യമനിൽ നടന്ന വ്യോമാക്രമത്തിൽ സ്ത്രീകളും കുട്ടികളും ഉൾപ്പെടെ 10 പേര് കൊല്ലപ്പെട്ടതായി റിപ്പോർട്ട്. വിവാഹപ്പാര്‍ട്ടി സഞ്ചരിച്ച വാഹനത്തിനു നേരെയാണ് സൗദി സഖ്യസൈന്യം വ്യോമാക്രമം നടത്തിയത്. സ്ത്രീകള്‍ സഞ്ചരിക്കുകയായിരുന്ന വാഹനത്തിനു നേരെ മൂന്നുതവണയാണ് വ്യോമാക്രമണം നടന്നതെന്ന് ഹൂത്തികളുടെ നിയന്ത്രണത്തിലുള്ള സബാ വാര്‍ത്താ ഏജന്‍സി വ്യക്തമാക്കി.

സംഭവത്തെ കുറിച്ച് സൗദിസഖ്യം പ്രതികരിച്ചിട്ടില്ല. ഒരു കുടുംബത്തിലെ 30നും 50നും ഇടയില്‍ പ്രായമുള്ള സ്ത്രീകളാണ് കൊല്ലപ്പെട്ടതെന്ന് അല്‍ ജസീറ റിപ്പോര്‍ട്ട് ചെയ്തു. 2015ലാണ് സൗദി സഖ്യം യമന്‍ ആഭ്യന്തര സംഘര്‍ഷത്തില്‍ ഇടപെടുന്നത്. ആഭ്യന്തര സംഘര്‍ഷത്തെ തുടര്‍ന്ന് ഇറാന്‍ അനുകൂല ശിയാവിഭാഗമായ ഹൂത്തികള്‍ തലസ്ഥാനമായ സനാ ഉള്‍പ്പെടെയുള്ള പ്രദേശങ്ങള്‍ പിടിച്ചടക്കിയതിനെ തുടര്‍ന്നായിരുന്നു സൗദി സഖ്യത്തിന്റെ ഇടപെടല്‍.