ലോകത്തെ മികച്ച ഉന്നതവിദ്യാഭ്യാസ സ്ഥാപനങ്ങളുടെ പട്ടികയില്‍ ഇന്ത്യയ്ക്കു നേട്ടം. ഇന്ത്യയിലെ 31 ഉന്നത വിദ്യാഭ്യാസ സ്ഥാപനങ്ങളാണു ടൈംസ് ഹയര്‍ എജ്യൂക്കേഷന്‍ വേള്‍ഡ് യൂണിവേഴ്‌സിറ്റി റാങ്കിങ്‌സില്‍ ഇത്തവണ ഇടംപിടിച്ചത്. ഇന്ത്യയ്ക്ക് ഇതു റെക്കോര്‍ഡ് നേട്ടമാണ്.
ഇന്ത്യയിലെ സ്ഥാപനങ്ങളില്‍ മുന്നിലുള്ള ബാംഗ്ലൂരിലെ ഇന്ത്യന്‍ ഇന്‍സ്റ്റിറ്റിയൂട്ട് ഓഫ് സയന്‍സ് (ഐഐഎസ്‌സി) കഴിഞ്ഞ വര്‍ഷത്തെ പട്ടികയെ അപേക്ഷിച്ചു നില മെച്ചപ്പെടുത്തി. 201 മുതല്‍ 250 വരെ റാങ്ക് ലഭിച്ച സ്ഥാപനങ്ങളുടെ ഗ്രൂപ്പിലാണ് ഐഐഎസ്‌സിക്കു സ്ഥാനം.
ഐഐടി ബോംബെയ്ക്കു 351 മുതല്‍ 400 വരെ റാങ്ക് ലഭിച്ച സ്ഥാപനങ്ങളുടെ ഗ്രൂപ്പിലും ഇടം ലഭിച്ചു. 401 മുതല്‍ 500 വരെയുള്ള റാങ്ക് പട്ടികയില്‍ ഐഐടി ഡല്‍ഹി, ഐഐടി കാന്‍പുര്‍, ഐഐടി മദ്രാസ് എന്നീ സ്ഥാപനങ്ങളും 501 മുതല്‍ 600 വരെയുള്ള റാങ്ക് പട്ടികയില്‍ ഐഐടി ഖരഗ്പുര്‍, ഐഐടി റൂര്‍ക്കി എന്നീ സ്ഥാപനങ്ങളും ഉള്‍പ്പെടുന്നു. ആകെ 980 ഉന്നത വിദ്യാഭ്യാസ സ്ഥാപനങ്ങളാണു പട്ടികയിലുള്ളത്.