രാവിലെ പതിനൊന്ന് മണിയോടെ നടന്ന സംഭവുമായി ബന്ധപ്പെട്ട് വിശദവിവരങ്ങൾ ഈ ദിവസങ്ങളിലാണ് പുറംലോകം അറിഞ്ഞത്. അമിത വേഗതയിൽ കാർ ഓടിച്ച യുവാവ് റോഡ് മുറിച്ച് കടക്കാൻ ശ്രമിച്ച അഞ്ച് പേരെയാണ് ഇടിച്ച് കൊലപ്പെടുത്തിയത്. നാല് പേർ സംഭവസ്ഥലത്തും ഒരാൾ ആശുപത്രിയിലേക്ക് എത്തിക്കുന്നതിനിടെയുമാണ് മരണപെട്ടത്.

അഞ്ച് പേരെ ഇടിച്ച് കൊലപ്പെടുത്തി അതിവേഗത്തിൽ പാഞ്ഞ കാർ റോഡിനോട് ചേർന്ന് പാർക്ക് ചെയ്‌തിരുന്ന ലോറിയിൽ ഇടിച്ചാണ് നിന്നത്. അഞ്ച് പേർക്ക് പരിക്കേൽക്കുകയും ചെയ്‌തു. യാത്രക്കാരെ കൊലപ്പെടുത്തിയതിൻ്റെയോ കാർ ലോറിയിൽ ഇടിച്ചതിൻ്റെയോ ഞെട്ടൽ ലിയു പ്രകടിപ്പിച്ചിരുന്നില്ലെന്ന് ഓടിക്കൂടിയവരെ ഉദ്ധരിച്ച് വിദേശ മാധ്യമങ്ങൾ റിപ്പോർട്ട് ചെയ്യുന്നത്.

വലിയ ശബ്‌ദത്തിൽ കാറിൽ പാട്ട് വെച്ച യുവാവ് നൃത്തം ചെയ്‌തതായും മാധ്യമങ്ങൾ റിപ്പോർട്ട് ചെയ്യുന്നുണ്ട്. ഇതുമായി ബന്ധപ്പെട്ട ചിത്രങ്ങളും വീഡിയോ ദൃശ്യങ്ങളും പുറത്തുവന്നു. യുവാവിനെ കസ്‌റ്റഡിയിലെടുത്ത് ചോദ്യം ചെയ്യുകയാണെന്ന് പോലീസ് പറഞ്ഞു.

വിശദമായ അന്വേഷണം നടത്തുമെന്നും ആളുകളെ വാഹനമിടിപ്പിച്ച് കൊലപ്പെടുത്താൻ യുവാവിനെ പ്രേരിപ്പിച്ചത് എന്താണെന്ന് അന്വേഷിക്കുമെന്നും അധികൃതർ പറഞ്ഞു. അതേസമയം, പരിക്കേറ്റ് ചികിത്സയിൽ കഴിയുന്നവരുടെ ആരോഗ്യനില സംബന്ധിച്ച മറ്റ് വിവരങ്ങൾ ലഭിച്ചിട്ടില്ല.