കടുത്ത വേനല് ചൂടിന് പിന്നാലെ സംസ്ഥാനത്ത് വേനല്മഴയും കടുക്കുന്നു, വേനല് മഴയോടനുബന്ധിച്ച് ഉച്ചക്ക് രണ്ട് മുതല് വൈകിട്ട് എട്ട് വരെയുള്ള സമയത്ത് ശക്തമായ ഇടിമിന്നലിനുള്ള സാധ്യത ഉണ്ടെന്ന് സംസ്ഥാന ദുരന്തനിവാരണ അതോറിട്ടി അറിയിച്ചു
കടുത്ത വേനല് ചൂടിന് പിന്നാലെ സംസ്ഥാനത്ത് വേനല്മഴയും കടുക്കുന്നു. വേനല് മഴയോടനുബന്ധിച്ച് ഉച്ചക്ക് രണ്ട് മുതല് വൈകിട്ട് എട്ട് വരെയുള്ള സമയത്ത് ശക്തമായ ഇടിമിന്നലിനുള്ള സാധ്യത ഉണ്ടെന്ന് സംസ്ഥാന ദുരന്തനിവാരണ അതോറിട്ടി അറിയിച്ചു. വേനല് മഴയോട് അനുബന്ധിച്ചുള്ള ഇടിമിന്നല് അപകടകാരികളാണ്്. ജീവനും വൈദ്യുത ചാലകങ്ങളുമായി ബന്ധിപ്പിച്ചിട്ടുള്ള വീട്ടുപകരണങ്ങള്ക്കും വലിയ നാശനഷ്ടം സംഭവിക്കും. സംസ്ഥാന ദുരന്ത നിവാരണ അതോറിറ്റി ഇടിമിന്നലിനെ സവിശേഷ ദുരന്തമായി പ്രഖ്യാപിച്ചിട്ടുണ്ട്. ആയതിനാല് അതോറിറ്റി ചില മുന്കരുതല് നിര്ദ്ദേശങ്ങള് നല്കുന്നു. അവ കാര്മേഘം കണ്ട് തുടങ്ങുന്ന ഉച്ചക്ക് രണ്ട് മുതല് വൈകിട്ട് എട്ട് വരെയുള്ള സമയം സ്വീകരിക്കേണ്ടതാണ്. ഇടിമിന്നല് ദൃശ്യമല്ല എന്നതിനാല് ഇത്തരം മുന്കരുതല് സ്വീകരിക്കുന്നതില് നിന്നും വിട്ടുനില്ക്കരുതെന്നും മുന്നറിയിപ്പില് പറയുന്നു.
ഉച്ചക്ക് രണ്ട് മുതല് വൈകിട്ട് എട്ട് വരെയുള്ള സമയത്ത് കുട്ടികളെ തുറസായ സ്ഥലത്ത് കളിക്കാന് വിടരുത്. മഴക്കാര് കാണുമ്പോള് ഉണക്കാനിട്ട വസ്ത്രങ്ങള് എടുക്കാന് മുറ്റത്തേക്കോ ടെറസിലേക്കോ പോകരുത്. മഴക്കാറ് കണ്ട് വളര്ത്തു മൃഗങ്ങളെ മാറ്റി കെട്ടാനും ടെറസില് ഉണക്കാനിട്ട വസ്ത്രങ്ങള് എടുക്കാനും പോയ വീട്ടമ്മമാരില് കൂടുതലായി ഇടിമിന്നല് ഏറ്റതായി കണക്കുകള് വ്യക്തമാക്കുന്നു. അതിനാല് വീട്ടമ്മമാര് പ്രത്യേകം ശ്രദ്ധിക്കണം. ഇടിമിന്നലിന്റെ ആദ്യ ലക്ഷണം കണ്ടുകഴിഞ്ഞാല് ഉടന് സുരക്ഷിതമായ കെട്ടിടത്തിനുള്ളിലേക്ക് മാറണം. ഗൃഹോപകരണങളുടെ വൈദ്യുതി ബന്ധം വിഛേദിക്കണം. ജനലും വാതിലും അടച്ചിടുക.
