ലാവ്‌ലിന്‍ കേസില്‍ പിണറായിക്കെതിരെ കുരുക്ക് മുറുക്കാന്‍ കേന്ദ്ര സര്‍ക്കാരും ബി ജെ പിയും ശ്രമം തുടങ്ങി. ശബരിമല വിഷയത്തില്‍ ബി ജെ പിക്ക് പണി കെടുത്തതാണ് കാരണം. കേസ് സുപ്രീം കോടതിയുടെ പരിഗണനയിലാണ്. സുപ്രീം കോടതിയെ പിണക്കാന്‍ പിണറായി പേടിക്കുന്നതും അതുകൊണ്ടാണ്. 

പിണറായിയുടെ ശബരിമല വിശേഷങ്ങള്‍ നരേന്ദ്രമോദി ലൈവായി കണ്ടു കൊണ്ടിരിക്കുകയാണ്. ശബരിമലയില്‍ നടക്കുന്നതിന്റെ യഥാര്‍ത്ഥ ചിത്രം ജനം ചാനല്‍ ഹിന്ദിയിലും ഇംഗ്ലീഷിലും ഹ്രസ്വ ചിത്രമായി തയ്യാറാക്കിയിരുന്നു. ഡല്‍ഹിയിലുള്ള ബിജെപി നേതാക്കളെ കാണിക്കാന്‍ വേണ്ടിയാണ് ഇത്തരം ഹ്രസ്വ ചിത്രങ്ങള്‍ തയ്യാറാക്കിയത്. ഹ്രസ്വചിത്രത്തില്‍ ശബരിമലയിലും പമ്പയിലും ഇപ്പോള്‍ നടക്കുന്നത് വ്യക്തമായി കാണിക്കുന്നുണ്ട്. 

ബിജെപി ദേശീയ നേത്യത്വവുമായി പിണറായി വിജയന് തെറ്റില്ലാത്ത ബന്ധമുണ്ടായിരുന്നു. പിണറായി മുഖ്യമന്ത്രിയായ സന്ദര്‍ഭത്തില്‍ ഡല്‍ഹിയില്‍ ചെന്നാല്‍ ഒരു പരിഗണന ലഭിച്ചിരുന്നു. എന്നാല്‍ കണ്ണൂര്‍ ജില്ലയിലെ പിണറായി ഉള്‍പ്പെടെയുള്ള സ്ഥലങ്ങളില്‍ ബി ജെ പി നേതാക്കളെയും പ്രവര്‍ത്തകരെയും സി പി എമ്മുകാര്‍ വധിക്കാന്‍ തുടങ്ങി. അതിന് പിന്നില്‍ സിപിഎം നേതാക്കള്‍ തന്നെയാണെന്ന് ആരോപണം ഉയര്‍ന്നിരുന്നു. സിപിഎം നേതൃത്വം അറിയാതെ കണ്ണൂര്‍ ജില്ലയില്‍ ഒന്നും നടക്കില്ല. കൊണ്ടും കൊടുത്തുമാണ് കേരളത്തില്‍ ബി ജെ പി വളര്‍ന്നിട്ടുള്ളത്. അതു കൊണ്ടു തന്നെ സി പി എമ്മിന്റെ വിരട്ടല്‍ ഉദ്ദേശിച്ചത്ര ഫലം ചെയ്യില്ല. പിണറായിയില്‍ ഉള്‍പ്പെടെ സിപിഎം പ്രവര്‍ത്തകര്‍ മരിച്ചു തുടങ്ങിയതോടെ നരേന്ദ്രമോദി അനുഭാവപൂര്‍ണമായ സമീപനം ഉപേക്ഷിച്ചു. കേന്ദ്രത്തില്‍ നിന്ന് കിട്ടികൊണ്ടിരുന്ന സഹായവും കിട്ടാതെയായി.

പിന്നീട് പിണറായിക്കെതിരെയാണ് മോദിയും കേന്ദ്രസര്‍ക്കാരും നീങ്ങിയത്. അതിപ്പോഴും തുടരുന്നു. പ്രളയത്തിന്റെ ദുരിതാശ്വാസം പോലും നിഷേധിക്കപ്പെട്ടു. 

അതിനിടെയാണ് രണ്ട് ഐ പി എസ്. ഉദ്യോഗസ്ഥര്‍ കേന്ദ്രമന്ത്രിയോടും ബിജെപി നേതാക്കളോടും മോശമായി പെരുമാറിയത്. ഇത്തരം പെരുമാറ്റം സര്‍ക്കാര്‍ നിര്‍ദ്ദേശ പ്രകാരമാണെന്നാണ് ആരോപണം. കേന്ദ്രമന്ത്രിക്ക് ഐ പി. എസുകാരെ ഒന്നും ചെയ്യാന്‍ കഴിയില്ല. കാരണം കേരള സര്‍ക്കാര്‍ അവര്‍ക്കൊപ്പം നില്‍ക്കുകയാണ്. ഇനിയെങ്ങനെ വിജയനെ തളയ്ക്കുമെന്ന് ചിന്തിച്ച ബിജെപിക്ക് മുന്നിലാണ് ലാവ് ലിന്‍ കേസ് തെളിഞ്ഞു വന്നത്. ലാവ്‌ലിന്‍ കേസില്‍ പിണറായി വിചാരണ നേരിടണമെന്ന് സുപ്രീം കോടതി പറഞ്ഞാല്‍ അദ്ദേഹത്തിന് രാജിവയ്‌ക്കേണ്ടി വരും. ഇങ്ങനെ സംഭവിച്ചാല്‍ ഇതില്‍പരം ആനന്ദം മറ്റൊന്നില്ല. കോടിയേരിയാകട്ടെ മുഖ്യമന്ത്രിയാവാനുള്ള ഉടുപ്പും തയ്ച്ച് കാത്തിരിക്കുകയാണ്.