പ്രധാനമന്ത്രി  നരേന്ദ്ര മോദി  വിയന്നയിൽ ഓസ്ട്രിയൻ പ്രസിഡന്റ് അലക്സാണ്ടർ വാൻ ഡെർ ബെലനെ സന്ദർശിച്ചു. മൂന്നാം തവണയും അധികാരത്തിലെത്തിയ ചരിത്രനേട്ടത്തിനു മോദിയെ പ്രസിഡന്റ് വാൻ ഡെർ ബെലൻ അഭിനന്ദിച്ചു.

ഇരുരാജ്യങ്ങളും നയതന്ത്രബന്ധത്തിന്റെ 75-ാം വാർഷികം ആഘോഷിക്കുന്ന വേളയിൽ, താൻ നടത്തുന്ന ഓസ്ട്രിയൻ സന്ദർശനം ചരിത്രപരവും സവിശേഷവുമാകുന്നുവെന്നു പ്രധാനമന്ത്രി ചൂണ്ടിക്കാട്ടി. ഇരുനേതാക്കളും ഉഭയകക്ഷി-ആഗോള വിഷയങ്ങൾ ചർച്ച ചെയ്തു.

പാരിസ്ഥിതിക സുസ്ഥിരതയെക്കുറിച്ചും ആഗോളതാപനത്തെ ചെറുക്കുന്നതിനെക്കുറിച്ചുമുള്ള ചിന്തകൾ അവർ പങ്കുവച്ചു. പുനരുൽപ്പാദക ഊർജം, പ്രത്യേകിച്ച് സൗരോർജം, ജലം, ജൈവ ഇന്ധനം തുടങ്ങിയ മേഖലകളിലെ പരസ്പരപ്രയോജനകരമായ സഹകരണ സാധ്യതകളെക്കുറിച്ച് ഇരുനേതാക്കളും ചർച്ച ചെയ്തു.