വിശ്വാസി സമരത്തോടൊപ്പം ചേര്‍ന്ന് ബി.ജെ.പി കോരിയെടുത്തത്, വലിയൊരു ജനകീയാടിത്തറ. നിലപാടിലുറച്ച് സി.പി.എമ്മും എല്‍.ഡി.എഫും കരുത്തുകാട്ടി. ഒടുവില്‍ പണികിട്ടിയതോ കോണ്‍ഗ്രസിനും.

ശബരിമല വിഷയം കൈകാര്യം ചെയ്ത രീതിയ്ക്ക് കോണ്‍ഗ്രസില്‍ പുതുമയൊന്നുമില്ല. കൃത്യമായ നിലപാടെടുക്കാതെ ബി.ജെ.പിയുടെ ബി ടീമായി ആദ്യമോടി. പിന്നെ അപകടം മണത്തപ്പോള്‍ ബി.ജെ.പി യുടെ നേര്‍ക്ക് ചീറ്റി. ഇപ്പുറത്ത് സി.പി.എം കരുത്തോടെ നിന്നു. അവര്‍ക്കുനേരെ തിരിഞ്ഞാക്രമിക്കാനും കഴിയാതായി. രാഹുല്‍ ഗാന്ധിയുടെ നിലപാട് കോണ്‍ഗ്രസിന്റെ ദേശീയ കാഴ്ചപ്പാടായിരുന്നു. സ്ത്രീകള്‍ക്ക് തുല്യതയെന്ന നയം പ്രകടന പത്രികയില്‍ കൊണ്ടുവന്നതും, കുറെയെങ്കിലും പ്രാവര്‍ത്തികവുമാക്കിയ കോണ്‍ഗ്രസിന് ദേശീയ തലത്തില്‍ ഈ നയത്തില്‍ വിട്ടുവീഴ്ച നടത്തിയാല്‍ അതിന് വലിയ വില കൊടുക്കേണ്ടി വരും.

കേരളത്തിലെ കോണ്‍ഗ്രസ് നേതൃത്വം ഇക്കാര്യത്തില്‍ വേണ്ടത്ര കൂടിയാലോചന നടത്തിയില്ല. ശബരിമല സമരത്തിന്റെ തുടക്കത്തില്‍ കെ. സുധാകരന്‍ നടത്തിയ ഒറ്റയാള്‍ പോരാട്ടം ഏറെ തെറ്റിദ്ധാരണകള്‍ക്കിടയാക്കി. ബി.ജെ.പി യിലേക്കുള്ള സുധാകരന്റെ ചുവടുവയ്പായി കേരളമതിനെ വ്യാഖ്യാനിച്ചു. പ്രതിപക്ഷ നേതാവ് രമേശ് ചെന്നിത്തലയുടെയും, കെ.പി.സി.സി. പ്രസിഡന്റ് മുല്ലപ്പള്ളി രാമചന്ദ്രന്റെയും നീക്കങ്ങള്‍ക്ക് കരുത്ത് പോരായിരുന്നു.

പോര് സി.പി.എമ്മും ബി.ജെ.പിയും തമ്മിലായപ്പോള്‍ കളത്തിനു പുറത്തായി കോണ്‍ഗ്രസ്. രാഷ്ട്രീയപരമായി കോണ്‍ഗ്രസിന് വലിയ നഷ്ടമാണ് ശബരിമല വിഷയത്തിലുണ്ടായത്. നിലപാടില്ലായ്മ നട്ടെല്ലില്ലായ്മയായി ചിത്രീകരിക്കപ്പെട്ടു. നേതൃത്വം ദുര്‍ബലമാണെന്ന തോന്നലുണ്ടാക്കി. ഇപ്പുറത്ത് ബി.ജെ.പി.യുമായി നേര്‍ക്കുനേര്‍ പോരിനുനിന്ന പിണറായി വിജയന്‍ കരുത്തോടെ നിലപാടിലുറച്ച് പൊരുതി നിന്നു.

ഹൈന്ദവ വികാരവും, വിശ്വാസവും, നവോത്ഥാന ചിന്തകളും ഇഴപിരിഞ്ഞ ശബരിമല വിഷയത്തില്‍ സുപ്രീ കോടതി വിധി നടപ്പിലാക്കാന്‍ ശ്രമിക്കുന്ന ഒരു ഭരണകൂടത്തിന്റെ നിശ്ചയദാര്‍ഢ്യമാണ് സി.പി.എം ജനങ്ങള്‍ക്കു മുന്നില്‍ വച്ചത്. എന്നാല്‍ ശബരിമലയുടെ രാഷ്ട്രീയം വിശദീകരിക്കാനോ അതു പൊളിച്ചടുക്കാനോ ഉള്ള രാഷ്ട്രീയ ഇച്ഛാശക്തി കോണ്‍ഗ്രസിനില്ലാതെ പോയത് പാര്‍ട്ടിയെ ഇപ്പോഴും നശിപ്പിക്കുന്ന സംഘടനാ ദൗര്‍ബല്യം തന്നെ.

