മനുഷ്യസ്‌നേഹം ഇന്ന് നഷ്ടപ്പെടുമ്പോള്‍ അവ മൃഗങ്ങളില്‍ വളരെ കൂടുതലാണെന്ന് തെളിയിക്കുന്ന വീഡിയോ. വണ്ടി ഇടിച്ച് മരിച്ചെന്ന് കരുതിയ കാട്ടുപോത്തിനെ മറ്റൊരു കാട്ടുപോത്ത് കഷ്ടപ്പെട്ട് എണീപ്പിക്കുന്ന വീഡിയോ ആണ് ഈ ആത്മാര്‍ത്ഥ സ്‌നേഹം വെളിപ്പെടുത്തുന്നത്. ഇത് കാണുമ്പോള്‍ മനുഷ്യവര്‍ഗത്തില്‍ ഇത്രയും സ്‌നേഹമുള്ള രണ്ട് കൂട്ടുകാര്‍ ഉണ്ടാവുമോയെന്ന് തോന്നിയാല്‍ അത്ഭുതപ്പെടേണ്ടതില്ല.
സൗത്ത് ആഫ്രിക്കയിലെ ബ്രാഡ്‌ലെ ബല്ലാന്‍ടൈനില്‍ നിന്നാണീ വീഡിയോ പകര്‍ത്തിയിരിക്കുന്നത്. മാര്‍ലോത്ത് പാര്‍ക്കിലെ ഒലിഫന്റ്‌സ് സ്ട്രീറ്റിന് സമീപമുള്ള റോഡരികിലാണീ കാട്ടുപോത്ത് വണ്ടിയിടിച്ച് കിടന്നിരുന്നത്. ക്രുഗെര്‍ നാഷണല്‍ പാര്‍ക്കിന് തൊട്ട് പുറത്താണീ സ്ഥലം.
വണ്ടി തട്ടിയതിനെ തുടര്‍ന്ന് ചത്ത പോലെ കിടന്നിരുന്ന തന്റെ കൂട്ടുകാരനെ കണ്ടപ്പോള്‍ അവന് ജീവനുണ്ടെന്നും താന്‍ ശ്രമിച്ചാല്‍ അവന്‍ എഴുന്നേല്‍ക്കുമെന്നുമാണ് മറ്റേ കാട്ടുപോത്ത് പ്രതീക്ഷിച്ചിരുന്നത്. തുടര്‍ന്ന് അതിന് വേണ്ടിയുള്ള ശ്രമം അവന്‍ ആരംഭിക്കുകയും ചെയ്തിരുന്നു.
തന്റെ കൊമ്പുകള്‍ ഉപയോഗിച്ചാണ് അവന്‍ കൂട്ടുകാരനെ എഴുന്നേല്‍പ്പിക്കാന്‍ ശ്രമിക്കുന്നത്. ഒരു വേള തന്റെ ശ്രമത്തില്‍ നിരാശനായയ അവന്‍ കൂട്ടുകാരനെ മറിച്ചിട്ട് എഴുന്നേല്‍പ്പിക്കാന്‍ വരെ ശ്രമിക്കുന്നതായി വീഡിയോയില്‍ കാണാം. ഇത്തരത്തില്‍ കുറച്ച് മിനുറ്റുകള്‍ പലതരത്തില്‍ ശ്രമിച്ചതിനെ തുടര്‍ന്ന് നിലത്ത് കിടന്നിരുന്ന കാട്ട് പോത്ത് അവിശ്വസനീയമായ രീതിയില്‍ ചാടി എഴുന്നേല്‍ക്കുന്നതും വീഡിയോയില്‍ കാണാം. തുടര്‍ന്ന് ഇരുവരും ഒരുമിച്ച് കുതിച്ചോടുകയാണ് ചെയ്യുന്നത്.
യൂട്യൂബ് ചാനലിലെ വൈല്‍ഡ് ലൈഫ് ഫൂട്ടേജിലുള്ള ക്രുഗെര്‍ സൈറ്റിങ്‌സിലാണീ വീഡിയോ റിലീസ് ചെയ്തിരിക്കുന്നത്. ഇന്നലെ റിലീസ് ചെയ്ത ഈ വീഡിയോ ഇതുവരെയായി 31,000 പേരാണ് കണ്ടിരിക്കുന്നത്. ജോലി സ്ഥലത്ത് നിന്നും ലഞ്ച് കഴിഞ്ഞ് വീട്ടില്‍ നിന്നും വരുന്നതിനിടയില്‍ ബ്രാഡ്‌ലെ എന്നയാളാണീ അപൂര്‍ വീഡിയോ പകര്‍ത്തിയിരിക്കുന്നത്.