പിക്കപ്പ് വാനിടിച്ച് രണ്ട് പേരെ വീഴ്ത്തിയ ശേഷം വെട്ടിക്കൊലപ്പെടുത്തിയ സംഭവവുമായി ബന്ധപ്പെട്ട് പൊലീസ് നടത്തിയ പരിശോധനയില്‍ വ്യക്തമായത് കഞ്ചാവ് മാഫിയയുടെ ഭീകര സ്വാധീനം. പ്രതിയെന്ന് സംശയിക്കുന്ന ഡയമണ്ടിന്റെ വീട്ടില്‍ നിന്ന് പെട്രോള്‍ ബോംബ് ഉള്‍പ്പെടെ മാരക സ്‌ഫോടക വസ്തുക്കളാണ് കണ്ടെത്തിയത്. വീടിന് കാവലായി മുന്തിയ ഇനം നായകളെയും വളര്‍ത്തിയിരുന്നു. മറ്റ് ആരും ഇവിടേക്ക് വരാതിരിക്കാനും പൊലീസില്‍ നിന്ന് രക്ഷതേടാനുമാണ് നായ്ക്കളെ വളര്‍ത്തിയിരുന്നതത്രേ.വീടിന്റെ സിറ്റൗട്ടില്‍ കുപ്പിച്ചില്ലുകള്‍ ചിതറി കിടന്നിരുന്നു.ബോംബുണ്ടാക്കാന്‍ ഉപയോഗിച്ചിരുന്നതിന്റെ ബാക്കിയാണിതെന്ന് സംശയിക്കുന്നു.
ഡയമണ്ടിന്റെ വീട്ടിലാണ് കൊലപാതകം ആസൂത്രണം ചെയ്തതെന്ന് പൊലീസ് കരുതുന്നത്. ഡയമണ്ട് വാടകക്കാണ് ഇവിടെ താമസിക്കുന്നത്. കഞ്ചാവ് സംഘങ്ങളുടെ കേന്ദ്രമാണ് ഈ മേഖലയെന്ന് പൊലീസ് വൃത്തങ്ങള്‍ വ്യക്തമാക്കി. ഇവിടെ സ്ത്രീയുടെ നേതൃത്വത്തില്‍ വലിയൊരു ഗുണ്ടാസംഘം പ്രവര്‍ത്തിക്കുന്നതായും പൊലീസിന് വിവരം ലഭിച്ചിട്ടുണ്ട്.
പലതവണ വിവിധ കേസുകളില്‍ ഇവരെ എക്‌സൈസും പൊലീസും പിടികൂടിയിട്ടുണ്ടെങ്കിലും ജാമ്യത്തിലിറങ്ങി വീണ്ടും അക്രമങ്ങളില്‍ ഏര്‍പ്പെടുകയാണത്രേ. ഈ മാഫിയ സംഘങ്ങള്‍ പൊലീസിനും കേസിനും പുല്ലുവിലയാണ് നല്‍കുന്നത്. പിടികൂടുന്ന കഞ്ചാവ് ഒരു കിലോഗ്രാമിന് താഴെയാണെങ്കില്‍ സ്‌റ്റേഷന്‍ ജാമ്യം അനുവദിക്കും. എളുപ്പത്തില്‍ കേസുകളില്‍ രക്ഷപ്പെടാനും കഴിയും. കഞ്ചാവ് സംഘങ്ങള്‍ ഇത് സൗകര്യമാക്കുകയാണ്. കഞ്ചാവ് കച്ചവടവുമായി ബന്ധപ്പെട്ട് ഒറ്റിക്കൊടുക്കലും സംഘട്ടനങ്ങളും പതിവാകുമ്പോഴും കര്‍ശന നടപടി ഉണ്ടാകുന്നില്ല.

കോളജ് വിദ്യാര്‍ഥികള്‍ അടക്കം കഞ്ചാവ് റാക്കറ്റിന്റെ ഭാഗമാകുന്ന സാഹചര്യമുണ്ട്. മാസങ്ങള്‍ക്ക് മുമ്പ് വന്‍ കഞ്ചാവ് ശേഖരവുമായി എന്‍ജിനീയറിങ് വിദ്യാര്‍ഥിയെ പിടികൂടിയിരുന്നു. ദിവസങ്ങള്‍ക്ക് മുമ്പ് തൃശൂര്‍ റെയില്‍വേ സ്‌റ്റേഷനില്‍ 370 കിലോ കഞ്ചാവ് പിടികൂടി. ഈ വര്‍ഷം ജനുവരി ഒന്നു മുതല്‍ മാര്‍ച്ച് വരെ 11.88 കിലോ കഞ്ചാവ് പൊലീസ് ഇതുവരെ പിടിച്ചു.150 നൈട്രസന്‍ മയക്കുമരുന്നും പിടിച്ചു. ലഹരിയുമായി ബന്ധപ്പെട്ട് 50കേസുകളില്‍ 83 അറസ്റ്റും ഇതുവരെ ഉണ്ടായിട്ടുണ്ട്.