സിംഗപ്പൂരില്‍ കാശുള്ള എല്ലാവര്‍ക്കും പോയി കാറു വാങ്ങാന്‍ പറ്റില്ലായിരുന്നു. ആദ്യം തന്നെ കാറ് വാങ്ങാനുള്ള അവകാശം വാങ്ങണം (Certificate of Entitlement, CoE). അതൊരു മാസത്തില്‍ ഒരു കൃത്യം എണ്ണം മാത്രമേ സര്‍ക്കാര്‍ വില്പനക്ക് വെക്കൂ. കാശുള്ളവര്‍ക്ക് ലേലം ചെയ്യാം. അങ്ങനെ ഒരു CoE  കിട്ടാന്‍ ചിലപ്പോള്‍ മുപ്പതോ അമ്പതോ ലക്ഷം രൂപ ചിലവാകും.

കാറിന്റെ വില പലപ്പോഴും അതില്‍ താഴയേ വരൂ. ഈ CoE തന്നെ പത്തു വര്ഷത്തേക്കേ സാധുതയുള്ളൂ. അത് കഴിഞ്ഞാല്‍ പിന്നെ വീണ്ടും തുടങ്ങണം.ഈ കിട്ടുന്ന പണത്തിന് സര്‍ക്കാരിന് ഒരു ചിലവും ഇല്ലല്ലോ. അത് കൊണ്ടുതന്നെ അത് മുഴുവന്‍ പൊതുഗതാഗതം നന്നാക്കാന്‍ ഉപയോഗിക്കും.റോഡും, മെട്രോയും ഒക്കെയായി സിംഗപ്പൂരില്‍ ശരിക്കും സ്വകാര്യ വാഹനങ്ങളുടെ ആവശ്യം തന്നെ ഇല്ല.

ഇപ്പോള്‍ അവര്‍ ഒരു പടി കൂടിക്കടന്ന് സ്വകാര്യവാഹനങ്ങള്‍ പൂര്‍ണ്ണമായി നിയന്ത്രിക്കാന്‍ പോകുന്നു. വായു മലിനീകരണം കൊണ്ട് വീര്‍പ്പു മുട്ടുന്ന ഡല്‍ഹിയും ട്രാഫിക്ക് ജാം കൊണ്ട് ബുദ്ധി മുട്ടുന്ന ബാങ്കളൂരും റോഡ് കവിഞ്ഞു വാഹനങ്ങള്‍ വന്ന് വര്‍ഷാവര്‍ഷം ആയിരങ്ങളെ റോഡില്‍ കൊന്നൊടുക്കുന്ന കേരളവും ഒക്കെ ഇടക്കൊക്കെ സിംഗപ്പൂരിലേക്ക് ഒന്ന് നോക്കണം.

ചുമ്മാതല്ല അവിടെ ബാംഗളൂരിലെ പോലെ ട്രാഫിക്ക് ജാം കാണാത്തതും ഡല്‍ഹിയിലെ പോലെ വമലിനീകരണം ഇല്ലാത്തതും.ഒരു വര്‍ഷത്തില്‍ പുതിയതായി വരുന്ന വാഹനങ്ങളുടെ എണ്ണം അടുത്ത അഞ്ചു വര്‍ഷം കൊണ്ട് വര്‍ഷത്തില്‍ ഇരുപത് ശതമാനം വച്ച് കുറക്കണം. പുതിയ വാഹനമിറക്കാനുള്ള അവകാശം ലേലം ചെയ്യണം. അങ്ങനെ കിട്ടുന്ന തുക പൊതുഗതാഗതം നന്നാക്കാന്‍ ഉപയോഗിക്കണം.