ഡീസല് വാഹനങ്ങള് ലണ്ടനിലും നിരോധിക്കണമെന്ന് ആരോഗ്യരംഗത്തെ വിദഗ്ധര്
അനുദിനം വര്ധിച്ചുവരുന്ന വായു മലിനീകരണം തടയാന് ലണ്ടന് നഗരത്തില് ഡീസല് വാഹനങ്ങള് നിരോധിക്കണമെന്നു ഡോക്ടര്മാരും മെഡിക്കല് വിദ്യാര്ഥികളും. ഡീസല് വാഹനനിരോധനം ആവശ്യപ്പെട്ടു കഴിഞ്ഞദിവസം നഗരത്തില് പ്രതിഷേധപ്രകടനം നടത്തിയ ഡോക്ടര്മാരുടെയും നഴ്സുമാരുടെയും മെഡിക്കല് വിദ്യാര്ഥികളുടെയും ആരോഗ്യമേഖലയിലെ മറ്റു ജീവനക്കാരുടെയും സംഘം മേയര് സാദിഖ് ഖാന് ഇതുസംബന്ധിച്ച നിവേദനവും നല്കി.
വായു മലിനീകരണം മൂലമുണ്ടാകുന്ന രോഗങ്ങളാല് വര്ഷംതോറും 9,400 ലണ്ടന് നഗരവാസികള് മരണപ്പെടുന്നുണ്ടെന്നാണു ഡോക്ടര്മാരുടെ അവകാശവാദം. ഇതു കുറയ്ക്കാനും നഗരവാസികളുടെ ആരോഗ്യം സംരക്ഷിക്കാനും നിരോധനം ഉള്പ്പെടെയുള്ള കടുത്ത നടപടി അത്യന്താപേക്ഷിതമാണെന്നു ഡോക്ടര്മാരുടെ നേതൃത്വത്തിലുള്ള പ്രതിഷേധക്കാരുടെ കൂട്ടായ്മ ചൂണ്ടിക്കാട്ടുന്നു.
പാരിസ്, മാന്ഡ്രിഡ്, ഏതന്സ്, മെക്സിക്കോ സിറ്റി തുടങ്ങിയ നഗരങ്ങള് 2025 ആകുമ്ബോഴേക്കും ഡീസല് വാഹനങ്ങള് നിരോധിക്കാനുള്ള തീരുമാനമെടുത്തു നടപടികള് ആരംഭിച്ചുകഴിഞ്ഞു. ഈ പാത പിന്തുടര്ന്നു ലണ്ടന് നഗരവും ഡീസല് വാഹനങ്ങള്ക്കു നിയന്ത്രണവും ഭാവിയില് നിരോധനവും ഏര്പ്പെടുത്തണമെന്നാണ് ആരോഗ്യമേഖലയിലെ വിദഗ്ധരടങ്ങുന്ന പ്രതിഷേധക്കാരുടെ ആവശ്യം.
എന്നാല് തികച്ചും അപ്രായോഗികമായ നിര്ദേശമാണിതെന്നും ഇത്തരം നിരോധനങ്ങള് വന് തിരിച്ചടിയുണ്ടാക്കുമെന്നുമാണ് ഈ നിര്ദേശത്തെ എതിര്ക്കുന്നവരുടെ വാദം. 2018 ആകുമ്ബോഴേക്കും നഗരത്തില് ഡീസല് വാഹനങ്ങളുടെ ഉപയോഗം ഒഴിവാക്കണമെന്ന അഭിപ്രായക്കാരനാണ് മേയര് സാദിഖ് ഖാന്. എന്നാല് ഇത്തരമൊരു നിരോധനം ഏര്പ്പെടുത്തുന്നതിനുള്ള നിയമപരമായ അധികാരങ്ങള് മേയര്ക്കില്ല. പ്രതിഷേധ പ്രകടനങ്ങളുടെ പശ്ചാത്തലത്തില് സര്ക്കാരിനു മുന്നില് ഔദ്യോഗികമായി ഈ നിര്ദേശം സമര്പ്പിക്കാനൊരുങ്ങുകയാണു മേയറും കൗണ്സിലും. ഇതിനകംതന്നെ കൂടുതല് മലിനീകരണം ഉണ്ടാക്കുന്ന പഴക്കമേറിയ വാഹനങ്ങള് നഗരത്തില് ഉപയോഗിക്കുന്നതിനു മേയര് നിയന്ത്രണം ഏര്പ്പെടുത്തിയിട്ടുണ്ട്. ഒരുവര്ഷത്തിനുള്ളില് നഗരത്തിലോടുന്ന ഡീസല് ബസുകളെല്ലാം ഒഴിവാക്കാനും തീരുമാനിച്ചു. എന്നാല് ഡീസല്വാഹന നിരോധനം ഉള്പ്പെടെയുള്ള കടുത്ത നടപടികള്ക്കു സര്ക്കാര്തന്നെ തീരുമാനം എടുക്കേണ്ടതുണ്ട്.
നഗരത്തില് സര്വീസിനായി ഉപയോഗിക്കുന്ന പുതിയ ബസുകളെല്ലാം ഭാവിയില് ബാറ്ററികൊണ്ട് ഓടുന്നതോ ഹൈഡ്രജന് ഇന്ധനമായി ഉപയോഗിക്കുന്നതോ ആയിരിക്കുമെന്നു മേയര് വ്യക്തമാക്കിയിട്ടുണ്ട്. നവംബര് 30ന് നഗരത്തിലെ ആദ്യ ഹൈഡ്രജന് ബസ് സര്വീസ് ആരംഭിച്ചുകഴിഞ്ഞു. 2020 ആകുമ്ബോഴേക്കും ബസുകളില്നിന്നും നഗരത്തിനു മലിനീകരണ ഭീഷണിയേ ഉണ്ടാകില്ലെന്നാണു മേയറുടെ അവകാശവാദം.
ന്യൂയോര്ക്ക്, ലോസ് ഏഞ്ചല്സ്, സാന്ഫ്രാന്സിസ്കോ, ആംസ്റ്റര്ഡാം, കോപ്പന്ഹേഗന്, തുടങ്ങിയ വന് നഗരങ്ങളെല്ലാം ഡീസല് ബസുകളെ പൂര്ണമായും ഒഴിവാക്കാനുള്ള നടപടികള് ആരംഭിച്ചിട്ടുണ്ട്. ഈ പാത പിന്തുടര്ന്നാണ് ലണ്ടന് നഗരവും വായു മലിനീകരണമുണ്ടാക്കാത്ത ഇലക്ട്രിക്-ഹൈഡ്രജന് ബസുകളിലേക്കു തിരിയുന്നത്.
https://www.facebook.com/Malayalivartha
