അമേരിക്കയെ ഞെട്ടിച്ചു കൊണ്ട് ഓരോ ദിവസവും പലവിധ സംഭവങ്ങളും കണ്ണ് കൊണ്ട് കണ്ടാലും വിശ്വസിക്കാൻ കഴിയാത്ത തരത്തിലുള്ള അത്ഭുത പ്രതിഭാസങ്ങളും അരങ്ങേറുകയാണ്. അത്തരത്തിൽ ഒരു അവിസ്മരണീയ സംഭവത്തിന് സാക്ഷിയായിരിക്കുകയാണ് അമേരിക്കൻ ജനത.

അമേരിക്കയിൽ കഴിഞ്ഞ ദിവസം ആകാശത്തു കണ്ട വിചിത്ര പ്രതിഭാസം തുടക്കത്തിൽ ജനങ്ങളിൽ ഭീതി പരത്തുകയാണ് ചെയ്തത്. കാരണം അത്തരം ഒരു കാഴ്ച ഇന്നേവരെ അവർ നേരിട്ട് കണ്ടിട്ടുണ്ടായിരുന്നില്ല. അവതാർ, മാർവെൽ സിനിമകൾ പോലെയുള്ളവയിൽ കാണുന്ന തരത്തിലുള്ള അത്ഭുത പ്രതിഭാസമായിരുന്നു അത്. ജോർജിയ സംസ്ഥാനത്താണു ദൃശ്യം കണ്ടത്.

വളരെയധികം തിളക്കമുള്ള ഒരു ദുരൂഹ വസ്തു ആകാശത്തുകൂടി അതീവ വേഗത്തിൽ പാഞ്ഞു പോകുകയായിരുന്നു. ഇതിനെപ്പൊതിഞ്ഞ് ശക്തമായ പ്രകാശ വലയവുമുണ്ടായിരുന്നു. ഒരു വമ്പൻ ജെല്ലിഫിഷ് ആകാശത്തു കൂടി പോകുന്ന പ്രതീതിയാണ് ഈ ദൃശ്യം സൃഷ്ടിച്ചതെന്ന് ദൃസാക്ഷികൾ പറഞ്ഞു.

ആളുകൾ ഏറെ പോടിക്കുകയും പലരും ഇതിന്റെ ദൃശ്യങ്ങൾ പകർത്തി സമൂഹ മാധ്യമങ്ങളിൽ പോസ്റ്റ് ചെയ്യുകയും ചെയ്തിട്ടുണ്ട്. തുടർന്നാണ് ഇതെന്തെന്ന് കണ്ടെത്താനുള്ള ശ്രമം അധികൃതരുടെ ഭാ​ഗത്ത് നിന്നും ഉണ്ടായത്. സ്വാഭാവികമായും, അന്യഗ്രഹജീവികളുടെ വാഹനമാണ് ഇതെന്ന മട്ടിലുള്ള സിദ്ധാന്തങ്ങളൊക്കെ ഇതിനിടെ പ്രചരിച്ചിരുന്നു.

എന്നാ‍ൽ ഒടുവിൽ അന്വേഷണത്തിൽ കണ്ടെത്തിയത് ഇതിന് പിന്നിൽ ഇലേൺ മസ്ക് ആണെന്ന്. ഇതൊരു സ്പേസ് എക്സ് ഫാൽക്കൺ 9 റോക്കറ്റ് ആണെന്നാണ്. ഫ്ലോറിഡയിലെ കെന്നഡി സ്പേസ് സെന്ററിൽ നടന്ന വിക്ഷേപണത്തിൽ ആകാശത്തേക്ക് ഉയർന്ന റോക്കറ്റിനെ കണ്ടാണ് ആളുകൾ പേടിച്ചതത്രേ.

കെന്നഡി സ്പേസ് സെന്ററിൽ നിന്ന് ഓരോ വർഷവും ഒട്ടേറെ റോക്കറ്റ് വിക്ഷേപണങ്ങൾ നടക്കാറുണ്ട്. അന്നൊന്നുമുണ്ടാകാത്ത തരത്തിൽ ഒരു ദൃശ്യം എന്തുകൊണ്ട് ഇപ്പോൾ മാത്രമുണ്ടായി. ഇതിനു കാരണം റോക്കറ്റ് വിക്ഷേപണവുമായി ഉണ്ടായ ചില സാങ്കേതിക കാരണങ്ങളാണെന്ന് യൂണിവേഴ്സിറ്റി ഓഫ് ടെക്സസിലെ പ്രഫസറായ ക്രിസ് കോംബ്സ് പറയുന്നു. റോക്കറ്റിന്റെ നോസിലിന് പുറത്തും അകത്തുമുള്ള മർദ്ദവ്യതിയാനമാണ് ഇതിനു വഴിവച്ചത്.

ബഹിരാകാശത്ത് യഥാർഥത്തിൽ ജെല്ലിഫിഷ് എന്നു വിളിക്കപ്പെടുന്ന ഒരു ഘടനയുണ്ട്. ഭൂമിയിൽ നിന്നു 30 കോടി പ്രകാശവർഷം അകലെ സ്ഥിതി ചെയ്യുന്ന ആബേൽ 2877 എന്ന താരസമൂഹമാണ് ഇത്. ടെലിസ്കോപിലൂടെ ഈ നക്ഷത്രസമൂഹത്തെ നോക്കിയാൽ ഒരു വമ്പൻ ജെല്ലിഫിഷ് ആകാശത്തൂടെ പോകുന്നതായി തോന്നുമത്രേ.

സ്പേസ് എക്സിന്റെ പല റോക്കറ്റുകളും പല മേഖലകളിലും ഇത്തരത്തിൽ കണ്ടെത്തി പരിഭ്രാന്തി സൃഷ്ടിച്ചിട്ടുണ്ട്. സ്പേസ് എക്സ് സ്ഥാപകൻ ഇലോൺ മസ്കിന്റെ ഉടമസ്ഥതതയിലുള്ള കമ്പനിയായ സ്റ്റാർലിങ്ക് ഒട്ടേറെ ഉപഗ്രഹങ്ങൾ ആകാശത്തേക്കു വിട്ടിരുന്നു. ഇവയും പലപ്പോഴും ആളുകളിൽ പരിഭ്രാന്തി ഉണ്ടാക്കിയിട്ടുണ്ട്.