അറ്റ്‌ലാന്റിക് സമുദ്രത്തിന് മുകളില്‍ വച്ച് ദില്ലിയില്‍ നിന്ന് ന്യൂജേഴ്‌സിയിലേക്കുള്ള വിമാനത്തിന്റെ ഇന്ധനം തീര്‍ന്നു. 14 മണിക്കൂര്‍ യാത്രയ്ക്ക് ശേഷമാണ് ദില്ലിയില്‍ നിന്ന് ന്യൂജേഴ്‌സിയിലേക്കുള്ള വിമാനത്തില്‍ ഇന്ധനം തീര്‍ന്നത്. അടിയന്തരമായി വിമാനം തിരിച്ചുവിട്ടു. ഡിസംബര്‍ 11നാണ് സംഭവം. ചിക്കാഗോ ആസ്ഥാനമായി പ്രവര്‍ത്തിക്കുന്ന യുണൈറ്റഡ് എയര്‍ലൈനിന്റെ യുഎ 83 വിമാനമാണ് അപ്രതീക്ഷിതമായി ബോസ്റ്റണ്‍ വിമാനത്താവളത്തിലേക്ക് തിരിച്ച് വിടേണ്ടി വന്നത്.

അറ്റ്‌ലാന്റിക് സമുദ്രത്തിന് മുകളിലൂടെ സഞ്ചരിക്കുന്ന സമയത്താണ് ഇന്ധനക്കുറവ് പൈലറ്റിന്റെ ശ്രദ്ധയില്‍പ്പെടുന്നത്. ഇതോടെയാണ് മറ്റ് പ്രശ്‌നങ്ങള്‍ ഉണ്ടാവാതിരിക്കാന്‍ ഏറ്റവും അടുത്ത വിമാനത്താവളമായ ബോസ്റ്റണില്‍ അപ്രതീക്ഷിതമായി ഇറക്കേണ്ടി വന്നതെന്നാണ് അന്തര്‍ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നത്. ദില്ലിയില്‍ നിന്ന് രാവിലെ 8.30 ഓടെ പറന്നുയര്‍ന്ന ബോയിംഗ് 787-9 ഡ്രീം ലൈനര്‍ വിമാനത്തിലാണ് അപ്രതീക്ഷിത സംഭവങ്ങള്‍ നടന്നത്. ഫ്‌ലൈറ്റ് റഡാര്‍ 24 ലെ വിവരങ്ങളും യുഎ 83 വിമാനത്തിലുണ്ടായ ഗതി വ്യത്യാസവും വ്യക്തമാണ്.

രാവിലെ 10 മണിയോടെയാണ് ബോസ്റ്റണ്‍ വിമാനത്താവളത്തില്‍ യുണൈറ്റഡ് എയര്‍ലൈന്‍ വിമാനം സുരക്ഷിതമായി ഇറങ്ങിയത്. ഇന്ധനം നിറച്ച ശേഷം 1.12ഓടെ മൂന്ന് മണിക്കൂര്‍ വൈകിയാണ് വിമാനത്താവളത്തില്‍ നിന്ന് ടേക്ക് ഓഫ് ചെയ്ത വിമാനം നെവാര്‍ക്കില്‍ പ്രാദേശിക സമയം 2.11ഓടെയാണ് സുരക്ഷിതമായി ഇറങ്ങിയത്.

ജെന്‍എക്‌സ് എന്‍ജിനുകളില്‍ പ്രവര്‍ത്തിക്കുന്ന വിമാനത്തിന് 4.7 വര്‍ഷത്തെ പഴക്കമാണ് ഉള്ളത്. ദില്ലിയില്‍ നിന്ന് 11786 കിലോമീറ്റര്‍ ആകാശ ദൂരമാണ് ഉള്ളത്. 16 മണിക്കൂറാണ് സാധാരണഗതിയില്‍ ഇതിനായി വേണ്ടി വരുന്നത്. ഏറ്റവും ദൈര്‍ഘ്യമുള്ള ആകാശ യാത്രകളിലൊന്നാണ് ദില്ലിയില്‍ നിന്ന് അമേരിക്കയിലേക്ക് ഉള്ളത്.