വിശ്വപ്രസിദ്ധമായ ലണ്ടന്‍ ബ്രിഡ്ജ് അറ്റകുറ്റപ്പണികള്‍ക്കായി അടയ്ക്കുന്നു. മൂന്നു മാസത്തേക്കാണ് ബ്രിഡ്ജ് അടച്ചിടുന്നത്. ഈ നടപടി ഹോളിവുഡിലെയും ബോളിവുഡിലെയും ഷൂട്ടിംങ് ഷെഡ്യൂളുകളെ പോലും പ്രതികൂലമായി ബാധിക്കും. മലയാളം ഉള്‍പ്പെടെയുള്ള നൂറു കണക്കിനു മറ്റു ഭാഷകളിലെയും സിനിമക്കാരുടെ ലണ്ടനിലെ ഇഷ്ടപ്പെട്ട പ്രണയ പശ്ചാത്തലങ്ങളിലൊന്നാണ് ടവര്‍ ബ്രിഡ്ജും ബ്രിഡ്ജില്‍ നിന്നുള്ള തെംസ് തീരത്തെ നഗരദൃശ്യവും. 

ഒക്ടോബര്‍ ഒന്നുമുതല്‍ ഡിസംബര്‍ 30 വരെയാണ് അടച്ചിടുന്നത്. മിനുക്കുപണികള്‍ തീര്‍ത്ത് പുത്തന്‍ ശോഭയിലാകും ജനുവരി ഒന്നിന് ഈ നഗരബിംബം ലണ്ടന്‍ നിവാസികള്‍ക്കു കാഴ്ചയുടെ പുതുവര്‍ഷ സമ്മാനമൊരുക്കുക. 

ലോകത്തിന്റെ വിവിധ ഭാഗങ്ങളില്‍നിന്നും ലണ്ടന്‍ കാണാനെത്തുന്നവരുടെ മുഖ്യ ആകര്‍ഷണങ്ങളിലൊന്നാണ് 122 വര്‍ഷം പഴക്കമുള്ള ലണ്ടന്‍ ബ്രിഡ്ജ്. ദിവസേന 21,000 വാഹനങ്ങളും 40,000 ആളുകളും യാത്രചെയ്യുന്ന ബ്രിഡ്ജ് അടയ്ക്കുന്നത് യാത്രക്കാരെ വലയ്ക്കാതിരിക്കാന്‍ ലണ്ടന്‍ ട്രാഫിക് അധികൃതര്‍ മുന്നൊരുക്കങ്ങള്‍ നടത്തിവരികയാണ്. 

പര്‍ദേശ്, ദില്‍വാലേ ദുല്‍ഹനിയ ലേ ജായേംഗേ, ഗോള്‍, ചക്‌ദേ ഇന്ത്യ, കഭി അല്‍വിദ ന കഹന, കഭി ഖുശി കഭി ഗം തുടങ്ങിയ ഹിറ്റ് ബോളിവുഡ് ചിത്രങ്ങളിലെ പ്രണയരംഗങ്ങള്‍ ലണ്ടന്‍ ബ്രിഡ്ജിന്റെ പശ്ചാത്തലത്തിലൊരുക്കിയതാണ്. 'ലണ്ടന്‍ ബ്രിഡ്ജ്' എന്ന പേരില്‍തന്നെ മലയാളത്തില്‍ സിനിമയുണ്ടായി. മലയാളത്തിലെ മറ്റു പല സിനിമകളിലും ഈ പാലത്തില്‍ ചിത്രീകരിച്ച നിരവധി രംഗങ്ങളുണ്ട്. ലണ്ടന്‍ നഗരത്തില്‍ ഇത്രയേറെ ക്യാമറക്കണ്ണുകള്‍ പതിഞ്ഞ മറ്റൊരു ബിംബം ഉണ്ടാകില്ല. ഛായാഗ്രാഹകരുടെയോ സഞ്ചാരികളുടെയോ ക്യാമറ ദൃഷ്ടിയിലാകും പകല്‍ സമയം മുഴുവന്‍ ടവര്‍ ബ്രിഡ്ജ്. 

'ലണ്ടന്‍ ബ്രിഡ്ജ് ഈസ് ഫാളിങ് ഡൗണ്‍' എന്ന നഴ്‌സറി ഗാനമാണ് ടവര്‍ ബ്രിഡ്ജിനെ വിശ്വപ്രസിദ്ധമാക്കിയ മറ്റൊരു ഘടകം. തെംസ് നദിയിലൂടെയുള്ള ഉയരം കൂടിയ കപ്പലുകളുടെ യാത്രയ്ക്കായി നെടുകെ പിളര്‍ന്ന് മുകളിലേക്ക് ഉയരുകയും കപ്പല്‍ കടന്നുപോകുമ്പോള്‍ താഴ്ന്ന് പൂര്‍വസ്ഥിതിയിലെത്തുകയും ചെയ്യുന്ന ടവര്‍ ബ്രിഡ്ജിന്റെ വിവരണമാണ് ഈ നഴ്‌സറി ഗാനം. 

ലണ്ടനില്‍ നടക്കുന്ന ദേശീയ പ്രാധാന്യമുള്ള ആഘോഷങ്ങളിലെല്ലാം ടവര്‍ ബ്രിഡ്ജ് ഉയര്‍ത്തുന്നത് പതിവാണ്. വിസ്മയകരമായ ഈ ദൃശ്യാനുഭവം സഞ്ചാരികള്‍ക്ക് ഒക്ടോബര്‍ ഒന്നുമുതല്‍ മൂന്നുമാസത്തേക്ക് അന്യമാകും.