അമേരിക്കന്‍ പ്രസിഡന്റ് സ്ഥാനത്തേക്ക് മത്സരിച്ചു വിജയിച്ച ഡൊണാള്‍ഡ് ട്രംപിന്റെ കാബിനറ്റില്‍ സുപ്രധാന പദവിയായ സ്റ്റേറ്റ് സെക്രട്ടറി സ്ഥാനത്തേയ്ക്ക് ഇന്ത്യന്‍ വംശജയും സൗത്ത് കരോലിന ഗവര്‍ണറുമായ നിക്കി ഹാലിയെ പരിഗണിക്കുന്നു. ഭരണച്ചുമതലയിലേക്കു പരിഗണിക്കുന്നവരുടെ പട്ടികയില്‍ നിക്കി ഹാലിയുടെ പേരുമുണ്ട്. ഇക്കാര്യത്തില്‍ അന്തിമ തീരുമാനമായിട്ടില്ല.

വരും ദിവസങ്ങളില്‍ ട്രംപുമായി നിക്കി കൂടിക്കാഴ്ച നടത്തുന്നുണ്ട്. നിക്കിയുടെ കാര്യത്തില്‍ ട്രംപിന്റെ അനുകൂലി വൃന്ദത്തില്‍ ചിലര്‍ക്ക് എതിര്‍പ്പുണ്ട്.

ഫ്‌ലോറിഡ സെനറ്ററായിരുന്ന മാര്‍കോ റൂബിയോയെയാണ് പ്രൈമറിയില്‍ നിക്കി ഹാലി പിന്തുണച്ചിരുന്നത്. റൂബിയോ മത്സരത്തില്‍ പിന്നാക്കം പോയപ്പോഴാണ് ട്രംപിന് പൂര്‍ണ പിന്തുണയുമായി നിക്കി ഹാലി രംഗത്തു വന്നത്.

ഇത് ട്രംപിന്റെ അടുക്കള ക്യാബിനറ്റിലെ ചിലര്‍ അയോഗ്യതയായി പറയുന്നുണ്ട്. കാബിനറ്റ് സ്ഥാനങ്ങളില്‍ ആരൊക്കെ ഉള്‍പ്പെടുമെന്ന് ട്രംപും അദ്ദേഹത്തിന്റെ അടുപ്പക്കാരും തീരുമാനിച്ചിട്ടില്ല.
സൗത്ത് കരോലിനയുടെ ആദ്യ വനിത ഗവര്‍ണറായ നിക്കിയെ ഈ സ്ഥാനത്ത് അല്ലെങ്കില്‍ മറ്റേതെങ്കിലും പദവിയിലേക്കു പരിഗണിക്കാനും സാദ്ധ്യതയുണ്ട്.