തന്റെ രണ്ടാമത്തെ കുഞ്ഞിനെ പ്രസവിച്ച് ആശുപത്രിയില്‍ കിടന്ന ഡോ.ഹിലാരിയെ തേടിയെത്തിയത് മറ്റൊരു സന്ദേശമായിരുന്നു. ഗൈനക്കോളജിസ്റ്റുകൂടിയായ തന്റെ പ്രിയപ്പെട്ട പേഷ്യന്റ് തൊട്ടടുത്ത മുറിയിൽ പ്രസവ വേദന കൊണ്ട് പുളയുകയാണെന്നതായിരുന്നു ആ വിവരം. പിന്നെ ഒന്നും നോക്കിയില്ല ക്ഷീണവും വിഷമതകളും മാറ്റിവെച്ച് ഹിലാരി വേഗം തൊട്ടടുത്ത മുറിയിലുള്ള തന്റെ പേഷ്യന്റിനടുത്തെത്തി. ഗൈനക്കോളജിസ്റ്റ് എന്ന നിലയിൽ ഹിലാരി തന്റെ ആത്മാര്‍ത്ഥതകാത്ത് സൂക്ഷിക്കുകയായിരുന്നു.

ഇരട്ട കുട്ടികളെ കയ്യിലെടുക്കുമ്പോള്‍ സന്തോഷം കൊണ്ട് കണ്ണുനിറയുകയായിരുന്നു അവര്‍ക്ക്. വാഷിംഗ്ടണിലെ യാകിമാ വാലി ഫാം വര്‍ക്കേഴ്‌സ് ക്ലിനിക്കിലെ ഗൈനക്കോളജിസ്റ്റായ ഹിലാരി കോണ്‍വേയാണ് തന്റെ പ്രസവത്തിന് തൊട്ടു പിന്നാലെ മറ്റൊരു പ്രസവമെടുക്കാന്‍ ഓടിയത്.

എന്നാല്‍ അവസാന ചെക്കപ്പിന് വന്നപ്പോള്‍ തന്നെ  ഹിലാരിക്ക് കേറ്റിന്റെ പ്രസവം എടുക്കാന്‍ കഴിയുമോ എന്ന കാര്യം സംശയമായിരുന്നു . എന്നാല്‍ തൊട്ടടുത്ത റൂമില്‍ നിന്ന് സന്ദേശം ലഭിച്ചതോടെ കേറ്റിനെ സഹായിക്കാന്‍ കഴിയുമെന്ന് ഉറപ്പായ ഹിലാരി തന്റെ അവശതകളെ മാറ്റി നിര്‍ത്തി പ്രസവമുറിയിലേക്ക് ചെന്നു.

തന്റെ പ്രസവ ശേഷം മറ്റൊരു പ്രസവമെടുക്കാൻ തയ്യാറായ ഹിലാരിക്ക് സഹപ്രവര്‍ത്തകരുടെ ഭാഗത്ത് നിന്നും എല്ലാ വിധ പിന്തുണയും ലഭിച്ചിരുന്നു. സഹപ്രവര്‍ത്തകരുടെ ഇടയില്‍ നിന്ന് ലഭിച്ച മികച്ച പിന്തുണയാണ് തനിക്ക് കേറ്റിനടുത്തെത്താന്‍ സഹായിച്ചതെന്ന് ഹിലാരി പറയുന്നു. തന്റെ അഭാവത്തില്‍ കുട്ടിയെ നേഴ്‌സുമാര്‍ പരിചരിച്ചു. കൂടാതെ കേറ്റിന്റെ പ്രസവ സമയത്തും എല്ലാവരും കൂടെയുണ്ടെയെന്നും ഹിലാരി കൂട്ടിച്ചേര്‍ത്തു. എന്തായാലും ഇരട്ടക്കുട്ടികളുമായി കേറ്റും കേറ്റിന്റെ പ്രിയപ്പെട്ട ഡോക്ടറും സന്തോഷത്തിലാണ്.