നിരോധനാജ്ഞ ആര്ക്കൊക്കെ ബാധകമെന്ന് ഹൈക്കോടതി? എ.ജി ഉച്ചയ്ക്ക് നേരിട്ടെത്തി കാര്യങ്ങള് വിശദീകരിക്കും സത്യവാങ്മൂലവും നല്കും, ഒരാഴ്ചയ്ക്കിടെ രണ്ടാംതവണയാണ് എ.ജി കോടതിയില് നേരിട്ട് ഹാജരാകുന്നത്, കോടതി നിര്ദ്ദേശങ്ങള് പൊലീസ് പാലിക്കുന്നില്ല
ശബരിമലയിലെ ക്രമസമാധാനപ്രശ്നങ്ങളില് സര്ക്കാരിന് വീണ്ടും തിരിച്ചടി. നിരോധനാജ്ഞ ആര്ക്കൊക്കെ ബാധകമെന്ന് കോടതി ഇന്ന് ചോദിച്ചു. ഭക്തരെയും പ്രതിഷേധക്കാരെയും എങ്ങനെ തിരിച്ചറിയുമെന്നും ചോദിച്ചു. ഇത് സര്ക്കാരിനെ ഏറെ വെട്ടിലാക്കിയിരിക്കുകയാണ്. നിരോധനാജ്ഞ എങ്ങനെ നടപ്പാക്കുന്നെന്ന് വിശദീകരിക്കണമെന്നും കോടതി ആവശ്യപ്പെട്ടു. പമ്പയിലും സന്നിധാനത്തും നിരോധനാജ്ഞ ഏര്പ്പെടുത്തിയതും വിശ്വാസികള്ക്ക് നിയന്ത്രണം ഏര്പ്പെടുത്തിയതും സംബന്ധിച്ച ഹര്ജികള് പരിഗണിക്കുമ്പോഴാണ് കോടതി ഇക്കാര്യങ്ങള് ആവശ്യപ്പെട്ടത്.
ഇത് സംബന്ധിച്ച സത്യവാങ്മൂലം നല്കാമെന്ന് സര്ക്കാര് അറിയിച്ചു ഉച്ചയ്ക്ക് ഒന്നേമുക്കാലിന് അഡ്വക്കേറ്റ് ജനറല് നേരിട്ടെത്തി വിശദീകരണം നല്കാമെന്നും അറിയിച്ചു. കോടതി ഇത് അംഗീകരിച്ചു. കഴിഞ്ഞയാഴ്ച പൊലീസ് ഭക്തര്ക്ക് കടുത്ത നിയന്ത്രണം ഏര്പ്പെടുത്തിയതിനെതിരെ കോടതി രൂക്ഷവിമര്ശനം നടത്തിയിരുന്നു. പൊലീസ് ഇരിക്കേണ്ടത് ബാരക്കിലാണെന്നും സന്നിധാനത്തേക്ക് ഭക്തരെ തടയുന്നത് എന്തിന്റെ അടിസ്ഥാനത്തിലാണെന്നും ചോദിച്ച കോടതി അഡ്വക്കേറ്റ് ജനറല് നേരിട്ടെത്തി വിശദീകരണം നല്കണമെന്നും കോടതി ആവശ്യപ്പെട്ടിരുന്നു. തുടര്ന്ന് അദ്ദേഹം നേരിട്ടെത്തി വിശദീകരണം നല്കി. അതില് കോടതി തൃപ്തി രേഖപ്പെടുത്തിയ ശേഷം വിവേകപൂര്ഡവമായ നടപടികള് സ്വീകരിക്കണമെന്ന് ആവശ്യപ്പെട്ടു. എന്നാല് അതിന് ഘടകവിരുദ്ധമായ നിലപാടാണ് പൊലീസ് സ്വീകരിക്കുന്നത്.
പമ്പയിലേക്ക് ഓരോമിനിറ്റ് ഇടവിട്ട് കെ.എസ്.ആര്.ടി.സി സര്വ്വീസ് നടത്തണമെന്നും സ്വകാര്യവാഹനങ്ങള് കടത്തി വിടണമെന്നും കോടതി നിര്ദ്ദേശിച്ചിട്ടും പൊലീസ് പാലിച്ചില്ല. രാത്രി കെ.എസ്.ആര്.ടി.സി വാഹനങ്ങള്ക്ക് നിയന്ത്രണം ഏര്പ്പെടുത്തി.
ഇന്ന് രാവിലെ കേന്ദ്രമന്ത്രി പൊന്രാധാകൃഷ്ണന്റെ ഔദ്യോഗിക വാഹനത്തിനൊപ്പം വന്ന സ്വകാര്യവാഹനങ്ങള് കടത്തിവിടാന് എസ്.പി യതീഷ് ചന്ദ്ര തയ്യാറായില്ല. തുടര്ന്ന് മന്ത്രി കെ.എസ്.ആര്.ടി.സി ബസില് പമ്പയിലേക്ക് പോയി. ഇന്നലെ ശബരിമല സന്ദര്ശിച്ച കോണ്ഗ്രസ് നേതാക്കള് നിരോധനാജ്ഞ ലംഘിച്ചെങ്കിലും പൊലീസ് അറസ്റ്റ് ചെയ്യാന് തയ്യാറായില്ല. ഇതേ തുടര്ന്ന് വ്യാപകപ്രതിഷേധമാണ് ബി.ജെ.പി നടത്തുന്നത്.
https://www.facebook.com/Malayalivartha
