യാത്രക്കിടെ വിമാനത്തിന് തീപിടിച്ചു. ടേക്ക് ഓഫ് ചെയ്‌ത് 15 മിനിറ്റിന് ശേഷമാണ് വിമാനത്തിന്റെ വലത് എഞ്ചിന് തീപിടിച്ചത്. വ്യാഴാഴ്ച പുലർച്ചെ മലേഷ്യൻ എയർലൈൻസ് വിമാനം ഹൈദരാബാദിൽ നിന്ന് ക്വാലാലംപൂരിലേക്ക് പോകവേയാണ് സംഭവം. ഈ സമയം ജീവനക്കാരുൾപ്പെടെ 138 യാത്രക്കാരായിരുന്നു വിമാനത്തിലുണ്ടായിരുന്നത്. എഞ്ചിനിൽ തീ കണ്ടെത്തിയ ഉടൻ തന്നെ വിമാനം അടിയന്തരമായി ലാൻഡ് ചെയ്‌തതിനാൽ വൻ അപകടം ഒഴിവായി. സാങ്കേതിക തകരാർ മൂലമാണ് തീ പടർന്നതെന്നാണ് പുറത്തുവരുന്ന വിവരം.

വിമാനത്താവളത്തിൽനിന്നും പുറപ്പെട്ട് 15 മിനിറ്റിനുള്ളിൽ തന്നെ എഞ്ചിനിൽ തീപിടിച്ചു. തീപടരുന്നത് ശ്രദ്ധയിൽ പെട്ട യാത്രക്കാർ വിമാനത്തിലെ ജീവനക്കാരെ വിവരമറിയിക്കുകയായിരുന്നു. തുടർന്ന്, യാത്രക്കാർക്ക് ആവശ്യമായ മുന്നറിയിപ്പ് നൽകി ഒരു തവണ വട്ടമിട്ട് പറന്നതിന് ശേഷം വിമാനം അടിയന്തരമായി ഹൈദരാബാദ് വിമാനത്താവളത്തിൽ തന്നെ പൈലറ്റ്  തിരിച്ചിറക്കുകയായിരുന്നു.

സംഭവത്തിൽ അധികൃതർ അന്വേഷണം ആരംഭിച്ചിട്ടുണ്ട്. പൈലറ്റിന്റെ സമയോചിതമായ ഇടപെടലാണ് വലിയ അപകടം ഒഴിവാക്കിയത്. യാത്രക്കാരെയെല്ലാം സുരക്ഷിതരായി പുറത്തിറക്കിയെന്ന് വിമാനത്താവളം അധികൃതർ അറിയിച്ചു. ആർക്കും പരിക്കുകളില്ല.