ലോകം പോകുന്ന പോക്കേ. സ്വന്തം മകനെയും മകളെയും അമ്മ വിവാഹം ചെയ്ത സംഭവത്തില്‍ 26കാരിയായ മകള്‍ക്ക് കോടതി 10 വര്‍ഷം തടവ് ശിക്ഷ വിധിച്ചു. എന്നാല്‍ ശിക്ഷ അനുഭവിക്കുന്നത് 10 വര്‍ഷത്തെ നല്ല നടപ്പായി കോടതി ചുരുക്കി. അമ്മയ്‌ക്കെതിരായ വിചാരണ ജനുവരിയില്‍ ആരംഭിക്കും. യുഎസിലെ ഒക്ലഹോമയിലാണ് ഈ അപൂര്‍വ സംഭവം അരങ്ങേറിയത്.

വിവാഹം റദ്ദാക്കണമെന്നാവശ്യപ്പെട്ട് കഴിഞ്ഞ സെപ്റ്റംബറില്‍ മകള്‍ മിസ്റ്റി കോടതിയെ സമീപിച്ചതോടെയാണ് സംഭവം പുറം ലോകമറിയുന്നത്. അമ്മയെ വിവാഹം കഴിക്കുന്നത് തെറ്റല്ലെന്ന് അമ്മ പട്രീഷ്യ തെറ്റിദ്ധരിപ്പിച്ചെന്ന് മിസ്റ്റി ആരോപിക്കുന്നു.

അഭിഭാഷകരെ കണ്ട് വിവാഹം നിയമവിരുദ്ധമല്ലെന്ന് പറഞ്ഞ അമ്മയുടെ ഉറപ്പിലാണ് താന്‍ വിവാഹത്തിന് സമ്മതിച്ചതെന്നും മിസ്റ്റി കോടതിയെ ബോധിപ്പിച്ചു.44 കാരിയായ പട്രീഷ്യ സ്പാന്‍ കഴിഞ്ഞ മാര്‍ച്ചിലാണ് 26കാരിയായ തന്റെ മകള്‍ മിസ്റ്റി സ്പാന്നിനെ വിവാഹം കഴിക്കുന്നത്.

മിസ്റ്റി സ്പാന്നിനെ കൂടാതെ രണ്ട് കുട്ടികള്‍ കൂടിയുണ്ട് പട്രീഷ്യയ്ക്ക്. മൂന്ന് കുട്ടികളുടെയും രക്ഷാകര്‍തൃ ചുമതല വളരെ നേരത്തെ തന്നെ പട്രീഷ്യയ്ക്ക നഷ്ടമായിരുന്നു. അന്ന് മുതല്‍ മുത്തശ്ശിയാണ് ഈ മൂന്ന് കുട്ടികളെയും ദത്തെടുത്ത് വളര്‍ത്തിയത്.

രക്തബന്ധത്തിലുള്ളവരെ വിവാഹം ചെയ്യുന്നത് ഒക്ലഹോമയില്‍ ശിക്ഷ ലഭിക്കാവുന്ന കുറ്റകൃത്യമാണ്. കേസില്‍ പത്ത് വര്‍ഷം തടവ് മിസ്റ്റിക്ക് ലഭിച്ചിട്ടുണ്ടെങ്കിലും അത് അനുഭവിക്കേണ്ടതില്ല. ഒക്ലഹോമയിലെ പ്രത്യേക നിയമ പ്രകാരം രണ്ട് വര്‍ഷം കര്‍ശന നിബന്ധനകള്‍ക്ക് വിധേയമായി കോടതിയില്‍ പിഴയടച്ച് നല്ല നടപ്പാവാം.

ഈ നല്ല നടപ്പ് കാലാവധി വിജയകരമായി പൂര്‍ത്തിയായാല്‍ ശിക്ഷ റദ്ദാക്കപ്പെട്ടതായി കോടതി പ്രഖ്യാപിക്കും.