ബ്രിട്ടീഷ് പ്രധാനമന്ത്രി തെരേസാ മേ അടുത്തമാസം ഇന്ത്യ സന്ദര്‍ശിക്കും. നവംബര്‍ ഏഴ്, എട്ട് തീയതികളില്‍ ന്യൂഡല്‍ഹിയില്‍ ഇന്ത്യാ-യുകെ ടെക് ഉച്ചകോടി നടക്കുന്നുണ്ട്. ഇതിനോട് അനുബന്ധിച്ചായിരിക്കും മേയുടെ സന്ദര്‍ശനം. ഉച്ചകോടിയില്‍ മുഖ്യ പ്രഭാഷണം നിര്‍വഹിക്കുന്നത് ബ്രിട്ടനിലെ യൂണിവേഴ്‌സിറ്റീസ് വകുപ്പു മന്ത്രി ജോ ജോണ്‍സനാണ്.

ബ്രെക്‌സിറ്റ് വോട്ടിനെത്തുടര്‍ന്ന് ഇയുവിനു പുറത്തുള്ള രാജ്യങ്ങളുമായി സ്വതന്ത്ര വ്യാപാരക്കരാറുണ്ടാക്കാന്‍ ബ്രിട്ടന്‍ ശ്രമിക്കുകയാണ്. ഇക്കാര്യത്തില്‍ ഇന്ത്യക്കു മുന്തിയ പരിഗണനയാണു മേ നല്‍കുന്നത്. മേയുടെ ന്യൂഡല്‍ഹി സന്ദര്‍ശനവേളയില്‍ നടത്തുന്ന ഉഭയകക്ഷി ചര്‍ച്ചകളില്‍ വാണിജ്യം മുഖ്യവിഷയമാവുമെന്നു ചൂണ്ടിക്കാണിക്കപ്പെടുന്നു.