പരിശോധനയ്‌ക്കെത്തിയ പുരുഷ ഡോക്ടറുടെ മുമ്പില്‍ വെച്ച് സ്വന്തം കുഞ്ഞിനെ മുലയൂട്ടിയെന്നതിന്റ പേരില്‍ അമ്മയ്ക്കും കുഞ്ഞിനും അനുഭവിക്കേണ്ടി വന്നത് ദാരുണ മര്‍ദ്ദനം. പ്രസവിച്ച് ഏതാനും മണിക്കൂറുകള്‍ മാത്രം പിന്നിട്ട അമ്മയ്ക്കും നവജാതശിശുവിനുമണ് ഇത്തരത്തില്‍ ദുരനുഭവം ഉണ്ടായത്. ന്യൂമെക്‌സിക്കോയിലാണ് സംഭവം. രാവിലെ പെണ്‍കുഞ്ഞിനു ജന്മം നല്‍കിയ ഇയാളുടെ ഭാര്യ, പരിശോധിക്കാനെത്തിയ ഡോക്ടറുടെ മുന്നില്‍ വച്ച് പെണ്‍കുഞ്ഞിനെ മുലയൂട്ടിയതാണ് ഭര്‍ത്താവിനെ പ്രകോപിപ്പിച്ചത്. റാഫേല്‍ ഒറോസിയോ എന്നാണ് ഇയാളുടെ പേര്.

സമനില നഷ്ടപ്പെട്ടത് പോലെ ഇയാള്‍ പെരുമാറുകയായിരുന്നു. ആദ്യം ഭാര്യയുടെ മുഖത്ത് ഇടിച്ചു പരിക്കേല്‍പ്പിച്ചു. തുടര്‍ന്ന് പിഞ്ചു കുഞ്ഞിന്റെ തലയിലും ഇയാള്‍ അടിച്ചു. കുഞ്ഞിനെയും അമ്മയേയും മര്‍ദ്ദിക്കുന്നതു കണ്ട് പിടിച്ചു മാറ്റാനെത്തിയ സുരക്ഷാ ഉദ്യോഗസ്ഥനെയും ഇയാള്‍ പരിക്കേല്‍പ്പിച്ചു. മുലയൂട്ടാന്‍ ആരംഭിച്ചപ്പോള്‍ ഭാര്യയുടെ പേര് ഉറക്കെ വിളിച്ചെത്തിയ ഇയാള്‍ കഴുത്തില്‍ കുത്തിപ്പിടിക്കുകയും, തോളില്‍ പരിക്കേല്‍പ്പിക്കുകയും ചെയ്തു. ഇതിന് ശേഷം ഇയാള്‍ സുരക്ഷാ ഉദ്യോഗസ്ഥനെയും ആശുപത്രി ജീവനക്കാരെയും വെട്ടിച്ച് ഓടുകയും ചെയ്തു. ഇയാളെ പൊലീസ് തിരയുകയാണ്.