വിദേശകാര്യ മന്ത്രാലയ വക്താവ് അരിന്ദം ബാഗ്ചിയെ ഐക്യരാഷ്ട്രസഭയിലും (യുഎന്‍) ജനീവയിലെ മറ്റ് അന്താരാഷ്ട്ര സംഘടനകളിലുമുള്ള ഇന്ത്യയുടെ സ്ഥിരം പ്രതിനിധിയായി നിയമിച്ചു. ജനീവയില്‍, ഇന്ത്യയിലേക്ക് മടങ്ങാന്‍ പോകുന്ന ഇന്ദ്രമണി പാണ്ഡെയുടെ പിന്‍ഗാമിയാവും ബാഗ്ചി. നേരത്തെ ക്രൊയേഷ്യയിലെ അംബാസഡറായും ശ്രീലങ്കയിലെ ഡെപ്യൂട്ടി ഹൈക്കമ്മീഷണറായും അദ്ദേഹം സേവനമനുഷ്ഠിച്ചിട്ടുണ്ട്.

1995 ബാച്ച് ഇന്ത്യന്‍ ഫോറിന്‍ സര്‍വീസ് (ഐഎഫ്എസ്) ഉദ്യോഗസ്ഥനായ ബാഗ്ചി, 2020 മാര്‍ച്ചിലാണ് വിദേശകാര്യ മന്ത്രാലയത്തിന്റെ (എംഇഎ) വക്താവായി ചുമതലയേറ്റത്. കിഴക്കന്‍ ലഡാക്ക് അതിര്‍ത്തിയിലെ സംഘര്‍ഷം, കൊവിഡ്,ന്യൂഡല്‍ഹിയുടെ ജി20 പ്രസിഡന്‍സി ഉള്‍പ്പെടെയുള്ള നിരവധി നിര്‍ണായക പ്രശ്നങ്ങളും സംഭവവികാസങ്ങളും അദ്ദേഹം സമര്‍ത്ഥമായി കൈകാര്യം ചെയ്തിട്ടുണ്ട്.

'വിദേശകാര്യ മന്ത്രാലയത്തില്‍ അഡീഷണല്‍ സെക്രട്ടറിയായ അരിന്ദം ബാഗ്ചി (IFS:1995), ജനീവയിലെ ഐക്യരാഷ്ട്രസഭയിലും മറ്റ് അന്താരാഷ്ട്ര സംഘടനകളിലും ഇന്ത്യയുടെ അടുത്ത അംബാസഡര്‍/ സ്ഥിരം പ്രതിനിധിയായി നിയമിക്കപ്പെട്ടിരിക്കുന്നു,' MEA പ്രസ്താവനയിലൂടെ അറിയിച്ചു.

പ്രധാനമന്ത്രിയുടെ ഓഫീസില്‍ ഡയറക്ടറായും ന്യൂയോര്‍ക്കിലെ യുഎന്നിലെ ഇന്ത്യയുടെ സ്ഥിരം ദൗത്യത്തിലും അദ്ദേഹം സേവനമനുഷ്ഠിച്ചിട്ടുണ്ട്. ബാഗ്ചിയുടെ പുതിയ നിയമനത്തിന്റെ പശ്ചാത്തലത്തില്‍ ജോയിന്റ് സെക്രട്ടറി (ജി 20) നാഗരാജ് നായിഡു കാക്കനൂര്‍, മൗറീഷ്യസിലെ ഹൈക്കമ്മീഷണര്‍ കെ നന്ദിനി സിംഗ്ല എന്നിവരുള്‍പ്പെടെ നാല് മുതിര്‍ന്ന നയതന്ത്രജ്ഞരെ എംഇഎ വക്താവ് സ്ഥാനത്തേക്ക് പരിഗണിക്കുന്നുണ്ടെന്നാണ് വിവരം.

ഇസ്രയേല്‍-ഹമാസ് യുദ്ധത്തില്‍ ഇന്ത്യയുമായി ബന്ധപ്പെട്ട നിലപാടുകള്‍ അദ്ദേഹം സമര്‍ഥമായി വ്യക്തമാക്കിയിരുന്നു, സ്വതന്ത്ര പലസ്തീന്‍ രാഷ്ട്രം സ്ഥാപിക്കുന്നതിനെ ഇന്ത്യ പിന്തുണയ്ക്കുന്നതായും പരമാധികാരം പുനഃസ്ഥാപിക്കുന്നതിനായി ഇരുരാഷ്ട്രങ്ങളും നേരിട്ടുള്ള ചര്‍ച്ചകള്‍ നടത്തണമെന്ന നിലപാടാണ് ഇന്ത്യ എപ്പോഴും സ്വീകരിച്ചിട്ടുള്ളതെന്നും അദ്ദേഹം പറഞ്ഞിരുന്നു.

'സ്ഥിരതയുള്ളതാണ് ഞങ്ങളുടെ നയം. സ്വതന്ത്ര പലസ്തീന്‍ രാഷ്ട്രം സ്ഥാപിക്കുന്നതിനെ ഇന്ത്യ പിന്തുണയ്ക്കും. നിശ്ചയിക്കപ്പെട്ട അതിര്‍ത്തികള്‍ക്കുള്ളില്‍ ഒരു പരമാധികാരം സ്ഥാപിക്കുന്നതിനായി ഇരു രഷ്ട്രങ്ങളും നേരിട്ടുള്ള ചര്‍ച്ചകള്‍ പുനരാരംഭിക്കണമെന്നാണ് ഇന്ത്യ എപ്പോഴും വാദിച്ചിട്ടുള്ളത്.'- ബാഗ്ചി പറഞ്ഞു.

ഇതിനിടെ ഹമാസുമായുള്ള യുദ്ധത്തില്‍ ഇസ്രയേലിന് നല്‍കിയ പിന്തുണക്ക് ഇന്ത്യന്‍ സര്‍ക്കാരിനും ജനങ്ങള്‍ക്കും നന്ദി പറഞ്ഞ് ഇന്ത്യയിലെ ഇസ്രയേല്‍ അംബാസഡര്‍ നൂര്‍ ഗിലോണ്‍ രംഗത്തെത്തിയിരുന്നു. ഇന്ത്യന്‍ സന്നദ്ധപ്രവര്‍ത്തകര്‍ക്കൊപ്പം മറ്റൊരു ഐഡിഎഫ് (ഇസ്രായേല്‍ പ്രതിരോധ സേന) ഉണ്ടാക്കാം. ഇന്ത്യയും ഇസ്രായേലും തമ്മിലുള്ള അടുപ്പം എനിക്ക് വിശദീകരിക്കാന്‍ കഴിയില്ലെന്നും അദ്ദേഹം കൂട്ടിച്ചേര്‍ത്തു.

'ഇസ്രായേലിനെ പിന്തുണക്കുകയും ആക്രമണങ്ങളെ അപലപിക്കുകയും ചെയ്ത പ്രധാനമന്ത്രി നരേന്ദ്ര മോദിയില്‍ നിന്ന് ലഭിച്ച പിന്തുണയുടെ തോത് ഞങ്ങള്‍ മറക്കില്ല', ഗിലോണ്‍ പറഞ്ഞു. ഇസ്രായേലിന് പിന്തുണയുമായി മന്ത്രിമാരില്‍ നിന്നും ഉദ്യോഗസ്ഥരില്‍ നിന്നും വ്യവസായികളില്‍ നിന്നും തനിക്ക് ഫോണ്‍ കോളുകള്‍ ലഭിച്ചതായും അദ്ദേഹം കൂട്ടിച്ചേര്‍ത്തു.