നിയമനിര്‍മാണത്തിനായി നിയമസഭാ സമ്മേളനം വിളിച്ചുചേര്‍ക്കുന്നതിനു ഗവര്‍ണറോടു ശിപാര്‍ശ ചെയ്യാന്‍ നാളെ പ്രത്യേക മന്ത്രിസഭാ യോഗം ചേരും. കാലിക്കട്ട്് സര്‍വകലാശാലാ നിയമ ഭേദഗതി ഓര്‍ഡിനന്‍സ് പുറത്തിറക്കാന്‍ ഇന്നലെ ചേര്‍ന്ന മന്ത്രിസഭ തീരുമാനിച്ച സാഹചര്യത്തിലാണിത്.

27 മുതലാകും നിയമസഭാ സമ്മേളനം. 26 മുതല്‍ ഡിസംബര്‍ 13 വരെ നിയമസഭാ സമ്മേളനം ചേരാനായിരുന്നു നേരത്തെയുള്ള ധാരണ. മന്ത്രി ഇ. ചന്ദ്രശേഖരന്റെ മകളുടെ വിവാഹം 25നു കാസര്‍ഗോഡ് നടക്കുന്നതിനാല്‍ 26നു രാവിലെ എല്ലാവര്‍ക്കും തലസ്ഥാനത്ത് എത്താനുള്ള ബുദ്ധിമുട്ടു പരിഗണിച്ചാണ് ഒരു ദിവസത്തേക്കു കൂടി ദീര്‍ഘിപ്പിച്ചത്. ഓര്‍ഡിനന്‍സുകള്‍ക്കു പകരമുള്ള ബില്ലുകള്‍ അവതരിപ്പിക്കുന്നതിനും പാസാക്കുന്നതിനുമാണ് സമ്മേളനം ചേരുന്നത്.

ഫെബ്രുവരി ഒന്നിനാണു ബജറ്റ് അവതരിപ്പിക്കാന്‍ തയാറെടുക്കുന്നതെന്നു ധനമന്ത്രി തോമസ് ഐസക് പറഞ്ഞു. ഇതിനായി ജനുവരി മധ്യത്തോടെ ബജറ്റ് സമ്മേളനം ആരംഭിക്കും. അടുത്തയാഴ്ചത്തെ മന്ത്രിസഭാ യോഗം 13നാണു ചേരുക. സഹകരണ വാരാഘോഷത്തിന്റെ ഉദ്ഘാടനച്ചടങ്ങ് 14നു കാസര്‍ഗോഡ് നടക്കുന്ന സാഹചര്യത്തിലാണു പതിവു മന്ത്രിസഭാ യോഗം ചൊവ്വാഴ്ചയാക്കിയത്. ശബരിമല കേസിലെ റിവ്യു ഹര്‍ജികള്‍ സുപ്രീംകോടതി പരിഗണിക്കുന്നതും 13നാണ്.