ലോഹ വസ്തുക്കളുടെ സ്പര്ശനമോ സാമീപ്യമോ പാടില്ല. വൈദ്യുതി ഉപകരണങ്ങളുടെ സാമീപ്യവും ഒഴിവാക്കുക. ഫോണ് ഉപയോഗിക്കരുത്.
ഇടിമിന്നലുള്ള സമയത്ത് കുളിക്കുന്നത് ഒഴിവാക്കുക. കഴിയുന്നത്ര ഗൃഹാന്തര് ഭാഗത്ത് ഭിത്തിയിലോ തറയിലോ സ്പര്ശിക്കാതെ ഇരിക്കുക. ഇടിമിന്നലുള്ള സമയത്ത് ടെറസ്സിലോ മറ്റ് ഉയരമുള്ള സ്ഥലങ്ങളിലോ വൃക്ഷ കൊമ്പിലോ ഇരിക്കുന്നത് അപകടകരമാണ്. വീടിനു പുറത്താണങ്കില് വൃക്ഷങ്ങളുടെ ചുവട്ടില് നില്ക്കരുത്. വാഹനത്തിനുള്ളില് ആണങ്കില് തുറസ്സായ സ്ഥലത്ത് നിര്ത്തി, ലോഹ ഭാഗങ്ങളില് സ്പര്ശിക്കാതെ ഇരിക്കണം. ഇടിമിന്നല് ഉണ്ടാകുമ്പോള് ജലാശയത്തില് ഇറങ്ങുവാന് പാടില്ല. പട്ടം പറത്തുവാന് പാടില്ല. തുറസ്സായ സ്ഥലത്താണങ്കില് പാദങ്ങള് ചേര്ത്തുവച്ച് തല കാല് മുട്ടുകള്ക്ക് ഇടയില് ഒതുക്കി പന്തുപോലെ ഉരുണ്ട് ഇരിക്കുക. ഇടിമിന്നലുള്ള സമയം പുറത്ത് അയയില് കിടക്കുന്ന നനഞ്ഞ വസ്ത്രങ്ങള് എടുക്കാതിരിക്കുക.
ഇടിമിന്നലില് നിന്ന് സുരക്ഷിതമാക്കാന് കെട്ടിടങ്ങള്ക്ക് മുകളില് മിന്നല് ചാലകം സ്ഥാപിക്കാം. വൈദ്യുതോപകരണങ്ങളുടെ സുരക്ഷക്കായി സര്ജ്ജ് പ്രോട്ടക്ടര് ഘടിപ്പിക്കാം. മിന്നലിന്റെ ആഘാതത്താല് പൊള്ളല് ഏല്ക്കുകയോ കഴ്ച്ചയോ കേഴ്വിയോ നഷ്ടമാവുകയോ ഹൃദയാഘാതം സംഭവിക്കയോ ചെയ്യാം. മിന്നലാഘാതം ഏറ്റ ആളിന്റെ ശരീരത്തില് വൈദ്യുത പ്രവാഹം ഇല്ല എന്ന് മനസ്സിലാക്കണം. അതിനാല് മിന്നലേറ്റ ആളിന് പ്രഥമ ശുശ്രൂഷ നല്കുവാന് മടിക്കരുത്. മിന്നല് ഏറ്റാല് ആദ്യ മുപ്പത് സെക്കന്റ് സുരക്ഷക്കായിട്ടുള്ള സുവര്ണ്ണ നിമിഷങ്ങളാണ്. വളര്ത്തു മൃഗങ്ങളെ തുറസായ സ്ഥലത്ത് ഈ സമയത്ത് കെട്ടരുത്. അവയെ അഴിക്കുവാനും സുരക്ഷിതമായി മാറ്റി കെട്ടുവാനും മഴ മേഘം കാണുമ്പോള് തുറസായ സ്ഥലത്തെക്ക് പോകരുതെന്നും മുന്നറിയിപ്പില് പറയുന്നു.
https://www.facebook.com/Malayalivartha
