എയര്‍ബാഗിലെ തകരാറിന് പിന്നാലെ 10ലക്ഷം കാറുകള്‍ തിരികെ വിളിച്ച് ടൊയോറ്റ. ടൊയോറ്റയുടയും ലക്‌സസിന്റേയും വിവിധ മോഡല്‍ വാഹനങ്ങളാണ് തിരികെ വിളിച്ചിരിക്കുന്നത്. കൃത്യമായ രീതിയില്‍ മുന്‍ സീറ്റിലെ എയര്‍ ബാഗ് പ്രവര്‍ത്തിക്കുന്നില്ലെന്ന് പരാതി ഉയര്‍ന്നതിന് പിന്നാലെയാണ് അമേരിക്കയില്‍ 1 മില്യണ്‍ കാറുകള്‍ തിരികെ വിളിച്ചിരിക്കുന്നതെന്നാണ് പ്രമുഖ കാര്‍ നിര്‍മാതാക്കളായ ടൊയോറ്റ ബുധനാഴ്ച വിശദമാക്കിയത്.

ഒസിഎസ് സംവിധാനത്തിലുണ്ടായ സെന്‍സര്‍ തകരാറാണ് കുഴപ്പത്തിന് കാരണമെന്നാണ് വിലയിരുത്തല്‍. ഒക്യുപെന്റ് ക്ലാസിഫിക്കേഷന്‍ സിസ്റ്റമിലെ തകരാര്‍ സൃഷ്ടിക്കുന്ന ഷോര്‍ട്ട് സര്‍ക്യൂട്ടാണ് എയര്‍ ബാഗിന്റെ പ്രവര്‍ത്തനം പ്രശ്‌നത്തിലാക്കിയത്. 2020-2022 ലെ ടൊയോറ്റ , ലക്‌സസ് മോഡലുകളാണ് അമേരിക്കയില്‍ തിരികെ വിളിച്ചിട്ടുള്ളത്.

ആവലോണ്‍, ആവലോണ്‍ ഹൈബ്രിഡ് 2020-2021, കാംമ്രി, കാംമ്രി ഹൈബ്രിഡ് 2020-2021, കൊറോള 2020-2021, ഹൈലാന്‍ഡര്‍, ഹൈലാന്‍ഡര്‍ ഹൈബ്രിഡ് 2020-2021, ആര്‍എവി4, ആര്‍എവി4 ഹൈബ്രിഡ് 2020-2021, സിയന്ന ഹൈബ്രിഡ് 2021, ലെക്‌സസ്, ഇഎസ്250 2021, ഇഎസ്300എച്ച് 2020-2022, ഇഎസ്350 2020-2021, ആര്‍എക്‌സ് 350 2020-2021, ആര്‍എക്‌സ് 450 എച്ച് 2020-2021 എന്നീ വാഹനങ്ങളാണ് തിരികെ വിളിച്ചിരിക്കുന്നത്.

ടൊയോറ്റ, ലക്‌സസ് ഡീലര്‍മാര്‍ ഈ വാഹനങ്ങള്‍ സൌജന്യമായി പരിശോധിക്കുകയും ഒസിഎസ് സെന്‍സറില്‍ തകരാറുണ്ടെങ്കില്‍ പരിഹരിക്കുമെന്നും ടൊയോറ്റ വിശദമാക്കി. ഫെബ്രുവരി 2024ഓടെ കാര്‍ ഉടമകളെ വിവരം അറിയിക്കുമെന്നും ടൊയോറ്റ വെബ്‌സൈറ്റിലൂടെ വിശദമാക്കി. ഉടമകള്‍ക്ക് തങ്ങളുടെ വാഹനത്തിന് തകരാറുള്ള വിഭാഗത്തില്‍ ഉള്‍പ്പെടുന്നത് ആണോയെന്ന് അറിയാനുള്ള സംവിധാനവും വെബ്‌സൈറ്റിലൊരുക്കിയിട്ടുണ്ട്. ഈ അടുത്ത കാലത്തെ ടൊയോറ്റയുടെ ഏറ്റവും വലിയ തിരികെ വിളിക്കലാണ് ഇതെന്നാണ് വിപണിയില്‍ നിന്നുള്ള റിപ്പോര്‍ട്ടുകള്‍ വ്യക്തമാക്കുന്നത്. നവംബറിഷ് 1.9 ആര്‍എവി 4 എസ്യുവി ബാറ്ററി തകരാറിനെ തുടര്‍ന്നും ഒക്ടോബറില്‍ 751000 ടൊയോറ്റ ഹൈലാന്‍ഡര്‍ ടാബുകളിലെ തകരാര്‍ മൂലവും ടൊയോറ്റ തിരികെ വിളിച്ചിരുന്നു.