ശബരിമല വിഷയത്തില്‍ ബിജെപിയുടെ നിലപാട് മാറ്റത്തെ ശക്തമായി പരിഹസിച്ച് സാംസ്‌കാരിക പ്രവര്‍ത്തകനും രാഷ്ട്രീയ നിരീക്ഷകനുമായ ശ്രീചിത്രന്‍. ബിജെപി സമരത്തില്‍ നിന്ന് പിന്‍മാറുന്നതോടെ ഐക്യകേരളം കണ്ട ഏറ്റവും ലജ്ജാവഹമായൊരു അധ്യായത്തിന് തിരശീലവീഴും. തന്റെ ഫേസ്ബുക്ക് പോസ്റ്റിലൂടെയാണ് ശബരിമലയിലെ പ്രതിഷേധ സമരത്തില്‍ ബിജെപി സ്വീകരിച്ച നിലപാടുകളെ അദ്ദേഹം പരിഹസിച്ചത്.

പോസ്റ്റിന്റെ പൂര്‍ണ്ണരൂപം:

ബിജെപി സമരത്തില്‍ നിന്ന് പിന്‍മാറുന്നതോടെ, ഐക്യകേരളചരിത്രം കണ്ട എക്കാലത്തേയും ലജ്ജാവഹമായൊരു അധ്യായത്തിന് തിരശ്ശീല വീഴുകയാണ്. ഒരു കാര്യം ഉറപ്പാണ് അടുത്ത തലമുറക്ക് മുന്നില്‍ ഈ സമരചരിത്രം പറഞ്ഞു ചിരിക്കാനുള്ള ഒരദ്ധ്യായമായി മാറും. ഒരു ദൈവത്തിന്റെ ബ്രഹ്മചര്യ സംരക്ഷണത്തിനും സ്വന്തം അശുദ്ധിസംരക്ഷണത്തിനുമായി തെരുവിലെത്തിയ കുലസ്ത്രീകളും അവരെ നയിച്ച കോജെപി സഖ്യവും ഭരണഘടനക്കും സുപ്രീംകോടതിക്കുമെതിരെ അവരുന്നയിച്ച തന്ത്രവിധികളും എന്നോ കാലിയായ രാജാവിന്റെ പല്ലക്കു ചുമക്കലും പാഴ്ശ്രുതി മാത്രം മീട്ടിയ തന്ത്രികളും ഇവര്‍ക്കെല്ലാം ആളുമര്‍ത്ഥവും നല്‍കിയ സ്ഥാനിനായര്‍ സംഘവും ചേര്‍ന്നാടിയ ഈ പ്രേതപ്രഹസനം അടുത്ത തലമുറയിലെ കുട്ടികള്‍ കണ്ട് ആര്‍ത്തുചിരിക്കും. എന്തൊക്കെ തരം വിചിത്രജന്തുക്കളില്‍ നിന്നാണ് കേരളം ആധുനീകരിക്കപ്പെട്ടത് എന്നവര്‍ വിസ്മയത്തോടെ ഓര്‍ക്കും.

പറഞ്ഞില്ലേ,

നാം ഒരിക്കലും തോറ്റ ജനതയല്ല.