കോണ്ഗ്രസുകാര് ബി.ജെ.പിയിലേക്ക് പോകുന്നതിന് പിന്നാലെ ബി.ജെ.പി എം.പി കോണ്ഗ്രസില് ചേര്ന്നു, വടക്ക് പടിഞ്ഞാറന് ഡല്ഹിയിലെ സിറ്റിംഗ് എം.പി ഉദിത് രാജ് കോണ്ഗ്രസില് ചേര്ന്നത്
കോണ്ഗ്രസുകാര് ബി.ജെ.പിയിലേക്ക് പോകുന്നതിന് പിന്നാലെ ബി.ജെ.പി എം.പി കോണ്ഗ്രസില് ചേര്ന്നു. ബി.ജെ.പി സീറ്റ് നിഷേധിച്ചതിനെ തുടര്ന്നാണ് വടക്ക് പടിഞ്ഞാറന് ഡല്ഹിയിലെ സിറ്റിംഗ് എം.പി ഉദിത് രാജ് കോണ്ഗ്രസില് ചേര്ന്നത്. കോണ്ഗ്രസില് ചേരുന്നതിന് മുമ്പ് കോണ്ഗ്രസ് അധ്യക്ഷന് രാഹുല് ഗാന്ധിയെ കണ്ട ശേഷമാണ് പാര്ട്ടി അംഗത്വം എടുത്തത്. മുമ്പ് കേന്ദ്രസര്ക്കാരിന്റെ ദളിത് വിരുദ്ധ നയങ്ങള്ക്കെതിരെ ഉദിത് പരസ്യമായി പ്രതികരിച്ചിരുന്നു. ബി.ജെ.പിക്കൊപ്പം പ്രവര്ത്തിച്ചെങ്കിലും അവരുടെ ആശയങ്ങളോട് യോജിപ്പില്ലായിരുന്നെന്ന് ഉദിത് പറയുന്നു. ആള് ഇന്ത്യ കോണ്ഫഡറേഷന് ഓഫ് എസ് സി എസ് ടി ഓര്ഗനൈസേഷന്റെ ദേശീയ അധ്യക്ഷനാണ് ഉദിത് രാജ്. ഉദിത് രാജിന് പകരം പഞ്ചാബി ഗായകന് ഹാന്സ് രാജ് ഹാന്സിനെയാണ് ബിജെപി സ്ഥാനാര്ഥിയാക്കിയത്.
'ഞാന് ടിക്കറ്റിനായി കാത്തിരിക്കുകയാണ്, കിട്ടിയില്ലെങ്കില് പാര്ട്ടിയോട് ഗുഡ്ബൈ പറയും', എന്നാണ് ഉദിത് രാജ് കഴിഞ്ഞ ദിവസം ട്വീറ്റ് ചെയ്തിരുന്നു. എന്നാല് ദേശീയ തെരഞ്ഞെടുപ്പ് സമിതി ഇക്കാര്യം വേണ്ടത്ര പരിഗണിച്ചില്ല. 2014ലാണ് ഉദിത്തിന്റെ ഇന്ത്യന് ജസ്റ്റിസ് പാര്ട്ടി ബി ജെ പിയില് ലയിക്കുന്നത്. അന്ന് കഷ്ടിച്ച് അദ്ദേഹം വിജയിച്ചു. ഡല്ഹിയിലെ ഏഴ് ലോക്സഭാ സീറ്റുകളിലും ബിജെപിക്ക് പരിപൂര്ണ വിജയം നേടാനായത് ഉദിത് രാജിന്റെ പിന്തുണയോടെയാണ്. നോര്ത്ത് വെസ്റ്റ് ഡല്ഹിയില് മാത്രമാണ് ബി.ജെ.പി സ്ഥാനാര്ത്ഥിയെ പ്രഖ്യാപിക്കാഞ്ഞത്. തിങ്കളാഴ്ച രാത്രി മുദ്രാവാക്യം വിളിച്ചെത്തിയ ബി.ജെ.പി പ്രവര്ത്തകര്ക്കൊപ്പം ഡല്ഹി ബി.ജെ.പി ഓഫീസിലേക്ക് ഉദിത് രാജ് എത്തിയിരുന്നു. ഈ സമയത്ത് നോര്ത്ത് വെസ്റ്റ് ഡല്ഹിയില് സ്ഥാനാര്ത്ഥിയായി പരിഗണിക്കപ്പെടുന്ന പഞ്ചാബി ഗായകന് ഹാന്സ് രാജ് ഹാന്സും അവിടെ ഉണ്ടായിരുന്നു.
ഡല്ഹിയിലെ ബി.ജെ.പി എം.പിമാരില് ഏറ്റവും മികച്ച പ്രകടനം കാഴ്ചവെച്ചത് താനെന്നും അര്ഹതപ്പെട്ട സീറ്റ് മാത്രമാണ് ചോദിച്ചതെന്നും ഉദിത് രാജ് കഴിഞ്ഞ ദിവസം പ്രതികരിച്ചിരുന്നു. സംവരണ സീറ്റായ മണ്ഡലത്തില് ബി.ജെ.പി സ്ഥാനാര്ത്ഥി പ്രഖ്യാപനം നടത്തുന്നത് വരെ കാത്തിരിക്കുകയായിരുന്നു ഉദിത് രാജ്. ശബരിമലയില് യുവതികള് ദര്ശനം നടത്തിയതിനെ ഉദിത് രാജ് സ്വാഗതം ചെയ്തിരുന്നു. ബി.ജെ.പിയുടെ നിലപാടിന് വിരുദ്ധമായി തന്റെ നിലപാട് അദ്ദേഹം പ്രഖ്യാപിക്കുകയായിരുന്നു. ദളിതനെന്ന നിലയിലും ഭരണഘടനയില് വിശ്വസിക്കുന്ന വ്യക്തിയെന്ന നിലയിലും ശബരിമലയില് യുവതീ പ്രവേശം നടന്നതില് അതിയായ സന്തോഷമുണ്ടെന്നാണ് അന്ന് അദ്ദേഹം എം.പി പറഞ്ഞു.
'യുവതികള് ശബരിമലയില് പ്രവേശിച്ച് പ്രാര്ത്ഥിച്ചതില് വളരെ സന്തോഷമുണ്ട്. സതിയും സ്ത്രീധനവും പോലെയുള്ള ദുരാചാരങ്ങള് ഉണ്ടായിരുന്നു. ഇപ്പോഴും അതിനെയൊക്കെ ഉയര്ത്തിപ്പിടിക്കുമോയെന്ന്, കനകദുര്ഗയും ബിന്ദുവും ദര്ശനം നടത്തിയ ശേഷം ഉദിത് ചോദിച്ചത് വിവാദമായിരുന്നു. സ്ത്രീയുടെ ഗര്ഭപാത്രത്തില് നിന്നാണ് പുരുഷന് ജന്മമെടുക്കുന്നതെന്ന് ഓര്ക്കണം. യുവതികള് പ്രവേശിപ്പിച്ചതിനെ പിന്തുണച്ച് ആദ്യമായാണ് ബി.ജെ.പിയുടെ ഒരു എം.പി രംഗത്തെത്തിയത്. അന്നേ ദേശീയ നേതൃത്വത്തിന്റെ കണ്ണിലെ കരടായിരുന്നു ഉദിത്.
https://www.facebook.com/Malayalivartha