രമേശ് ചെന്നിത്തലയും, ഉമ്മന്‍ചാണ്ടിയും തമ്മിലുള്ള ശീതസമരം. ഇവര്‍ക്കിടയില്‍ സ്വന്തം ഇമേജ് മാത്രം നോക്കുന്ന ചില നേതാക്കള്‍ കൂട്ടത്തിലൊരാള്‍ കുഴിയില്‍ വീണാല്‍ മണ്ണിട്ടു പോകുന്നതാണ് ഭൂരിപക്ഷം നേതാക്കളുടെയും പ്രവര്‍ത്തന ശൈലി.

കോണ്‍ഗ്രസിനപ്പുറം ഈ വിഷയം യു.ഡി.എഫിന്റെ പൊതുവിഷയമാക്കുന്നതില്‍ പരാജയപ്പെട്ടു. ഒടുവില്‍ ഒരിടത്തുമില്ലാത്ത അവസ്ഥ.

വിശ്വാസി സമരം ശക്തമായിരുന്നു. ഈ സമരം സംഘപരിവാറും, ബി.ജെ.പിയും കൈപ്പിടിയിലൊതുക്കിയത് തന്ത്രപൂര്‍വ്വം. ഭൂരിപക്ഷ വിശ്വാസികളും വെറുത്തത് സര്‍ക്കാരിന്റെ ധാര്‍ഷ്ഠ്യവും, വെല്ലുവിളിക്കുന്ന പ്രകൃതവുമായിരുന്നു.

ഇവിടെ സമവായത്തിനുവേണ്ടി വാദിക്കാന്‍ വിശ്വാസി പ്രതിനിധികളെ, യാഥാര്‍ത്ഥ്യ ബോധത്തോടെ കാര്യങ്ങളെ സമീപിക്കാന്‍, ധാര്‍ഷ്ഠ്യം വിട്ട് അനുനയത്തിന്റെ പാതയിലെത്താന്‍ സര്‍ക്കാരിനെ പ്രേരിപ്പിക്കുന്ന പ്രവര്‍ത്തനങ്ങളും സമര രീതികളുമായിരുന്നു കോണ്‍ഗ്രസ് കാട്ടേണ്ടത്. സായാഹ്ന ധര്‍ണ്ണയോ, ഒറ്റപ്പെട്ട വിശദീകരണ യോഗങ്ങളോ വിജയിക്കില്ല. നിലപാടിനെ അംഗീകാരം ലഭിക്കൂ. മാധ്യമ ശ്രദ്ധ ലഭിക്കൂ, കേരളം കാതോര്‍ക്കൂ.

അവിടെയാണ് നിങ്ങള്‍ പരാജയപ്പെട്ടത്. ഹൈന്ദവ വോട്ടുകള്‍ സി.പി.എമ്മില്‍ നിന്ന് ഒലിച്ചുപോയെന്നും അതെല്ലാം തങ്ങള്‍ക്കു വന്നടിയുമെന്ന ഒരു മിനിമം ഗ്യാരന്റി കേരളത്തിലുണ്ടെന്നും നിങ്ങള്‍ വിശ്വസിച്ചാല്‍ തെറ്റുപറ്റി. നാളെകളുടെ രാഷ്ട്രീയം തന്റേടമുള്ള നിലപാടുകളുടേതാണ്. മാധ്യമ അജണ്ടകളും, കള്ള പ്രചരണങ്ങളും സോഷ്യല്‍ മീഡിയ മാധ്യമങ്ങളുടെ ഇക്കാലത്ത് വിജയിക്കില്ലെന്ന് നമ്മള്‍ കണ്ടുകഴിഞ്ഞു.

ഇനിയെങ്കിലും വ്യക്തമായ ഒരു സന്ദേശം തരിക. എന്താണ് നിങ്ങളുടെ ഉറച്ച നിലപാട്? ഇത് കോണ്‍ഗ്രസിനെ സ്‌നേഹിക്കുന്നവരുടെ ചോദ്യമാണ്.