സാങ്കേതിക തകരാർ മൂലം വിമാനങ്ങൾ അടിയന്തര ലാൻഡിങ് നടത്താറുണ്ട്. യാത്രക്കാരുടെ ജീവൻ അപകടത്തിലാകുമെന്ന ഘട്ടം വരുമ്പോൾ തന്നെ പൈലറ്റ് ഇതിനുള്ള അനുമതി തേടും. ഇപ്പോൾ നിരവധി യാത്രക്കാരുണ്ടായിരുന്ന ഡെല്‍റ്റ എയര്‍ലൈന്‍സിന്റെ വിമാനം അടിയന്തര ലാൻഡിങ് നടത്തിയതും 'മൂക്ക് കുത്തി' വീണിരിക്കുകയാണ്. എന്നാൽ മറ്റ് അപകടമൊന്നും തന്നെ ഉണ്ടായിട്ടില്ല. അതിനാൽ വൻ ദുരന്തമാണ് ഒഴിവായത്. അടിയന്തര ലാൻഡിങിന് അനുമതി ലഭിച്ചപ്പോൾ തന്നെ യാത്രക്കാർ പരിഭ്രാന്തരായിരുന്നു .

എന്നാൽ വിമാനം ലാന്‍റ് ചെയ്യുന്നതിന് മുമ്പ് യാത്രക്കാര്‍ക്ക് മുന്‍കരുതല്‍ നിര്‍ദ്ദേശങ്ങൾ നൽകിയിരുന്നു. അതിനാൽ അർക്കും തന്നെ പരിക്കേറ്റില്ല.മുന്‍വശം നിലത്ത് കുത്തിയാണ് വിമാനം ലാൻഡ് ചെയ്തത്. മുന്‍ ലാന്‍ഡിങ് ഗിയർ തകരാറിലായ ഡെല്‍റ്റ എയര്‍ലൈന്‍സിന്റെ ബോയിങ് 717 വിമാനമാണ് നോര്‍ത്ത് കരോലിനയിലെ ഷാര്‍ലറ്റ് ഡഗ്ലസ് വിമാനത്താവളത്തില്‍ അടിയന്തര ലാന്‍ഡിങ് നടത്തിയത്. ഈ സമയം വിമാനത്തില്‍ 100 ഓളം പേർ ഉണ്ടായിരുന്നതായി ഡെയ്‍ലി മെയില്‍ റിപ്പോര്‍ട്ട് ചെയ്തു.

96 യാത്രക്കാരും രണ്ട് പൈലറ്റുമാരും മൂന്നു ജീവനക്കാരുമാണ് ഉണ്ടായിരുന്നത്. ഡെൽറ്റ ഫ്ലൈറ്റ് 1092 അറ്റ്ലാന്‍റയിൽ നിന്ന് 28ന് രാവിലെ 7.25 നാണ് പുറപ്പെട്ടത്. രാവിലെ ഷാർലറ്റ് ഡഗ്ലസ് അന്താരാഷ്ട്ര വിമാനത്താവളത്തിൽ വിമാനമിറങ്ങേണ്ടതായിരുന്നു. എന്നാല്‍, വിമാനം പറക്കുന്നതിനിടെ മുന്‍ചക്രത്തില്‍ പ്രശ്‌നമുള്ളതായി പൈലറ്റിനു വിവരം ലഭിച്ചു. തുടര്‍ന്ന് വിമാനത്താവളത്തിലെ എയര്‍ ട്രാഫിക്ക് കണ്‍ട്രോള്‍ ടവര്‍ ഇതു സ്ഥിരീകരിക്കുകയും ചെയ്തു.

എമര്‍ജന്‍സി ലാന്‍റിംങ്ങിനുള്ള അനുമതി തേടുകയായിരുന്നു. വിമാനത്തിന്‍റെ എമര്‍ജന്‍സി ലാന്‍റിംഗ് ഗിയറുകള്‍ കൃത്യമായി പ്രവര്‍ത്തിച്ചില്ല. മുന്‍ഭാഗത്തെ ലാന്‍ഡിങ് ഗീയര്‍ ഡോറുകള്‍ തുറന്നിരുന്നെങ്കിലും മുന്‍ചക്രം പുറത്തേക്കു വന്നിരുന്നില്ല. ഇതേതുടര്‍ന്ന് റെണ്‍വേയിലൂടെ തെന്നിനീങ്ങിയ വിമാനത്തിന്‍റെ മുന്‍ഭാഗം നിലത്തിടിക്കുകയായിരുന്നുവെന്നാണ് റിപ്പോര്‍ട്ടുകള്‍. ഡെൽറ്റ ഫ്ലൈറ്റ് 1092 വിമാനത്താവളത്തില്‍ ഇറങ്ങുന്നതിന്‍റെയും ഇറങ്ങിക്കഴിഞ്ഞതിന്‍റെയും നിരവധി ചിത്രങ്ങളും വീഡിയോകളും ട്വിറ്ററിലും ഇന്‍സ്റ്റാഗ്രാമിലുമടക്കമുള്ള സാമൂഹിക മാധ്യമങ്ങളില്‍ വ്യാപകമായി പ്രചരിക്കപ്പെട്ടു.

wcnctv യുടെ ഇന്‍സ്റ്റാഗ്രാം പേജില്‍ പങ്കുവച്ച വീഡിയോയില്‍ വിമാനത്താവളത്തിലേക്ക് ഇറങ്ങുന്ന വിമാനത്തിന്‍റെ ഉള്ളിലുള്ള യാത്രക്കാരെ ചിത്രീകരിച്ചു. ഈ വീഡിയോയില്‍ സ്ത്രീകളും പുരുഷന്മാരുമായ എല്ലാ യാത്രക്കാരും തങ്ങളുടെ മുന്‍സീറ്റില്‍ ഇരുകൈകളും ഉപയോഗിച്ച് പിടിച്ചിരിക്കുന്നത് കാണിച്ചു. ട്വിറ്ററില്‍ പങ്കുവയ്ക്കപ്പെട്ട ചിത്രങ്ങളില്‍ വിമാനത്തിന്‍റെ മുന്‍ഭാഗം നിലത്ത് കുത്തിനില്‍ക്കുന്നത് വ്യക്തമായും കാണാം.

തകരാറിന് കാരണമെന്തെന്നതിനെ കുറിച്ച് അന്വേഷണം ആരംഭിച്ചിട്ടുണ്ട്. ലാൻഡിംഗിന് തയ്യാറെടുക്കുമ്പോൾ ജീവനക്കാർക്ക് തകരാറിനെക്കുറിച്ച് അറിയാമായിരുന്നുവെന്ന് എയർലൈൻ അധികൃതർ സ്ഥിരീകരിച്ചു, വിമാനത്താവളത്തില്‍ ഇറങ്ങും മുമ്പ് തന്നെ ലാന്‍റിംഗ് ഗിയര്‍ പ്രവര്‍ത്തനക്ഷമമല്ലെന്ന് ജീവക്കാര്‍ക്ക് വ്യക്തമായിരുന്നു. ഇതേ തുടര്‍ന്ന് വിമാനം ആകാശത്ത് കുറച്ച് തവണ വട്ടമിട്ട് പറന്നതിന് ശേഷമാണ് വിമാനം ലാന്‍റ് ചെയ്യാന്‍ തീരുമാനിച്ചത്.'സംഭവത്തെക്കുറിച്ച് അന്വേഷിക്കുമെന്ന് ഫെഡറല്‍ ഏവിയേഷന്‍ അഡ്മിനിസ്‌ട്രേഷന്‍ അറിയിച്ചു.