രാജ്യം വോട്ട് ചെയ്തത് മാറ്റത്തിനു വേണ്ടി പടിപടിയായി രാജ്യത്തെ പുനര്നിര്മിക്കും;അധികാരം പിടിച്ചെടുത്ത് കെയ്ര് സ്റ്റാര്മാര് ആദ്യം പറഞ്ഞ വാക്കുകള്,തൊഴിലാളി കുടുംബത്തില് ജനിച്ച സ്റ്റാര്മര് തൊഴിലാളികളോടും ട്രേഡ് യൂണിയനുകളോടും ഉള്ള പ്രതിബദ്ധത പലപ്പോഴും ഊന്നിപ്പറഞ്ഞിട്ടുണ്ട്,എലിസബത്ത് രാജ്ഞി ആദരിച്ച കരുത്തുറ്റ നേതാവ്
ബ്രിട്ടീഷ് ജനത മാറ്റം ആഗ്രഹിച്ചപ്പോള് ലേബര് പാര്ട്ടിയുടെ തേരോട്ടമാണ് ഉണ്ടായത്. വോട്ട് പെട്ടിയില് നിറഞ്ഞു കെയ്ര് സ്റ്റാര്മര് പ്രധാനമന്ത്രി കസേര പിടിച്ചു. രാജ്യം വോട്ട് ചെയ്തത് മാറ്റത്തിനു വേണ്ടിയാണെന്നും പടിപടിയായി രാജ്യത്തെ പുനര്നിര്മിക്കുമെന്നും പുതിയ ബ്രിട്ടീഷ് പ്രധാനമന്ത്രി സ്റ്റാര്മര്. മാറ്റത്തിനുവേണ്ടിയുള്ള ജോലി അടിയന്തരമായി, ഇന്നുതന്നെ ആരംഭിക്കണമെന്നും അദ്ദേഹം വ്യക്തമാക്കി. സര്ക്കാരുണ്ടാക്കാന് രാജാവ് ക്ഷണിച്ചതിന് പിന്നാലെ ഡൗണിങ് സ്ട്രീറ്റിലെ അഭിസംബോധനയില് സംസാരിക്കുകയായിരുന്നു അദ്ദേഹം. പ്രധാനമന്ത്രിയായി തിരഞ്ഞെടുക്കപ്പെട്ട ശേഷം ആദ്യപ്രസംഗമായിരുന്നു ഡൗണിങ് സ്ട്രീറ്റില് നടത്തിയത്.
ഹൗസ് ഓഫ് കോമണ്സിലെ 650 സീറ്റില് 410 ലും ജയിച്ചുകയറി പ്രതിപക്ഷമായ ലേബര് പാര്ട്ടിയുടെ തേരാട്ടമാണ്. ആ തേരോട്ടത്തെ നയിച്ചത് സ്റ്റാമറും. ' ഞാന് ലേബര് പാര്ട്ടിയെ മാറ്റിയെടുത്തു. ഞാന് നിങ്ങള്ക്ക് വേണ്ടി പോരാടും. ബ്രിട്ടനെ മാറ്റും'. സ്റ്റാര്മര് മെയ് 28 ന് എക്സില് കുറിച്ചു. പറഞ്ഞത് വെറും വാക്കായിരുന്നില്ല പ്രവര്ത്തിയിലൂടെ അദ്ദേഹം അത് കാണിച്ച് കൊടുത്തു.
ഏതായാലും ഫലം വന്നപ്പോള് ബ്രിട്ടന് മാറ്റത്തിന് വേണ്ടി അതിയായി ആഗ്രഹിക്കുന്നുവെന്ന് തെളിഞ്ഞു. മുന് നേതാവ് ജെറെമി കോര്ബിന്റെ കാലത്ത് നിന്ന് ലേബര് പാര്ട്ടിക്ക് സ്റ്റാര്മര് കൊണ്ടുവന്ന പരിവര്ത്തനങ്ങളാണ് തിരഞ്ഞെടുപ്പില് പ്രതിഫലിച്ചത്. 2015 ലാണ് സ്റ്റാര്മര് എംപിയായത്. 2019 ലെ തിരഞ്ഞെടുപ്പില് പാര്ട്ടിയുടെ പരാജയത്തെ തുടര്ന്ന് ഇടതുപക്ഷക്കാരനായ കോര്ബിന് രാജി വച്ചതോടെയാണ് കെയ് ര് സ്റ്റാര്മര്ക്ക് രാശി തെളിഞ്ഞത്.
