എല്ലാം ശാന്തമായി അവസാനിക്കാതിരുന്നെങ്കില്... ശബരിമലയില് വന് പോലീസ് പട, വനിതാ പോലീസുകാര്, നിരോധനാജ്ഞ, മാധ്യമ നിയന്ത്രണം... എല്ലാം കേന്ദ്രത്തിന്റെ നോട്ടമുള്ളതിനാല്; ശബരിമലയില് രഹസ്യ നീക്കം ഒരുക്കിയതിന് പിന്നില് കേന്ദ്രത്തിന്റെ ശക്തമായ ഇടപെടല്
ചിത്തിര ആട്ട വിശേഷത്തിന് വന് പോലീസ് പടയും കര്ശന നിയന്ത്രണങ്ങളും ശബരിമലയില് നിയോഗിച്ചതിന് പിന്നിലെ കാരണം വെളിപ്പെടുത്തി സര്ക്കാര്. ഹൈക്കോടതിയിലാണ് സര്ക്കാര് ഇക്കാര്യം വിശദമാക്കിയത്. ശബരിമലയില് യുവതീ പ്രവേശനവുമായി ബന്ധപ്പെട്ട് അക്രമ പ്രവര്ത്തനങ്ങള് തടയാന് കര്ശന നടപടി ആവശ്യപ്പെട്ട് കേന്ദ്ര ആഭ്യന്തര മന്ത്രാലയം കത്തയച്ചിരുന്നുവെന്നാണ് ഹൈക്കോടതിക്കു പോലീസ് റിപ്പോര്ട്ട് നല്കിയത്. യുവതീപ്രവേശനം അനുവദിച്ച സുപ്രീംകോടതി വിധിക്കു പിന്നാലെ ചില സംഘടനകള് പ്രതിഷേധം ഉയര്ത്തിയതിനെത്തുടര്ന്നു കേന്ദ്ര സര്ക്കാര് കേരളമടക്കം ദക്ഷിണേന്ത്യന് സംസ്ഥാനങ്ങളിലെ ചീഫ് സെക്രട്ടറിമാര്ക്കു കത്തു നല്കിയിരുന്നു
തീര്ഥാടകര്ക്കിടയില് സാമൂഹികവിരുദ്ധര് നുഴഞ്ഞുകയറി പ്രശ്നങ്ങളുണ്ടാക്കാന് ഇടയുണ്ടെന്നു വിവരം ലഭിച്ചതിനെ തുടര്ന്നാണ് കൂടുതല് പോലീസിനെ നിയോഗിക്കുകയും നിരോധനാജ്ഞ പുറപ്പെടുവിക്കുകയും ചെയ്തതെന്നു പത്തനംതിട്ട ജില്ലാ പോലീസ് മേധാവി സമര്പ്പിച്ച റിപ്പോര്ട്ടില് പറയുന്നു. പോലീസ് ശബരിമലയില് യഥാര്ഥ തീര്ഥാടകരെയോ മാധ്യമപ്രവര്ത്തകരെയോ തടഞ്ഞിട്ടില്ല. തീര്ഥാടകരായ സ്ത്രീകളെയും മാധ്യമപ്രവര്ത്തകരെയും നാമജപത്തിന്റെ മറവില് തീവ്രവാദ സ്വഭാവമുള്ളവര് തടഞ്ഞതായും പോലീസ് വിശദീകരിച്ചു. സ്ത്രീകള്ക്ക് ശബരിമലയില് പ്രവേശിക്കാന് അവകാശമുണ്ടെന്ന സുപ്രീംകോടതി വിധിയുണ്ടായിട്ടും ഇത്തരക്കാര് സംഘം ചേര്ന്നു സ്ത്രീകളെ തടയുകയായിരുന്നു.
തുലാമാസ പൂജയ്ക്കായി ഒക്ടോബര് 17 മുതല് 22 വരെ നട തുറന്നപ്പോള് നാമജപ സംഘടനകള് യുവതികളെ തടഞ്ഞു. പോലീസ് ഇവര്ക്ക് സംരക്ഷണം നല്കുന്നതും നാമജപസംഘടനകളുടെ പേരില് ഒത്തുകൂടിയവര് തടഞ്ഞു. പോലീസിന്റെ വാഹനങ്ങളും കെ.എസ്.ആര്.ടി.സി. ബസുകളും സ്വകാര്യവാഹനങ്ങളും തകര്ത്തവര്ക്കെതിരേ കേസെടുത്തെന്നും റിപ്പോര്ട്ടില് പറയുന്നു. തുലാമാസ പൂജയ്ക്ക് ഇത്തരം നിയമവിരുദ്ധ നടപടികള് ഉണ്ടായതിനാലാണ് നവംബര് അഞ്ചിനു നട തുറന്നപ്പോള് പോലീസ് കൂടുതല് കരുതല് നടപടികള് സ്വീകരിച്ചത്. മാധ്യമപ്രവര്ത്തകരുടെ സുരക്ഷ ഉറപ്പാക്കാനായാണ് അവര്ക്കു നിയന്ത്രണങ്ങള് ഏര്പ്പെടുത്തിയതെന്നും റിപ്പോര്ട്ടില് പറയുന്നു.
മണ്ഡലമകരവിളക്ക് കാലത്ത് തീര്ഥാടകര്ക്ക് ഏതെങ്കിലും തരത്തിലുള്ള നിയന്ത്രണം ഏര്പ്പെടുത്തുന്ന കാര്യത്തില് തീരുമാനമെടുത്തിട്ടില്ലെന്നു സര്ക്കാര് ഹൈക്കോടതിയില് ബോധിപ്പിച്ചു. തീര്ഥാടകര്ക്കു സമയക്രമം ഏര്പ്പെടുത്തേണ്ട ആവശ്യമുണ്ടോയെന്നും തീരുമാനിച്ചിട്ടില്ല. ദേവസ്വം ബോര്ഡുമായി ആലോചിച്ച് 16നു മുന്പ് തീരുമാനമെടുക്കും. തീര്ഥാടകരെ 24 മണിക്കൂറില് കൂടുതല് സന്നിധാനത്തു തങ്ങാന് അനുവദിക്കില്ലെന്ന തീരുമാനം തടയണമെന്നാവശ്യപ്പെട്ടു സമര്പ്പിച്ച ഹര്ജിയിലാണു സര്ക്കാര് ഇക്കാര്യം അറിയിച്ചത്.
https://www.facebook.com/Malayalivartha
