അശ്ലീല വീഡിയോ കാണാന്‍ സൗകര്യമുള്ള സൈറ്റുകള്‍ കാണുന്നവരില്‍ 10 വയസ്സു പ്രായം പോലുമില്ലാത്ത കുട്ടികളുടെ എണ്ണം വര്‍ദ്ധിക്കുന്നതായി റിപ്പോര്‍ട്ടുകള്‍. അത്തരം സൈറ്റുകള്‍ കാണുന്നവരില്‍ പത്തു പേരില്‍ ഒരാള്‍ ഈ പ്രായക്കാരാണ് എന്നാണ് കണ്ടെത്തിയിരിക്കുന്നത്.

18 വയസ്സില്‍ താഴെ പ്രായമുള്ളവരില്‍ അശ്ലീല സൈറ്റുകള്‍ കാണുന്നവരുടെ കണക്കെടുത്തപ്പോള്‍ അവരുടെ എണ്ണത്തിന്റെ 22 ശതമാനം പേരും 10 വയസ്സില്‍ താഴെയുള്ളവരായിരുന്നു എന്നാണ് സെക്യൂരിറ്റി ടെക്‌നോളജി കമ്പനിയായ ബിറ്റ് ഡിഫൈന്‍ഡര്‍ നടത്തിയ സര്‍വ്വേയില്‍ വെളിപ്പെടുന്നത്.

കുട്ടികളുടെ ഇന്റര്‍നെറ്റുപയോഗത്തില്‍ രക്ഷകര്‍ത്താക്കള്‍ക്ക് നിയന്ത്രണം ഏര്‍പ്പെടുത്താന്‍ സൗകര്യമുള്ള ബിറ്റ് ഡിഫന്‍ഡറിന്റെ പേരന്റല്‍ കണ്‍ട്രോള്‍ ഫീച്ചറില്‍ നിന്നു ലഭ്യമായ വിവരങ്ങള്‍ അനുസരിച്ച്  xvideos.com, xnxx.com,pornhub.com എന്നീ സൈറ്റുകളാണ് 10 വയസ്സില്‍ താഴെ പ്രായമുള്ളവര്‍ക്കിടയില്‍ കൂടുതല്‍ പ്രചാരം നേടിയ സൈറ്റുകളെന്നാണ് മനസ്സിലാക്കുന്നത്.

മിക്കവാറും എല്ലാ അശ്ലീല സൈറ്റുകളും, അത് ഉപയോഗിക്കാന്‍ ശ്രമിക്കുന്നവര്‍ 18 വയസ്സിനു മേല്‍ പ്രായമുള്ളവരാണോ എന്നു ചോദിക്കാറുണ്ടെങ്കിലും ഉപയോക്താക്കള്‍ നല്‍കുന്ന വിവരം സത്യമായതാണോ എന്നു പരിശോധിച്ചറിയാന്‍ അവര്‍ക്കു സംവിധാനങ്ങളൊന്നുമില്ല എന്നതാണ് വസ്തുത.

രക്ഷകര്‍ത്താക്കളുടെതായ മേല്‍നോട്ടമില്ലെങ്കില്‍ വളരെ ചെറിയ പ്രായത്തില്‍ തന്നെ കുട്ടികള്‍ അശ്ലീല സൈറ്റുകള്‍ കണ്ടു തുടങ്ങുമെന്ന് ബിറ്റ് ഡിഫെന്‍ഡറിന്റെ സീനിയര്‍ ഇ-ത്രെറ്റ് അനലിസ്റ്റ് ബോഗ്ഡണ്‍ ബൊട്ടോസോടു ശക്തമായി താക്കീതു ചെയ്യുന്നു.

കുട്ടികള്‍ കാണരുതെന്ന് മാതാപിതാക്കള്‍ ആഗ്രഹിക്കുന്ന സൈറ്റുകളിലേയ്ക്ക് കുട്ടികള്‍ പ്രവേശിക്കുന്നത് തടയാന്‍ പേരന്റല്‍ കണ്‍ട്രോള്‍ ടൂള്‍ പോലെയുള്ള സുരക്ഷാ സംവിധാനങ്ങള്‍ കമ്പ്യൂട്ടറില്‍ ഏര്‍പ്പെടുത്തിയാല്‍ സാധിക്കാവുന്നതേ ഉള്ളൂവെന്നും അശ്ലീല സൈറ്റുകള്‍ പ്രായപൂര്‍ത്തിയായിട്ടില്ലാത്തവരെ തടയുന്നതായി വെറുതെ കരുതപ്പെടാവുന്ന സാഹചര്യം മാത്രമുള്ള ഇന്നത്തെ സ്ഥിതിയില്‍ പേരന്റല്‍ കണ്‍ട്രോള്‍ ടൂളിന് കൂടുതല്‍ പ്രസക്തിയുണ്ടെന്നും അദ്ദേഹം പറഞ്ഞു.

ബ്രിട്ടന്റെ ഹൗസ് ഓഫ് കോമണ്‍സ് ഇപ്പോള്‍ ചര്‍ച്ച ചെയ്തു കൊണ്ടിരിക്കുന്ന ഡിജിറ്റല്‍ ഇക്കോണമി ബില്ലില്‍ കൊച്ചു കുട്ടികളെ അശ്ലീലതയില്‍ നിന്നും സംരക്ഷിച്ചു നിര്‍ത്തുന്നതിന് ആവശ്യമായ വിവിധ നടപടിക്രമങ്ങള്‍ വ്യവസ്ഥ ചെയ്തിട്ടുണ്ട്.

ഇതു സെന്‍സറിംഗിനുള്ള ശ്രമമല്ലെന്നും പ്രായപൂര്‍ത്തി എത്തിയവര്‍ നിയമം അനുശാസിക്കുന്ന രീതിയിലുള്ള അശ്ലീല രംഗങ്ങള്‍ കാണുന്നത് തടയാന്‍ ഉദ്ദേശിച്ചു കൊണ്ടുള്ളതല്ല ഈ ബില്ലെന്നും ചൂണ്ടിക്കാണിക്കപ്പെടുന്നു.