തൊഴിലാളി കുടുംബത്തില് ജനനം
1962 ല് തൊഴിലാളി കുടുംബത്തില് ജനിച്ച സ്റ്റാര്മര് തൊഴിലാളികളോടും, ട്രേഡ് യൂണിയനുകളോടും ഉള്ള തന്റെ പ്രതിബദ്ധത പലപ്പോഴും ഊന്നിപ്പറഞ്ഞിട്ടുണ്ട്. നാല് മക്കളില് ഒരാളായി ദാരിദ്ര്യത്തിന്റെ നടുവിലാണ് വളര്ന്നത്. നഴ്സായ അമ്മ രോഗങ്ങളാല് അവശയായിരുന്നു. സറെ ഗ്രാമത്തില് പണിയായുധ നിര്മ്മാണ തൊഴിലാളിയായിരുന്നു അച്ഛന്. പതിനാറാം വയസ്സില് ലേബര് പാര്ട്ടി യങ് സോഷ്യലിസ്റ്റില് ചേര്ന്ന് പ്രവര്ത്തിക്കാന് ആരംഭിച്ചു.സ്കൂള് പഠനശേഷം നിയമപഠനത്തിലേക്കാണ് സ്റ്റാര്മര് തിരിഞ്ഞത്. തന്റെ കുടുംബത്തില് നിന്ന് കോളേജില് ചേര്ന്ന് ബിരുദം നേടിയ ആദ്യത്തെ ആളായി.
മനുഷ്യാവകാശ പ്രവര്ത്തകനും അഭിഭാഷകനും
രാഷ്ട്രീയത്തില് പ്രവേശിക്കുന്നതിന് മുമ്പ് തന്നെ മനുഷ്യാവകാശ പ്രവര്ത്തകനായ അഭിഭാഷകനെന്ന് നിലയില്, പുരോഗമനയാഥാസ്ഥിതിക വിഭാഗങ്ങളുടെ കണ്ണിലെ കരടായി മാറിയിരുന്നു സ്റ്റാര്മര്. അഭിഭാഷകവൃത്തിയുടെ ആദ്യനാളുകളില്, അദ്ദേഹം വധശിക്ഷയ്ക്ക് എതിരായ പ്രവര്ത്തനങ്ങള്ക്കായി കരീബിയന് രാജ്യങ്ങളിലേക്ക് സഞ്ചരിച്ചിരുന്നു. വധശിക്ഷ തന്നെ ഭീതിപ്പെടുത്തുന്ന കാര്യമാണെന്ന് സ്റ്റാര്മര് പലപ്പോഴും പറഞ്ഞിട്ടുണ്ട്. മാക്ഡൊണാള്ഡ്സുമായി ബന്ധപ്പെട്ട അപകീര്ത്തികേസില് അദ്ദേഹം രണ്ടു പരിസ്ഥിതി വാദികള്ക്ക് വേണ്ടി കോടതിയില് ഹാജരായിരുന്നു. മാക്ഡൊണാള്ഡ്സ് പരിസ്ഥിതിക്ക് ദോഷകരമായ രീതിയില് പ്രവര്ത്തിക്കുന്നുവെന്നായിരുന്നു ആരോപണം.
എലിസബത്ത് രാജ്ഞി ആദരിച്ചു
2002ല് ക്വീന്സ് കൗണ്സലായും 2003 ല് വടക്കന് അയര്ലണ്ടിലെ പൊലിസിങ് ബോര്ഡിന്റെ മനുഷ്യാവകാശ ഉപദേഷ്ടാവായി നിയമിതനായി. 2008 മുതല് 2013വരെ പബ്ലിക് പ്രോസിക്യൂഷന്സ് ഡയറക്ടറായി സ്റ്റാര്മര് ജോലി ചെയ്തു. കൊലപാതകം ഉള്പ്പെടെയുള്ള കേസുകള് കൈകാര്യം ചെയ്യുകയും ചെയ്തു. സ്റ്റീഫന് ലോറന്സ് വധക്കേസ് ഉള്പ്പെടെ നിരവധി കേസുകളാണ് അദ്ദേഹം കൈകാര്യം ചെയ്തത്. ക്രിമിനല് നീതിന്യായത്തിന് നല്കിയ സംഭാവനകള് കണക്കിലെടുത്ത് 2014ല് ബക്കിങ്ഹാം കൊട്ടാരത്തില് വച്ച് അന്തരിച്ച എലിസബത്ത് രാജ്ഞി ആദരിക്കുകയും ചെയ്തു. അഭിഭാഷകനും മനുഷ്യാവകാശ പ്രവര്ത്തകനുമായി പ്രവര്ത്തിച്ച കാലത്തെ അനുഭവങ്ങളാണ് തന്റെ പില്ക്കാല രാഷ്ട്രീയ സമീപനങ്ങളെ സ്വാധീനിച്ചതെന്ന് അദ്ദേഹം പറഞ്ഞിട്ടുണ്ട്. ക്രൗണ് പ്രോസിക്യൂഷന് സര്വീസ് തലവനെന്ന് നിലയില് വിക്കി ലീക്ക്സ് സ്ഥാപകന് ജൂലിയന് അസാഞ്ചിന്റെ നാടുകടത്തല് വിചാരണ കേസിലെ സ്റ്റാര്മറിന്റെ പങ്ക് അധികം പുറത്തുവന്നിട്ടില്ല.
https://www.facebook.com/Malayalivartha
