ടോം ഉഴുന്നാലില് മാര്പ്പാപ്പയുമായി കൂടിക്കാഴ്ച നടത്തി, ഭീകരരുടെ തടങ്കലിലായിരുന്ന സമയത്ത് അവര് തന്നെ ഉപദ്രവിച്ചിട്ടില്ല
ഫാദര് ടോം ഉഴുന്നാലില് വത്തിക്കാനില് ഫ്രാന്സിസ് മാര്പ്പാപ്പയുമായി കൂടിക്കാഴ്ച നടത്തി. ബുധനാഴ്ച വൈകിട്ട് ആറിനായിരുന്നു മാര്പ്പാപ്പയുമായുള്ള കൂടിക്കാഴ്ചയെന്ന് സലേഷ്യന് ന്യൂസ് ഏജന്സി പത്രക്കുറിപ്പില് അറിയിച്ചു. ഇപ്പോള് വത്തിക്കാനിലുള്ള ഫാദര് കൂടുതല് ചികിത്സയ്ക്കായി കുറച്ച് ദിവസം ഇവിടെ തങ്ങും. അതിന് ശേഷം അദ്ദേഹം നാട്ടിലേക്ക് തിരിച്ചെത്തുമെന്നാണ് വിവരം.
അതേസമയം, ഭീകരരുടെ തടങ്കലിലായിരുന്ന സമയത്ത് അവര് തന്നെ ഉപദ്രവിച്ചിട്ടില്ലെന്നും നല്ലരീതിയിലാണ് പെരുമാറിയതെന്നും ഫാദര് പറഞ്ഞു. തട്ടിക്കൊണ്ട് പോയ ഭീകരര് മൂന്ന് തവണ തന്നെ മറ്റ് സ്ഥലങ്ങളിലേക്ക് മാറ്റി. ശാരീരികാവസ്ഥ മോശമായതിനാല് പ്രമേഹത്തിനുള്ള മരുന്ന് നല്കിയിരുന്നു. അവര് ഇംഗ്ലീഷും അറബിയുമാണ് സംസാരിച്ചതെന്നും ഫാദര് വ്യക്തമാക്കി. തന്നെ രക്ഷിക്കാന് നടത്തിയ ശ്രമങ്ങള്ക്ക് പ്രധാനമന്ത്രി നരേന്ദ്ര മോഡിയോടും കേന്ദ്രസര്ക്കാരിനോടും നന്ദിയുണ്ടെന്ന് അദ്ദേഹം ഇന്ന് വിദേശകാര്യ മന്ത്രി സുഷമാ സ്വരാജിനോട് പറഞ്ഞിരുന്നു.
ഭീകരരുടെ തടവില് നിന്നും രക്ഷിച്ച ഉഴുന്നാലിനെ കഴിഞ്ഞ ദിവസം പുലര്ച്ചെയാണ് ഒമാനിലെ മസ്കറ്റില് എത്തിച്ചത്. യെമനില് തീവ്രവാദികള് ബന്ദികളാക്കിയ വിദേശ പൗരന്മാരെ മോചിപ്പിക്കാന് ഒമാന് സജീവമായ ഇടപെടലാണ് നടത്തിവന്നത്. ആ ഇടപെടലിന്റെ ഫലമായാണ് ഫാദര് ടോം അടക്കമുള്ളവര് മോചിതരായത്.
https://www.facebook.com/Malayalivartha
