ബ്രസീലിലെ റിയോ ഡി ജനെയ്‌റോയില്‍ ഒളിമ്ബിക്‌സ് തുടങ്ങാന്‍ ആഴ്ചകള്‍ മാത്രം ശേഷിക്കെ ലോകം സിക വൈറസിനെ കുറിച്ചുള്ള ആശങ്കയിലാണ്. ബ്രസീലില്‍ പടര്‍ന്നുപിടിച്ച വൈറസ് ബാധിക്കുമോ എന്ന പേടിയുള്ളതിനാല്‍ പലരും റിയോ യാത്ര വേണ്ടെന്നുവച്ചതായാണ് റിപ്പോര്‍ട്ടുകള്‍.

ബ്രിട്ടനിലെ വില്യം രാജകുമാരനും ഭാര്യ കെയ്റ്റും റിയോയിലേക്ക് പോകേണ്ടെന്ന് തീരുമാനിച്ചിട്ടുണ്ട്. വില്യമിന്റെ സഹോദരന്‍ ഹാരിയും സിക്കയെ പേടിച്ച് ബ്രസീല്‍ യാത്ര ഉപേക്ഷിച്ചെന്നാണ് റിപ്പോര്‍ട്ടുകള്‍. ജനിക്കുന്ന കുട്ടികളെ വൈറസ് ബാധിച്ചേക്കുമെന്ന ആശങ്കയാണ് ഈ രോഗത്തെ ലോകം ഇത്രമേല്‍ പേടിക്കാന്‍ കാരണം.
ബ്രസീലില്‍ സിക്ക വൈറസ് ബാധിച്ച് ആയിരക്കണക്കിന് കുട്ടികളാണ് ചെറിയ തലയും തകരാറുള്ള തലച്ചോറുമായി ജനിച്ചിട്ടുള്ളത്. ഗര്‍ഭിണികള്‍ ഒരുകാരണവശാലും ബ്രസീലിലേക്ക് യാത്ര ചെയ്യരുതെന്ന് ലോകാരോഗ്യ സംഘടന തന്നെ മുന്നറിയിപ്പ് നല്‍കിയിട്ടുണ്ട്.
മുതിര്‍ന്നവരെ സിക വൈറസ് ബാധിക്കാനിടയില്ലെങ്കിലും അതേക്കുറിച്ചുള്ള ആശങ്ക ഒഴിവാകാത്തതാണ് പലരെയും യാത്ര വേണ്ടെന്നുവെക്കാന്‍ പ്രേരിപ്പിക്കുന്നത്. മൊണാക്കോയിലെ രാജകുമാരി ഉള്‍പ്പെടെ ഒട്ടേറെ വിഐപികള്‍ ഇതിനകം ബ്രസീല്‍ യാത്ര വേണ്ടെന്നുവച്ചിട്ടുണ്ട്.
2000ലെ സിഡ്‌നി ഒളിമ്ബിക്‌സില്‍ ദക്ഷിണാഫ്രിക്കയെ പ്രതിനിധീകരിച്ച നീന്തല്‍ത്താരമാണ് മൊണാക്കോയുടെ ഷാര്‍ലിന്‍ രാജകുമാരി. അവരുടെ ഭര്‍ത്താവ് പ്രിന്‍സ് ആല്‍ബര്‍ട്ട് നിരവധി ശൈത്യകാല ഒളിമ്ബിക്‌സുകളില്‍ പങ്കെടുത്ത താരവും. ഒളിമ്ബിക് വേദികളില്‍ സ്ഥിരസാന്നിധ്യമായ ഇരുവരും ഇക്കുറി ഗെയിംസ് വീട്ടിലിരുന്ന് കാണാമെന്ന തീരുമാനത്തിലാണ്.